ចិននិងឥណ្ឌា និយាយគ្នាតាមទូរស័ព្ទដើម្បីបន្ធូរភាពតានតឹង នៅព្រំដែន
នៅក្រោយផ្ទុះជម្លោះព្រំដែន ដែលបានសម្លាប់ទាហានឥណ្ឌា យ៉ាងតិច ២០នាក់ កាលពីយប់ថ្ងៃចន្ទ រដ្ឋមន្រ្តីក្រសួងការបរទេសឥណ្ឌា និងចិន បាននិយាយទូរស័ព្ទរកគ្នា នៅថ្ងៃពុធម្សិលមិញ ដើម្បីបន្ថយភាពតានតឹងនៅព្រំដែនប្រទេសទាំងពីរ។ កិច្ចសន្ទនាតាមទូរស័ព្ទ របស់ប្រមុខការបរទេសឥណ្ឌា និងចិន ធ្វើឡើង នៅក្រោយមានសេចក្តីរាយការណ៍ថា ឥណ្ដាបានបញ្ជូនបន្ថែមទាហាន ទៅកាន់តំបន់ជាប់ជម្លោះព្រំដែន នៅយប់ថ្ងៃអង្គារ។
ចុះផ្សាយនៅថ្ងៃ៖
ស្តាប់ - ០២:២៩
នៅក្នុងកិច្ចសន្ទនាតាមទូរស័ព្ទ នៅល្ងាចថ្ងៃពុធ រដ្ឋមន្រ្តីការបរទេសចិន និងឥណ្ឌាបានយល់ព្រមព្រៀងគ្នាដើម្បីកាត់បន្ថយភាពតានតឹង និងរក្សាសន្តិភាព ភាពស្ងប់ស្ងាត់ នៅតំបន់ព្រំដែន។ នេះបើតាមសេចក្តីថ្លែងការណ៍របស់ក្រសួងការបរទេសចិន។
រដ្ឋមន្រ្តីការបរទេសចិន លោកវ៉ាង យី បានទាមទារផងដែរឲ្យភាគីឥណ្ឌាបើកការស៊ើបអង្កេត និងដាក់ពិន័យអ្នកដែលទទួលខុសត្រូវឲ្យកើតមានជម្លោះ រវាងទាហានឥណ្ឌា និងចិន។ “ឥណ្ឌាមិនត្រូវយល់ច្រលំលើហេតុការណ៍ដែលទើបកើតមាននេះទេ។ ហើយឥណ្ឌាក៏មិនត្រូវមើលស្រាល ការប្តេជ្ញារបស់ចិន ក្នុងការរក្សាដែនដីអធិបតេយ្យរបស់ចិនដែរ។” នេះជាការបញ្ជាក់របស់សេចក្តីថ្លែងការណ៍ចិន។
ពីខាងភាគីឥណ្ឌា រដ្ឋាភិបាលឥណ្ឌា ចេញសេចក្តីថ្លែងការណ៍ ដែលក្នុងនោះ ឥណ្ឌាបានបរិហាសកម្មភាព គ្រោងទុកជាមុន និងមានចេតនាពីខាងប្រទេសចិន។ ប៉ុន្តែយ៉ាងណាក៏ដោយ ភាគីទាំងពីរយល់ព្រមនឹងគ្នាថា នឹងមិនចាត់វិធានការណាមួយ ដើម្បី បង្កឲ្យមានភាពតានតឹងបន្ថែមនោះទេ។
នៅយប់ថ្ងៃចន្ទ ទាហានឥណ្ឌា និងទាហានចិន បានឈ្លោះវាយប្រតាយប្រតប់គ្នា នៅតំបន់ជ្រលងភ្នំ ហ្កាល់វ៉ាន់ ដែលមានកំពស់ ជាង ៤៥០០ម៉ែត្រ ក្នុងរដ្ឋឡាដាក របស់ឥណ្ឌា ជាទីដែលទាហានចិនបានចេញមុខប្រឆាំងនឹងគម្រោងសាងសង់ផ្លូវយោធា របស់ឥណ្ឌា ក្នុងហេតុផលថា ឥណ្ឌាកំពុងសាងសង់ក្នុងតំបន់ព្រំដែនជាប់ជម្លោះ។ តាមប្រភពស្និទ្ធនឹងសំណុំរឿង ដែលបានប្រាប់ទីភ្នាក់ងារព័ត៌មានបារាំង AFP កោសល្យវិច័យរបស់គ្រូពេទ្យឥណ្ឌាបង្ហាញថា ទាហានឥណ្ឌា ស្លាប់ដោយសារលង់ទឹក និងមានស្នាមបែកក្បាល នៅក្រោយ ការប្រតាយប្រតប់ ធ្លាក់រមៀល ពីលើភ្នំ។
វ៉ាស៊ីនតោន ដែលជាសម្ព័ន្ធមិត្តរបស់ឥណ្ឌា សង្ឃឹមចង់ឃើញ ដំណោះស្រាយដោយសន្តិភាព។ អង្គការសហប្រជាជាតិ បានអំពាវនាវឲ្យភាគីទាំងពីរអត់ធ្មត់ឲ្យបានអតិបរមា ចំណែករុស្ស៊ី វិញ នៅថ្ងៃពុធ បានសំដែងការអបអរសាទរដំណឹងដែលថា ភាគីទាំងពីរបានទាក់ទងតាមផ្លូវសន្តិភាព ដើម្បីបន្ថយភាពតានតឹង។
តាមទីភ្នាក់ងារព័ត៌មានបារាំង AFP យន្តហោះយោធារបស់ឥណ្ឌា បានដឹកជញ្ជូន កងទ័ពទៅកាន់តំបន់កើតមានជម្លោះ នៅទីក្រុងឡាដាក របស់ឥណ្ឌា កាលពីយប់ថ្ងៃអង្គារ។ ចិន ទាមទារគ្រប់គ្រងតំបន់ឡាដាក មួយផ្នែក។ ចិន និងឥណ្ឌា ដែលជាមហាអំណាចនុយក្លេអ៊ែរ រៀងៗខ្លួន ឧស្សាហ៍ប្រឈមមុខដាក់គ្នា ព្រោះថា ប្រទេសទាំងពីរ នៅមិនទាន់ចុះសម្រុងគ្នា លើខ្សែបន្ទាត់ព្រំដែន ជាពិសេស នៅលើជួរភ្នំហេមពាន្ត ដែលភាគីទាំងពីរ ទាមទារយកជាកម្មសិទ្ធិរៀងៗខ្លួន និងបានធ្វើសង្រ្គាមបង្ហូរឈាមគ្នាម្តង នៅឆ្នាំ ១៩៦២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ