ចិននិងឥណ្ឌាប៉ះទង្គិចគ្នាជាថ្មី នៅតាមព្រំដែនជាប់ជម្លោះ
មានស្លាប់យ៉ាងហោចណាស់ទាហានឥណ្ឌាបីនាក់ នៅក្នុងការប៉ះទង្គិចដោយហិង្សារវាងទាហានចិន និងទាហានឥណ្ឌា នៅតាមបណ្តោយព្រំដែនជាប់ជម្លោះត្រង់តំបន់ ឡាដាក។ នេះបើតាមសេចក្តីជូនដំណឹងរបស់យោធាឥណ្ឌា។ ជម្លោះព្រំដែនរវាងចិននិងឥណ្ឌា នៅតំបន់ឡាដាក ភាគខាងជើងឥណ្ឌា បានផ្ទុះឡើងកម្តៅ និងតានតឹងយោធាថ្មី តាំងពីខែឧសភា២០២០មក។
ចុះផ្សាយនៅថ្ងៃ៖
ស្តាប់ - ០២:០១
ចិនបានចោទទាហានឥណ្ឌាថាជាអ្នកនាំរឿង ដោយបានឆ្លងព្រំដែនជាប់ជម្លោះដល់ទៅពីរដង នៅថ្ងៃទី១៥មិថុនា និងបានផ្គើនទាហានចិនមុន ទើបបង្កឱ្យមានការប៉ះទង្គិចគ្នាយ៉ាងហិង្សា។ ប៉ុន្តែចិនពុំបានជូនដំណឹងជាសាធារណៈថាមានទាហានខាងខ្លួនបានបាត់បង់ជីវិតទេ។
ខាងឥណ្ឌាវិញ បើតាមយោធាម្នាក់ដែលប្រចាំការនៅក្នុងតំបន់ និងដែលសុំមិនបញ្ចេញឈ្មោះ ការប៉ះទង្គិចគ្នាថ្ងៃនេះ ប្រព្រឹត្តទៅដោយគ្មានការបាញ់តបតគ្នាដោយប្រើអាវុធទេ គឺមានតែការវាយប្រតប់គ្នា។
ភាពតានតឹងនៅព្រំដែន បានឡើងប៉ោងខ្លាំង តាំងពីដើមខែឧសភាមក ទាហានរបស់មហាអំណាចនុយក្លេអ៊ែរប្រចាំតំបន់ទាំងពីរ បានប្រឈមមុខដាក់គ្នាជាញឹកញយ និងបាននាំគ្នាបញ្ជូនកម្លាំងទ័ពបន្ថែមជាច្រើនពាន់នាក់។ ភាគីទាំងពីរបានសន្យាដោះស្រាយវិបត្តិដោយសន្តិវិធីនិងតាមផ្លូវការទូត។ ក្រោយកិច្ចចរចាថ្នាក់ឧត្តមសេនីយ៍កាលពីជាង១០ថ្ងៃមុន ឥណ្ឌានិងចិន បានផ្តើមដំណើរការដកកងទ័ពរៀងៗខ្លួនពីជួរមុខ។ ហើយគឺក្នុងដំណើរការដកកងទ័ព បន្ធូរបន្ថយភាពតានតឹងនេះឯង ដែលការប៉ះទង្គិចគ្នាបានផ្ទុះឡើងនៅយប់មិញ បង្កឱ្យនាយទាហានម្នាក់និងកូនទាហានឥណ្ឌាពីរនាក់ស្លាប់។ នេះបើតាមអ្នកនាំពាក្យយោធាឥណ្ឌា ដោយអះអាងតាមរយៈសេចក្តីថ្លែងការណ៍ទៀតថា មេដឹកនាំយោធាជាន់ខ្ពស់ទាំងពីរ កំពុងជួបចរចាគ្នានៅពេលនេះ ដើម្បីបន្ធូរបន្ថយសម្ពាធ។
សូមបញ្ជាក់ថា ឥណ្ឌានិងចិន មានជម្លោះព្រំដែន តាមបណ្តោយជួរភ្នំហេមពាន្ត ដោះស្រាយមិនចេញតាំងពីយូរមកហើយ។ ការប៉ះទង្គិចគ្នាដោយហិង្សា តែងកើតឡើងជាញឹកញយ និងកាន់តែធ្ងន់ធ្ងរនារយៈពេលប៉ុន្មានឆ្នាំចុងក្រោយនេះ។ ប៉ុន្តែគិតចាប់តាំងពីឆ្នាំ១៩៧៥មក ចិននិងឥណ្ឌាពុំដែលមានករណីប្រើអាវុធ ឬគ្រាប់កាំភ្លើងផ្ទុះដាក់គ្នាទេ នៅព្រំដែនទេ។ ជម្លោះព្រំដែន រវាងមហាអំណាចជាប្រទេសជិតខាងគ្នា លើកចុងក្រោយបផុតប្រព្រឹត្តទៅនៅឆ្នាំ១៩៦៧ ក្នុងទម្រង់ជាសង្គ្រាមប្រដាប់អាវុធមួយឆាបដែលទាហានឥណ្ឌាប្រយុទ្ធចាញ់ទាហានចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ