ឧបទ្វីបកូរ៉េ៖ក្រុងព្យុងយ៉ាងច្រានចោលសំណើក្រុងសេអ៊ូល និងព្រមានបញ្ជូនទ័ពទៅក្បែរតំបន់គ្មានកងទ័ព
ស្ថានការណ៍នៅឧបទ្វីបកូរ៉េកំពុងបន្តតានតឹងខ្លាំង។ បន្ទាប់ពីបានបំផ្ទុះកម្ទេចអាគារការិយាល័យទំនាក់ទំនងជាមួយកូរ៉េខាងត្បូងដែលស្ថិតក្នុងតំបន់កេសុងជាប់ព្រំដែនរវាងកូរ៉េទាំង២ ក្នុងថ្ងៃអង្គារ ទី១៦ មិថុនាមក កូរ៉េខាងជើងបានព្រមានក្នុងថ្ងៃពុធ ទី១៧ មិថុនានេះពីការបញ្ជូនទ័ពទៅក្បែរតំបន់គ្មានកងទ័ព។ ទន្ទឹមគ្នានេះ ក្រុងព្យុងយ៉ាងក៏បានបញ្ជាក់ពីការច្រានចោលនូវសំណើរបស់ប្រធានាធិបតីកូរ៉េខាងត្បូងលោកមូន ចៃអ៊ីនដែលចង់បញ្ជូនក្រុមប្រេសិតកូរ៉េខាងត្បូងទៅកូរ៉េខាងជើងដើម្បីចរចា។
ចុះផ្សាយនៅថ្ងៃ៖
ស្តាប់ - ០២:២៩
សំណើរបស់ក្រុងសេអ៊ូលពិតជាបានទៅដល់ដៃក្រុងព្យុងយ៉ាងមែន តែការដែលក្រុងព្យុងយ៉ាងបានច្រានចោលលើសំណើនោះមកពីប្អូនស្រីរបស់លោកគីម ជុងអ៊ុនយល់ថា ជាសំណើអាក្រក់ និងខ្វះការពិចារណា នេះបើតាមកាសែតផ្លូវការកូរ៉េខាងជើង KCNA ចេញផ្សាយក្នុងថ្ងៃពុធ ទី១៧ មិថុនា។ ទន្ទឹមនឹងច្រានចោលលើសំណើរបស់កូរ៉េខាងត្បូង KCNA ក៏បានផ្សព្វផ្សាយនូវសេចក្តីប្រកាសព័ត៌មានមួយរបស់កងទ័ពកូរ៉េខាងជើងដែលបញ្ជាក់ពីការត្រៀមពង្រាយទ័ពនៅតំបន់ទេសចរណ៍ Mont Kumgang និងតំបន់ឧស្សាហកម្ម Kaesong ដែលសុទ្ធសឹងជាតំបន់នៃកិច្ចសហប្រតិបត្តិការដ៏សំខាន់រវាងបងប្អូនបង្កើតគូសត្រូវទាំងពីរ។
ដោយឡែក និងក្រៅពីគ្រោងពង្រាយទ័ពនៅតំបន់ Mont Kumgang និងតំបន់ Kaesong អ្នកនាំពាក្យកងទ័ពកូរ៉េខាងជើងបានបញ្ជាក់ថា ប៉ុស្តិ៍យាមនៅតំបន់គ្មានកងទ័ពដែលបានដកចេញក្នុងឆ្នាំ ២០១៨តាមកិច្ចព្រមព្រៀងអន្តរកូរ៉េនឹងដាក់ឲ្យមានឡើងវិញដើម្បីពង្រឹងការឃ្លាំមើលនៅតាមខ្សែបន្ទាត់ព្រំដែន។ បន្ទាប់មក និងបើផ្អែកតាមអ្នកនាំពាក្យកងទ័ពកូរ៉េខាងជើងរូបនេះដដែល អង្គភាពកាំភ្លើងធំ ពិសេសនៅតំបន់ដែនសមុទ្រនឹងចាប់លំហាត់សឹកគ្រប់ប្រភេទគ្រប់ឡើងវិញជាប្រចាំ ហើយកូរ៉េខាងជើងក៏មានបំណងបញ្ជូនទៅកូរ៉េខាត្បូងនូវខិតប័ណ្ណឃោសនារបស់ខ្លួនដែរ។ ការព្រមានរបស់ក្រុងព្យុងយ៉ាងពេលនេះមិនបានធ្វើឲ្យក្រុងសេអ៊ូលបិទមាត់ទេ។
ក្រៅពីចាត់ទុកសម្តីរបស់កូរ៉េខាងជើងថាមិនសមហេតុផល និងគ្មានការគួរសម អ្នកនាំពាក្យវិមានប្រធានាធិបតីកូរ៉េខាងត្បូងបានព្រមានតបវិញត្រង់ៗថា កូរ៉េខាងត្បូងនឹងមិនអត់អោនឲ្យទៀតឡើយនូវសកម្មភាព និងពាក្យសម្តីមិនសមរម្យ។ ចំណែកក្រសួងការពារជាតិកូរ៉េខាងត្បូងបានយល់ឃើញតាមរយៈសេចក្តីប្រកាសព័ត៌មានមួយរបស់ខ្លួនថា បើកូរ៉េខាងជើងហ៊ានធ្វើដូចដែលខ្លួនបានគំរាមកំហែងមែន នោះវាជាការរំលោភលើកិច្ចព្រមព្រៀងអន្តរកូរ៉េ។ « បើកូរ៉េខាងជើងហ៊ាន កូរ៉េខាងជើងនឹងត្រូវបង់តម្លៃចំពោះទង្វើរបស់ខ្លួនដោយចៀសមិនរួច » នេះជាការព្រមានរបស់ក្រសួងការពារជាតិកូរ៉េខាងត្បូង។
គេនៅមិនទាន់ដឹងថា តើកំណើនភាពតានតឹងជាថ្មីរវាងបងប្អូនបង្កើតគូសត្រូវទាំងពីរនឹងបន្តមានដល់ពេលណា និងអាចបញ្ចប់តាមផ្លូវណាទេ។ អ្វីដែលគេអាចនិយាយបាន តាំងពីក្រោយការបិទបញ្ចប់សង្រ្គាមរវាងគ្នាក្នុងឆ្នាំ ១៩៥៣ មក កូរ៉េខាងជើង និងខាងត្បូងមានត្រឹមយុទ្ធសន្តិភាពប៉ុណ្ណោះ ពោលនៅមិនទាន់មានកិច្ចព្រមព្រៀងសន្តិភាពរវាងគ្នានៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ