អ្នកកាសែតអូស្រ្តាលីពីរនាក់បានចាកចេញពីចិនដោយបារម្ភពីការចាប់ខ្លួន
អ្នកកាសែតអូស្រ្តាលីចំនួនពីរនាក់ គឺលោក Bill Birtles និងលោក Michael Smith បានចាកចេញពីប្រទេសចិននាយប់ថ្ងៃចន្ទ ទី៧ឆ្លងចូលថ្ងៃអង្គារ ទី៨ កញ្ញា។ ការសម្រេចចាកចេញពីទឹកដីចិនរបស់អ្នកកាសែតទាំងពីរនាក់មកពីពួកគេបារម្ភពីការចាប់ខ្លួនដោយរដ្ឋអំណាចចិនក្រោមហេតុផលសន្តិសុខជាតិ។ នៅប៉ុន្មានម៉ោង បន្ទាប់ពីការទៅដល់ប្រទេសកំណើតរបស់លោក Bill Birtles និងលោក Michael Smith រដ្ឋាភិបាលចិនបានបញ្ជាក់ថា អ្នកកាសែតអូស្រ្តាលីម្នាក់ទៀត គឺលោកស្រី Cheng Lei ដែលបានចាប់ខ្លួនក្នុងខែសីហា និងជាបុគ្គលិកធ្វើការឲ្យទូរទស្សន៍រដ្ឋចិនមានសកម្មភាពឧក្រិដ្ឋដែលបង្កគ្រោះថ្នាក់ដល់សន្តិសុខជាតិ។
ចុះផ្សាយនៅថ្ងៃ៖
ស្តាប់ - ០២:៥៦
លោក Bill Birtles និងលោក Michael Smith គឺជាអ្នកឆ្លើយឆ្លងព័ត៌មានឲ្យកាសែត Australian Financial Review ប្រចាំក្រុងសៀងហៃ។ ការសម្រេចចាកចេញពីចិនដោយបង្ខំ និងដោយបារម្ភពីការចាប់ខ្លួនរបស់អ្នកកាសែតអូស្រា្តលីទាំងពីរនាក់ក៏ដោយសារនៅសប្តាហ៍មុន ប៉ូលិសចិនបានចូលឆែកឆែរផ្ទះរបស់ពួកគេនៅកណ្តាលអាធ្រាត្រ។ ប៉ូលិសចិនបានប្រាប់អ្នកកាសែតទាំងពីរនាក់នាពេលនោះថា ពួកគេជាប់ពាក់ព័ន្ធនឹងការស៊ើបអង្កេតក្នុងក្របខណ្ឌសន្តិសុខជាតិ ពួកគេមិនអាចចាកចេញពីទឹកដីចិន ហើយពួកគេនឹងត្រូវកោះហៅទៅសួរនាំ។
ដោយបារម្ភពីការចាប់ខ្លួន និងកោះហៅទៅសួរនាំ លោក Bill និងលោក Michael ក៏បានសម្រេចចិត្តគេចខ្លួនទៅជ្រកកោណនៅក្នុងផ្ទះមន្រ្តីទូតអូស្រា្តលីដែលនៅជិតបំផុត។ បន្ទាប់មកក្នុងថ្ងៃចន្ទ ទី៧ កញ្ញា អ្នកកាសែតអូស្រ្តាលីទាំងពីរនាក់ដែលអមដំណើរដោយមន្រ្តីទូតអូស្រា្តលីបានចាកចេញពីក្រុងសៀងហៃ និងទៅដល់ក្រុងស៊ីដនីនាព្រឹកថ្ងៃអង្គារ ទី៨ កញ្ញា។ « ពិតជាបានធូរស្បើយ និងធូរទ្រូងខ្លាំងណាស់ដែលបានត្រឡប់មកដល់ប្រទេសមួយមាននីតិរដ្ឋពេញលេញ » នេះជាការថ្លែងរបស់លោក Bill នៅពេលបានដាក់ជើងជាន់ទឹកដីកំណើត។
គួរបញ្ជាក់ថា ឈ្មោះលោក Bill និងលោក Michael ត្រូវបានរដ្ឋអំណាចចិនដាក់បញ្ចូលទៅក្នុងបញ្ជីឈ្មោះអ្នកកាសែតបរទេស ពិសេសអ្នកកាសែតអាមេរិកដែលថ្មីៗនេះមិនទទួលបានច្បាប់ធ្វើការលើទឹកដីចិន ឬមួយក៏ត្រូវបណ្តេញចេញពីទឹកដីចិន។ ក្នុងខែមិថុនាកន្លងទៅ អ្នកកាសែតអូស្រ្តាលីម្នាក់ទៀតលោកស្រី Cheng Lei ដែលធ្វើការឲ្យទូរទស្សន៍រដ្ឋចិនត្រូវបានចាប់ខ្លួនដោយមិនដឹងមូលហេតុ។ តែចិនទើបបានបញ្ជាក់ក្នុងថ្ងៃអង្គារ ទី៨ កញ្ញាថា លោកស្រី Cheng Lei បានជាប់សង្ស័យពីបទមានសកម្មភាពឧក្រិដ្ឋដែលបង្កគ្រោះថ្នាក់ដល់សន្តិសុខជាតិ និងឆ្លៀតរម្លឹកថា នៅពេលដែលអ្នកកាសែតបរទេសគោរពច្បាប់ចិន ពួកគេគ្មានហេតុផលអ្វីដែលត្រូវបារម្ភទេ។
ទោះជាយ៉ាងនេះក្តី ក្រុមនិពន្ធនាយកកាសែត Australian Financial Review បានចេញមុខការពារលោក Bill និងលោក Michael ដោយគូសបញ្ជាក់ថា លោក Bill និងលោក Michael ធ្វើការងារធម្មតាក្នុងនាមជាអ្នកយកព័ត៌មាន។ ក្រុមនិពន្ធនាយកកាសែត Australian Financial Review ដដែលបានចាត់ទុករឿងរ៉ាវមួយនេះគួរឲ្យសោកស្តាយ និងបារម្ភ ហើយថា វាមិនមែនជាប្រយោជន៍នៃទំនាក់ទំនង និងកិច្ចសហប្រតិបត្តិការរវាងអូស្រា្តលី និងចិនទេ។ គួររម្លឹកថាក្នុងរយៈពេលប៉ុន្មានឆ្នាំចុងក្រោយនេះ ពោលតាំងពីការឡើងកាន់តំណែងប្រធានាធិបតីចិនរបស់លោកស៊ី ជីនពីង អូស្រ្តាលីតែងប្រឆាំងនឹងកំណើនឥទ្ធិពលរបស់ចិននៅអាស៊ី។
នៅប៉ុន្មានខែមុននេះទៀត អូស្រា្តលីបានធ្វើឲ្យចិនក្តៅក្រហាយដោយបានទាមទារឲ្យមានការស៊ើបអង្កេតលើប្រភពនៃការផ្ទុះជំងឺកូវីដ-១៩ នៅចិន។ តាំងពីពេលនោះមក ចិនបានបន្តប្រើអាវុធសេដ្ឋកិច្ចប្រឆាំងអូស្រា្តលីដែលជាដៃគូសេដ្ឋកិច្ចទី១ របស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ