រដ្ឋមន្រ្តីការបរទេសអាមេរិកជំរុញអាស៊ានឲ្យកាត់ផ្តាច់ទំនាក់ទំនងជាមួយក្រុមហ៊ុនរដ្ឋចិន
ចុះផ្សាយនៅថ្ងៃ៖
អាមេរិក និងចិន ដែលកំពុងមានជម្លោះតានតឹងដាក់គ្នា កាន់តែខ្លាំងកំពុងដើរបញ្ចុះបញ្ចូល ប្រទេសសមាជិកអាស៊ានឲ្យគាំទ្ររៀងៗខ្លួន។ នៅក្នុងកិច្ចប្រជុំថ្នាក់រដ្ឋមន្រ្តីការបរទេសអាស៊ាន នៅថ្ងៃព្រហស្បតិ៍នេះ រដ្ឋមន្រ្តីការបរទេសអាមេរិកលោក Mike Pompeo បានជំរុញឲ្យប្រទេសអាស៊ានកាត់ផ្តាច់ទំនាក់ទំនងធ្វើជំនួញ ជាមួយក្រុមហ៊ុនចិនដែលជាប់ពាក់ព័ន្ធនឹងការសាងសង់ សំណង់ នៅលើកោះសិប្បនិម្មិតក្នុងសមុទ្រចិនខាងត្បូង។ រដ្ឋមន្រ្តីការបរទេសចិនវិញ ដែលបានជួបប្រាស្រ័យ ជាមួយបណ្តារដ្ឋមន្រ្តី អាស៊ាន កាលពីថ្ងៃពុធ ម្សិលមិញ បានចោទប្រកាន់អាមេរិកថា ជាការគំរាមកំហែងដល់សុខសន្តិភាព នៅសមុទ្រចិនខាងត្បូង។ អាស៊ាន មានប្រទេសសមាជិកចំនួន ៥ ដែលកំពុងជាប់ជម្លោះដែនទឹកជាមួយចិន នៅសមុទ្រចិនខាងត្បូង។ តើអាស៊ាន នឹងជ្រើសរើសយកផ្លូវដើរមួយខាងណា? ទៅខាងចិន ឬធ្វើតាមអាមេរិក?
ការប្រឈមមុខដាក់គ្នារវាងចិន និងអាមេរិកបានចូលទៅរាលដាល ដល់ក្នុងជំនួបកំពូលអាស៊ាន ដែលត្រូវបើកធ្វើ រហូតដល់ថ្ងៃសៅរ៍ចុងសប្តាហ៍នេះ។ នៅក្នុងកិច្ចប្រជុំ ជាមួយ រដ្ឋមន្រ្តីការបរទេសរបស់ប្រទេសសមាជិកអាស៊ាន ប្រមុខការបរទេសអាមេរិក លោកMike Pompeo បាននិយាយជំរុញឲ្យអាស៊ាន កាត់ផ្តាច់ទំនាក់ទំនងជាមួយ ក្រុមហ៊ុនចិន ដែល ជាប់ពាក់ព័ន្ធនឹងគម្រោងការសំណង់របស់រដ្ឋាភិបាលចិន នៅក្នុងសមុទ្រចិនខាងត្បូង។
អាមេរិក កាលពីខែសីហាមុន បានសម្រេចដាក់ទណ្ឌកម្មក្រុមហ៊ុន ចិន ចំនួន ២៤ ដែលជាប់ពាក់ព័ន្ធ ចូលរួម ក្នុងការសាងសង់ នៅលើកោះសិប្បនិម្មិតរបស់ចិន នៅសមុទ្រចិនខាងត្បូង។ បើប្រៀបធៀបនឹងប្រទេសសមាជិកអាស៊ានចំនួន ៥ ដូចជា វៀតណាម ហ្វីលីពីន ឥណ្ឌូណេស៊ី ម៉ាឡេស៊ី និងព្រុយណេ ដែលកំពុងមានជម្លោះដណ្តើមដែនទឹកជាមួយ ចិន នៅសមុទ្រចិនខាងត្បូង អាមេរិក មិនមែនជាភាគីជម្លោះដោយផ្ទាល់ ជាមួយចិន មែន ប៉ុន្តែ អាមេរិក ចេញមុខប្រឆាំងរាល់គម្រោងការសាងសង់ សំណង់យោធា របស់ចិន នៅលើកោះសិប្បនិម្មិត នៅក្នុងសមុទ្រចិនខាងត្បូង ដោយលើកហេតុផលថា ការបំពាក់រ៉ាដា មីស៊ីល នៅលើទីតាំងយោធាដែលចិន បង្កើតឡើងនៅលើកោះសិប្បនិម្មិត នៅសមុទ្រចិនខាងត្បូង គំរាមកំហែង ចរាចរណ៍ដឹកជញ្ជូនផ្លូវទឹកអន្តរជាតិ។
សម្រាប់រដ្ឋមន្រ្តីការបរទេសអាមេរិក វាដល់ពេលហើយដែលអាស៊ានត្រូវចាត់វិធានការជាក់ស្តែង គឺមិនមែនគ្រាន់តែនិយាយតែមាត់នោះទេ។ អាស៊ានត្រូវតែពិចារណា សើរើឡើងវិញ រាល់កិច្ចសន្យាវិនិយោគ ធ្វើជំនួញជាមួយក្រុមហ៊ុនរដ្ឋចិនទាំងឡាយណា ដែលបានចូលរួម ក្នុងផែនការរំលោភឈ្លានពាន ដែនទឹករបស់ប្រទេសសមាជិកអាស៊ាន នៅសមុទ្រចិនខាងត្បូង។ “យើងមិនត្រូវបក្សកុម្មុយនិស្តចិន ដើរជាន់ឈ្លី យើង និងប្រជាជនរបស់យើងនោះទេ។ អាស៊ានត្រូវមានទំនុកចិត្ត ព្រោះថា អាមេរិកក្នុងនាមជាមិត្ត នឹងនៅជួយ អាស៊ាន” នេះជាការបញ្ជាក់របស់ លោកMike Pompeo ទៅកាន់បណ្តារដ្ឋមន្រ្តីការបរទេសរបស់ប្រទេសសមាជិកអាស៊ាន។
ចិនថាអាមេរិក គ្រោះថ្នាក់ គំរាមកំហែង សុខសន្តិភាពនៅសមុទ្រចិន
នៅមុនមួយថ្ងៃ ដែល រដ្ឋមន្រ្តីការបរទេសអាមេរិកនិយាយអូសទាញ អាស៊ានឲ្យកាត់ផ្តាច់ទំនាក់ទំនងធ្វើជំនួញជាមួយក្រុមហ៊ុនចិន រដ្ឋមន្រ្តីការបរទេសចិនលោក វ៉ាង យី ធ្លាប់បានបើកការប្រជុំតាមវីដេអូសន្និសីទ ជាមួយ រដ្ឋមន្រ្តីការបរទេសអាស៊ាន ទាំង១០ ដែលនៅក្នុងនោះ លោកនិយាយថា អាមេរិកជាគ្រោះថ្នាក់ខ្លាំងបំផុត ដែលគំរាមកំហែងសន្តិភាពនៅសមុទ្រចិន។ ចិនដែលបានទាមទារជាម្ចាស់កម្មសិទ្ធិតំបន់ទឹកមួយផ្នែកធំនៅសមុទ្រចិនខាងត្បូង និងខាងកើត កំពុងជាប់ជម្លោះជាមួយ ប្រទេសសមាជិកអាស៊ានចំនួន៥ (វៀតណាម ហ្វីលីពីន ម៉ាឡេស៊ី ឥណ្ឌូណេស៊ី ព្រុយណេ) និងប្រទេសជប៉ុន តៃវ៉ាន់។
សម្រាប់រដ្ឋមន្រ្តីការបរទេសចិន លោកវ៉ាង យី អាមេរិកកំពុងបង្កើតភាពតានតឹងដើម្បីទាញយកប្រយោជន៍ផ្ទាល់ខ្លួន។ “អាមេរិកកំពុងក្លាយចលករដែលជំរុញឲ្យមានការបំពាក់អាវុធ នៅសមុទ្រចិន” នេះជាប្រសាសន៍របស់លោកវ៉ាងយី ទៅកាន់រដ្ឋមន្រ្តីការបរទេសរបស់អាស៊ាន កាលពីថ្ងៃពុធ។
ទីក្រុងប៉េកាំងដែលនៅតែអះអាង ពីភាពស្របច្បាប់ ក្នុងការការពារ ដែនអធិបតេយ្យភាពរបស់ខ្លួន នៅសមុទ្រចិនខាងត្បូង បានបាញ់ មីស៊ីលបាលីស្ទីករយៈចម្ងាយមធ្យម ចំនួន ២ដើម នៅក្នុងសមយុទ្ធយោធា កាលពីសប្តាហ៍មុន។ មីស៊ីលដែលចិនបានបាញ់ ទៅក្នុងសមុទ្រចិនខាងត្បូង មានឈ្មោះថា ឃាតករកម្ទេច នាវាដឹកយន្តហោះ។
សមយុទ្ធយោធារបស់ចិន ដោយមានបាញ់មីស៊ីលដ៏កម្រយ៉ាងដូច្នេះ គឺអាចជាសញ្ញា ព្រមានអាមេរិកដែលបានបង្កើនសមយុទ្ធ និងបញ្ជូនយន្តហោះ កប៉ាល់ចម្បាំង រួមនាវាដឹកយន្តហោះ ឲ្យទៅបើកឆ្លងកាត់កាន់តែញយឡើង នៅសមុទ្រចិនខាងត្បូង។
អាស៊ាននៅក្នុងការប្រទាញប្រទង់គ្នារវាងអាមេរិក និងចិន
ស្ថិតនៅចន្លោះអូសទាញ រវាងចិន និងអាមេរិក អាស៊ាននៅមិនទាន់មានជំហររួមណាមួយនោះទេ។ ប៉ុន្តែ នៅមុនបើកការប្រជុំកំពូលអាស៊ានលើកទី ៥២នេះ រដ្ឋមន្រ្តីការបរទេសឥណ្ឌូណេស៊ីបានអំពាវនាវរួចហើយថា អាស៊ានត្រូវតែ ស្ថិតនៅអព្យាក្រឹត្យ និងរួមកម្លាំងគ្នា នៅក្នុងកាលៈទេសៈ ដែល អាមេរិក និងចិន កំពុងតានតឹងដាក់គ្នាយ៉ាងដូច្នេះ។ ប្រមុខការបរទេស ឥណ្ឌូណេស៊ី បានទាមទារផងដែរ មហាអំណាច ចិន និងអាមេរិក កុំឲ្យអូសទាញ យកអាស៊ានទៅនៅជាប់ក្នុងជម្លោះរវាងមហាអំណាចទាំងពីរ។
ដោយពិតទៅ ប្រទេសសមាជិកអាស៊ានមានជំហរមិនដូចគ្នានោះទេ ទៅនឹងការអំពាវនាវរបស់អាមេរិក។ អ្វីៗគឺអាស្រ័យទៅលើផលប្រយោជន៍ ការពាក់ព័ន្ធក្នុងជម្លោះនៅសមុទ្រចិនខាងត្បូង។ ជាក់ស្តែង វៀតណាមជាម្ចាស់ផ្ទះរៀបចំជំនួបកំពូលអាស៊ានឆ្នាំនេះ ប៉ុន្តែ ដែលជាប់ជម្លោះទាមទារដែនទឹកជាមួយចិន នៅសមុទ្រចិនខាងត្បូង បាននិយាយស្វាគម យ៉ាងកក់ក្តៅ ការចូលរួមរបស់អាមេរិក នៅក្នុងតំបន់អាស៊ាន។ សម្រាប់វៀតណាម តួនាទី និងការចូលរួមរបស់អាមេរិកក្នុងការថែរក្សាសន្តិភាព ស្ថិរភាព និងសន្តិសុខក្នុងតំបន់ គឺ ជារឿងគួរឲ្យលើកទឹកចិត្ត។ ការលើកឡើងយ៉ាងដូច្នេះ របស់វៀតណាម គឺហាក់ផ្ទុយស្រឡះ ពីការលើកឡើងរបស់ប្រមុខការបរទេសចិន ដែលកាលពី១ថ្ងៃមុន បានប្រាប់ប្រមុខការបរទេសអាស៊ានថា អាមេរិក គឺជាគ្រោះថ្នាក់ គំរាមកំហែងសន្តិភាពនៅសមុទ្រចិន។ គេអាចយល់បានពីជំហររបស់វៀតណាម ដែលគាំទ្រ ឲ្យមានវត្តមានរបស់អាមេរិក នៅសមុទ្រចិនខាងត្បូងព្រោះថា វៀតណាមបារម្ភកាន់តែខ្លាំងពីការពង្រីកឥទ្ធិពល យោធា របស់ចិន ជាពិសេស នៅក្រោយ ការបាញ់មីស៊ីល នៅសមុទ្រចិន ដែលវៀតណាមបានចាត់ទុកជាកង្វល់ដ៏ធំសម្រាប់វៀតណាមដែលជាភាគីជម្លោះដែនទឹកជាមួយចិន នៅសមុទ្រចិនខាងត្បូង។
និយាយពីហ្វីលីពីនវិញ ដែលជាប់ជម្លោះជាមួយចិន ដែរនៅក្នុងជម្លោះដណ្តើមប្រជុំកោះ Spratley នៅសមុទ្រចិនខាងត្បូង បានអះអាងថា ហើយនឹងមិន កាត់ផ្តាច់ទំនាក់ទំនងធ្វើជំនួញ ជាមួយក្រុមហ៊ុនចិន តាមអាមេរិកនោះ ក្នុងហេតុផលថា ហ្វីលីពីន ត្រូវការវិនិយោគ ពីចិន។
តើអាស៊ានគួរធ្វើតាមគេ ឬធ្វើជាម្ចាស់លើការសម្រេចចិត្តរបស់ខ្លួនឯង? សម្រាប់ប្រមុខការបរទេសម៉ាឡេស៊ី ការសម្រេចចិត្តណាមួយរបស់អាស៊ាន សំខាន់ណាស់។ វាអាចជាការសម្រេចិត្តដែលនឹងទៅជួយ រក្សាស្ថិរភាព សន្តិភាពក្នុងតំបន់ ឬអាចជាការសម្រេចចិត្តដែលអាចនាំឲ្យកើតផ្ទុះសង្រ្គាមនៅក្នុងតំបន់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ