អាមេរិកខកចិត្តដែលឃើញកូរ៉េខាងជើងអួតសម្ញែងមីស៊ីលថ្មី
មន្ត្រីរដ្ឋាភិបាលអាមេរិកម្នាក់បាននិយាយនៅថ្ងៃអាទិត្យ ១១ តុលាថា សហរដ្ឋអាមេរិកខកចិត្ត ដែលបានឃើញកូរ៉េខាងជើង អួតសម្ញែងសព្វាវុធយោធាថ្មីៗដែលក្នុងនោះក៏រួមមានផងដែរ មីស៊ីលអន្តរទ្វីបថ្មី (ICBM) នៅឯព្យុហយាត្រាយោធាមួយ។ ជាព្យុហយាត្រាដ៏ធំ និងបានប្រព្រឹត្តធ្វើទៅកាលពីថ្ងៃសៅរ៍ក្នុងទីក្រុងព្យុងយ៉ាងចំថ្ងៃគម្រប់ខួប៧៥ឆ្នាំ នៃការបង្កើតគណបក្សពលករកូរ៉េខាងជើង។
ចុះផ្សាយនៅថ្ងៃ៖
ស្តាប់ - ០២:០៤
នៅតែប៉ុន្មានសប្តាហ៍មុនការបោះឆ្នោតប្រធានាធិបតីអាមេរិកមកដល់ កូរ៉េខាងជើងបានអួតបង្ហាញពីភាពជឿនលឿននៃបច្ចេកវិទ្យាយោធានិងសព្វាវុធថ្មីៗតាមរយៈព្យុហយាត្រាយោធាដ៏ធំសម្បើមកាលពីថ្ងៃសៅរ៍ ទី១០ តុលា។
មួយថ្ងៃក្រោយមក សហរដ្ឋអាមេរិកបានសម្តែងនូវការខកចិត្តចំពោះទង្វើអួតសម្ញែងអាវុធយោធារបស់កូរ៉េខាងជើង ខណៈពេលដែលការចរចារំសាយអាវុធនុយក្លេអ៊ែររវាងប្រទេសទាំងពីរនៅតែជាប់គាំងនៅឡើយ។
“វា គឺជារឿងខកចិត្តមួយ ដែលបានឃើញកូរ៉េខាងជើង បន្តផ្តល់អាទិភាពដល់ការអភិវឌ្ឍន៍នុយក្លេអ៊ែរ និងមីស៊ីលប៉ាលីស្ទីកដែលជាអាវុធហាមឃាត់ដោយអន្តរជាតិ”។ នេះគឺជាប្រសាសន៍របស់មន្ត្រីរដ្ឋាភិបាលអាមេរិកម្នាក់ដោយបានបន្ថែមទៀតថា សហរដ្ឋអាមេរិកចង់ឃើញកូរ៉េខាងជើងរំសាយចោលមហិច្ឆតាផលិតអាវុធនុយក្លេអ៊ែរ និងអំពាវនាវឲ្យកូរ៉េខាងជើងត្រលប់ចូលតុកិច្ចចរចា និងធ្វើយ៉ាងណាសម្រេចឲ្យបាននូវការរំសាយអាវុធនុយក្លេអ៊ែរទាំងស្រុង។
ទាក់ទងរឿងនេះ ក្រុមអ្នកវិភាគបានលើកឡើងថា មីស៊ីលអន្តរទ្វីបថ្មីដ៏ធំ (ICBM) ដែលត្រូវបានអួតបង្ហាញដោយកូរ៉េខាងជើងកាលពីថ្ងៃសៅរ៍ គឺជាតឹកតាងបង្ហាញយ៉ាងច្បាស់ថា របបក្រុងព្យុងយ៉ាង បានបន្តអភិវឌ្ឍន៍ឃ្លាំងអាវុធរបស់ខ្លួនទាំងនៅក្នុងអំឡុងពេលចរចាជាមួយក្រុងវ៉ាស៊ីតោន។ ដោយមើលឃើញបែបនេះ ក្រុមអ្នកវិភាគយល់ថា កិច្ចចរចារំសាយអាវុធនុយក្លេអ៊ែរកូរ៉េខាងជើង គួរតែឆាប់រៀបចំឲ្យបានលឿនតាមដែលអាចធ្វើទៅបាន។
គួររំឭកជូនថា ការចរចាទាក់ទងសំណុំរឿងនុយក្លេអ៊ែររវាងលោកប្រធានាធិបតីអាមេរិកដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន បានជាប់គាំង ចាប់តាំងពីបរាជ័យនៃកិច្ចប្រជុំកំពូលក្នុងទីក្រុងហាណូយ កាលពីដើមឆ្នាំ២០១៩ មក។
កិច្ចចរចាកាលណោះបញ្ចប់ទៅដោយគ្មានសម្រេចកិច្ចព្រមព្រៀងអ្វីទាំងអស់ដោយសារតែភាគីទាំងពីរមិនឯកភាពគ្នាជុំវិញការបន្ធូរបន្ថយទណ្ឌកម្ម និងចំណុចសំខាន់ផ្សេងទៀតដែលកូរ៉េខាងជើងទាមទារ ដើម្បីជាថ្នូរក្នុងការរំសាយកម្មវិធីផលិតអាវុធនុយក្លេអ៊ែររបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ