អាមេរិកនិងអូស្ត្រាលីប្តេជ្ញាពង្រឹងកិច្ចសហប្រតិបត្តិការយោធាដើម្បីទប់ទល់ជាមួយចិន
ជំនួបប្រចាំឆ្នាំទ្វេភាគី ថ្នាក់រដ្ឋមន្ត្រីការបរទេស និងការពារជាតិ លើកទី ៣០ប្រព្រឹត្តទៅដោយមានការជួបមុខគ្នាដោយផ្ទាល់ ទោះបីវិបត្តិកូវីដក៏ដោយ។ សហរដ្ឋអាមេរិក និងអូស្ត្រាលី បានបង្ហាញសាមគ្គីភាព និងសម្ព័ន្ធភាពរវាងគ្នាដែលមិនអាចបំបែកបាន។ ប្រទេសទាំងពីរបានប្តេជ្ញាពង្រឹងពង្រីកកិច្ចសហប្រតិបត្តិការយោធា ដើម្បីរួមគ្នាប្រឈមទប់ទល់នឹងចិន។
ចុះផ្សាយនៅថ្ងៃ៖
ជាមួយនឹងការអរគុណចំពោះសមភាគី អូស្ត្រាលីដែលបានធ្វើដំណើរមកប្រជុំ បើទោះបីពេលត្រលប់ទៅវិញត្រូវជាប់បង្ឃាំង១៤ថ្ងៃ លោករដ្ឋមន្ត្រីក្រសួងការបរទេសអាមេរិក បានអះអាងថា អាមេរិកការពារនិងគាំទ្រសម្ព័ន្ធមិត្តអូស្រ្តាលីយ៉ាងមុតមាំបំផុត ដែលជ្រើសរើសប្រកាន់ជំហរដាច់ខាតដាក់ចិន។ ព្រោះសម្រាប់អាមេរិក សកម្មភាពរបស់បក្សកុម្មុយនិស្តចិន នៅក្នុងតំបន់ ឥណ្ឌូប៉ាស៊ីហ្វិក ជាគ្រោះថ្នាក់សម្រាប់ពិភពលោកយ៉ាងខ្លាំងជាទូទៅផង និងជាការគំរាមកំហែងជាពិសេសចំពោះអូស្ត្រាលីផង។
ជាលទ្ធផល មហាអំណាចប៉ាស៊ីហ្វិកទាំងពីរ អាមេរិកអូស្ត្រាលី បានប្តេជ្ញាពង្រឹងពង្រីកកិច្ចសហប្រតិបត្តិការយោធា ដើម្បីការពារទស្សនៈវិស័យរួម ពោលគឺការពារ ការបើកចំហ និងសេរីភាពរបស់តំបន់ឥណ្ឌូប៉ាស៊ីហ្វិក ទល់នឹងមហិច្ឆតាវាតទីរបស់ចិន ដែលជាទង្វើខុសច្បាប់អន្តរជាតិ។ នេះបើតាមសេចក្តីថ្លែងការណ៍រួមរបស់រដ្ឋមន្ត្រីក្រសួងការពារជាតិអាមេរិកនិងអូស្ត្រាលី នៅក្រោយជំនួបប្រជុំនាល្ងាចថ្ងៃអង្គារទី ២៨ កក្កដា២០២០ ម្សិលមិញ។
សម្ព័ន្ធមិត្តចាក់ទឹកមិនលិចទាំងពីរ បានសន្យាពង្រឹងភាពជាដៃគូក្នុងវិស័យឧស្សាហកម្មអាវុធ មានអាទិ៍អាវុធលឿនជាងសំឡេង Hypersoniques។ ដើម្បីផ្តល់សារព្រមានដ៏ច្បាស់លាស់ទៅចិន និងដើម្បីអាចការពារសិទ្ធហោះហើរ បើកបរ និងធ្វើប្រតិបត្តិការដោយសេរី ស្របតាមច្បាប់អន្តរជាតិ អាមេរិកនឹងរៀបចំសមយុទ្ធផ្សេងៗជាមួយអូស្ត្រាលី ព្រមទាំងជប៉ុន នៅក្នុងសមុទ្ទហ្វីលីពីន។ នេះបើតាមប្រសាសន៍របស់លោករដ្ឋមន្ត្រីការពារជាតិអាមេរិក Mark Esper ដែលមិនបញ្ជាក់ដោយចំៗទេថាតើអាមេរិកនឹងអាចបញ្ជូនទ័ពឬអាវុធមីស៊ីលរយៈមធ្យមទៅអូស្ត្រាលី កាន់តែច្រើនជាងមុនដែរឬយ៉ាងណានោះ។ ប៉ុន្តែអាមេរិកនិងអូស្ត្រាលីនឹងពង្រាយកម្លាំងនិងប្រើយុទ្ធសាស្ត្ររួមគ្នាទៅថ្ងៃខាងមុខ។ បើតាមសេចក្តីថ្លែងការណ៍រួមដដែលប្រទេសទាំងពីរនឹងមានក្រុមការងាររួមទទួលបន្ទុកផ្តល់អនុសាសន៍ស្តី អំពីការបង្កើនកម្លាំងយោធាជាយថាហេតុណាមួយ។
សូមបញ្ជាក់ថាកាលពីដើមខែកក្កដា អូស្ត្រាលីបានប្រកាសប្តូរយុទ្ធសាស្ត្រយោធា ពង្រឹងសមត្ថភាពប្រយុទ្ធនិងវាយប្រហារចម្ងាយឆ្ងាយ។ អូស្ត្រាលីបានបង្ហាញជំហរប្រឆាំងចិនកាន់តែខ្លាំងនិងច្បាស់ឡើងៗ តាំងពីផ្ទុះវិបត្តិកូវីដ១៩មក និងកាន់តែខ្លាំងទៀតដូចអាមេរិក ចំពោះវិបត្តិនៅ ហុងកុង ក្រោមក្រសែភ្នែកក្តៅក្រហាយរបស់ចិន។ កាន់តែមិនពេញចិត្តនឹងសេចក្តីប្រកាសពង្រឹងកិច្ចសហប្រតិបត្តិការយោធាអូស្ត្រាលី-អាមេរិក ចិនបានព្រមានថា ធ្វើយ៉ាងណាកុំឱ្យតែដៅ ឬប៉ះពាល់ ដល់ប្រយោជន៍អ្នកទីបី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ