ឥណ្ឌា និងប៉ាគីស្ថានផ្ទុះអាវុធនៅព្រំដែនតំបន់កាស្មៀរដោយបណ្តាលឲ្យមានមនុស្សស្លាប់យ៉ាងតិច ១០នាក់
នៅថ្ងៃសុក្រ ទី១៣ វិច្ឆិកា កងទ័ពឥណ្ឌា និងកងទ័ពប៉ាគីស្ថានបានផ្លោងគ្រាប់កាំភ្លើងត្បាល់ និងផ្ទុះអាវុធដាក់គ្នានៅតាមខ្សែបន្ទាត់ព្រំដែនដែលខ័ណ្ឌចែកតំបន់កាស្មៀរដោយបណ្តាលឲ្យមានមនុស្សស្លាប់យ៉ាងតិច ១០នាក់ និងរបួសជាច្រើននាក់។ កងទ័ពឥណ្ឌាបានចោទកងទ័ពប៉ាគីស្ថានពីបទរំលោភដោយចេតនាលើកិច្ចព្រមព្រៀងឈប់បាញ់ចុះហត្ថលេខាឆ្នាំ ២០០៣។ កាលពី ៥ថ្ងៃមុន ការផ្ទុះអាវុធនៅតាមព្រំដែនដដែលបានបណ្តាលឲ្យស្លាប់ទាហានឥណ្ឌាចំនួន ៣នាក់ និងជនបះបោរចំនួន ៣នាក់។ គួររម្លឹកថា ជម្លោះដណ្តើមតំបន់កាស្មៀរបានធ្វើឲ្យឥណ្ឌា និងប៉ាគីស្ថានធ្លាក់ក្នុងសង្រ្គាមនឹងគ្នាចំនួន ២ដង។
ចុះផ្សាយនៅថ្ងៃ៖
ស្តាប់ - ០២:៣៦
ការផ្ទុះអាវុធក្នុងថ្ងៃសុក្រ ទី១៣ វិច្ឆិកាជាលើកទី៥ គិតក្នុងរយៈពេលប៉ុន្មានខែចុងក្រោយនេះ។ កងទ័ពឥណ្ឌាបានបញ្ជាក់ថា ការផ្ទុះអាវុធបានកើតឡើងនៅពេលដែលក្រុមយុទ្ធជនពីខាងតំបន់កាស្មៀរប៉ាគីស្ថានព្យាយាមឆ្លងចូលក្នុងតំបន់កាស្មៀរឥណ្ឌា។ នៅក្នុងសេចក្តីប្រកាសព័ត៌មានរបស់ខ្លួន កងទ័ពឥណ្ឌាបានបញ្ជាក់ពីការវាយបកចាស់ដៃដោយបានធ្វើឱ្យហេដ្ឋារចនាសម្ព័ន្ធរបស់កងទ័ពប៉ាគីស្ថានខូចខាតយ៉ាងដំណំជាមួយនឹងការស្លាប់ និងរបួស។ សេចក្តីប្រកាសព័ត៌មានរបស់កងទ័ពឥណ្ឌាដដែលបានចោទប៉ាគីស្ថានពីបទបានរំលោភដោយចេតនាលើបទឈប់បាញ់ចុះហត្ថលេខាក្នុងឆ្នាំ ២០០៣។ តាមកងទ័ពឥណ្ឌា កងទ័ពប៉ាគីស្ថានបានប្រើគ្រាប់កាំភ្លើងត្បាល់ និងអាវុធផ្សេងទៀតបាញ់សំដៅលើតំបន់ស៊ីវិលដោយបណ្តាលឲ្យស្លាប់ទាហានឥណ្ឌាចំនួន ៣នាក់ និងរបួសចំនួន ៣នាក់។
ចំណែកប៉ូលិសក្នុងតំបន់កាស្មៀរឥណ្ឌាបានប្រាប់ពីការស្លាប់ជនស៊ីវិលចំនួន ៣នាក់ និងរបួសធ្ងន់ ៣នាក់។ នៅខាងប៉ាគីស្ថាន ប្រមុខរដ្ឋអំណាចតំបន់កាស្មៀរប៉ាគីស្ថានលោករ៉ាហ្សា ហ្វារុគ ហាយដឺបានបញ្ជាក់ពីមានមនុស្សស្លាប់ចំនួន ៥នាក់ និងរបួសចំនួន ៣១នាក់។ « តើយើងត្រូវទទួលរងនូវការបាត់បង់យ៉ាងច្រើនបែបនេះរហូតដល់ពេលណាទៅ? » នេះជាសំណួរដែលលោកហាយដឺចោទសួរទៅកាន់នាយករដ្ឋមន្រ្តីប៉ាគីស្ថានលោកអ៊ីម រ៉ាន់ខាន់។ ដោយឡែក និងបើតាមសារព័ត៌មានឥណ្ឌា នាយករដ្ឋមន្រ្តីឥណ្ឌាលោកណារិនដ្រា ម៉ូឌីធ្វើដំណើរទៅកាន់តំបន់ព្រំដែនកាស្មៀរឥណ្ឌាក្នុងថ្ងៃសៅរ៍ ទី១៤ វិច្ឆិកាដើម្បីសួរសុខទុក្ខកងទ័ពនាឱកាសបុណ្យពន្លឺដែលជាបុណ្យសាសនាហិណ្ឌូដ៏សំខាន់ប្រចាំឆ្នាំ។ លោកម៉ូឌីតែងធ្វើដូចនេះជារៀងរាល់ឆ្នាំតាំងពីលោកឡើងកាន់អំណាចក្នុងឆ្នាំ ២០១៤។
គួររម្លឹកថា តាំងពីទទួលបានឯករាជ្យពីប្រទេសអង់គ្លេស និងការពុះចែកទឹកដីក្នុងឆ្នាំ ១៩៤៧ តំបន់កាស្មៀរក៏ត្រូវបានពុះចែកជាពីរដោយម្ខាងជារបស់ឥណ្ឌាមានឈ្មោះហ្សាមូកាស្មៀរ និងម្ខាងទៀតជារបស់ប៉ាគីស្ថានមានឈ្មោះអាហ្សាដកាស្មៀរ។ តំបន់ទាំងពីរនេះត្រូវបានខ័ណ្ឌចែកដោយខ្សែត្រួតពិនិត្យដែលក្លាយជាបន្ទាត់ព្រំដែនដោយស្វ័យប្រវត្តិមានប្រវែង ៧៤០គីឡូម៉ែត្រ។ តែឥណ្ឌា និងប៉ាគីស្ថានដែលសព្វថ្ងៃជាប្រទេសមហាអំណាចនុយក្លេអ៊ែរដូចគ្នាកំពុងបន្តទាមទារក្តោបយកតំបន់កាស្មៀរផ្តាច់មុខ។ ជម្លោះជាង ៧០ឆ្នាំមួយនេះបានរុញប្រទេសជិតខាងទាំងពីរឲ្យធ្លាក់ក្នុងសង្រ្គាមនឹងគ្នាចំនួន ២ដង និងវិះធ្លាក់លើកទី៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ