ឥណ្ឌាដាក់បម្រាមគោចរ នៅតំបន់កាស្មៀរ នៅមួយថ្ងៃមុនខួប១ឆ្នាំនៃការដកស្វ័យ័តភាពកាស្មៀរ
រដ្ឋាភិបាលឥណ្ឌាបានចាប់អនុវត្តបម្រាមគោចរ រយៈពេល ២ថ្ងៃ នៅតំបន់កាស្មៀរឥណ្ឌា ដោយគិតចាប់ពីថ្ងៃអង្គារនេះ ពោលគឺនៅមួយថ្ងៃមុនខួប១ឆ្នាំនៃការលុបចោលស្វ័យ័តភាពពិសេសរបស់តំបន់កាស្មៀរ តាមរយៈក្រិត្យប្រធានាធិបតីឥណ្ឌា។ ដោយលុបចោលស្វ័យ័តភាពពិសេស របស់កាស្មៀរ និងរឹបអូសយកតំបន់កាស្មៀរមកគ្រប់គ្រងដោយផ្ទាល់ កាលពី១ឆ្នាំមុន រដ្ឋាភិបាលឥណ្ឌារបស់លោកនាយករដ្ឋមន្រ្តីហិណ្ឌូនិយម បានសន្យាប្រែក្លាយកាស្មៀរជាឋានសួគ៌ លែងមានបញ្ហាអសន្តិសុខ ដែលបង្កឡើងដោយក្រុមទាមទារបំបែកទឹកដីអ៊ីស្លាមនិយម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:១៤
បម្រាមគោចរនៅថ្ងៃអង្គារនេះ និងនៅថ្ងៃពុធស្អែកដែលជាថ្ងៃខួប ១ឆ្នាំនៃការលុបចោលលក្ខន្តិកៈពិសេសរបស់តំបន់ស្វ័យ័តកាស្មៀរ នឹងទៅរឹតបន្តឹងវិធានការរក្សាសន្តិសុខ ដែលរដ្ឋាភិបាលឥណ្ឌាបានចាប់អនុវត្ត នៅតំបន់កាស្មៀរ ចាប់តាំងពីរដ្ឋាភិបាលបានចូលគ្រប់គ្រងដោយផ្ទាល់ តំបន់កាស្មៀរ នៅមួយឆ្នាំមកនេះ។ ទៅតាមបម្រាមគោចរ គឺមានតែឡានប៉ូលិស និងឡានពេទ្យ ដែលមានសិទ្ធិបើកចេញចូល ចំណែកប្រជាជនត្រូវស្ថិតនៅក្នុងផ្ទះ និងមានសិទ្ធិដើរចេញក្រៅ ករណីមានសំបុត្រអនុញ្ញាតពីប៉ូលិស។ តាមប៉ូលិសឥណ្ឌា រដ្ឋាភិបាលបានសម្រេចដាក់បម្រាមគោរព នៅពេលនេះ បន្ទាប់ពីទីភ្នាក់ងារស៊ើបការណ៍ សម្ងាត់ បានលើកឡើងពីគម្រោងផែនការធ្វើបាតុកម្មហិង្សា ប្រឆាំង រដ្ឋាភិបាលឥណ្ឌា នៅ ថ្ងៃទី ៥សីហា ដែលជាថ្ងៃខួប១ឆ្នាំ នៃការដកស្វ័យ័តភាពកាស្មៀរ។ សម្រាប់ប្រជាជនកាស្មៀរ ថ្ងៃទី៥សីហា ជាថ្ងៃខ្មៅងងឹត ថ្ងៃបើកឆាកដំបូង ដែលរដ្ឋាភិបាលឥណ្ឌាបានចូលរំលោភ ឈ្លានពាន លេបយកកាស្មៀរដែលធ្លាប់រស់នៅដោយសុខសប្បាយ ក្នុងនាមជាតំបន់ស្វ័យ័ត មិនស្ថិតក្រោមអំណាចរដ្ឋាភិបាលឥណ្ឌា អស់៧ទសវត្សរ៍មកហើយ។
តាំងពីយប់ថ្ងៃចន្ទ ទាហានឥណ្ឌា ចាប់ដាក់ពង្រាយ ខ្សែលួសបន្លា បិទច្រកផ្លូវសំខាន់ៗ នៅSrinagar ទីក្រុងធំជាងគេរបស់តំបន់កាស្មៀរ។ បម្រាមគោចរ រយៈពេល ២ថ្ងៃនេះ នឹងទៅដាក់បន្ទុកបន្ថែម លើប្រជាជនកាស្មៀរ ដែលកំពុងរស់នៅក្នុងស្ថានភាព រឹតត្បិត រួចទៅហើយ ដោយសារវិធានការទប់ស្កាត់ជំងឺរាតត្បាតកូវីដ។
នៅមុនបម្រាមគោចរ កាស្មៀរ មានសំបូររួចទៅហើយ រនាំងបិទសឹងគ្រប់ច្រកផ្លូវ ដែលអមដោយប៉ុស្តត្រួតពិនិត្យ របស់ទាហានឥណ្ឌា។ ក្រុមហ៊ុន ហាងទំនិញជាច្រើនត្រូវបិទទ្វារ ចំណែកប្រជាជនត្រូវហាមមិនឲ្យដើរចេញទៅក្រៅ បើសិនមិនចាំបាច់ ចាប់តាំងពីកើតមានវិបត្តិកូវីដ។
មួយឆ្នាំក្រោមការគ្រប់គ្រងរបស់រដ្ឋាភិបាលឥណ្ឌា ប្រជាជនកាស្មៀរធ្លាក់ខ្លួន កាន់តែក្រីក្រ
សម្រាប់ប្រជាជនកាស្មៀរ នៅក្នុងរយៈពេល១ឆ្នាំនៃការចូលគ្រប់គ្រងដោយផ្ទាល់ របស់រដ្ឋាភិបាលឥណ្ឌា តំបន់កាស្មៀរបានធ្លាក់ចូលទាំងស្រុង ក្នុងយុគអន្ធកាល។
នៅក្រោមគ្រប់គ្រងដោយផ្ទាល់ របស់រដ្ឋាភិបាលឥណ្ឌា ដែលជាប្រទេសប្រជាធិបតេយ្យធំជាងគេ ក្នុងលោក ប្រជាជនកាស្មៀរ ត្រូវរស់នៅក្នុងភាពភ័យខ្លាច ជាប់រហូត។ អ្នកនយោបាយមូលដ្ឋាន និងសកម្មជនសិទ្ធិមនុស្ស រាប់រយនាក់ នៅកាស្មៀរ ត្រូវទាហានឥណ្ឌាចាប់ឃាត់ខ្លួន។ ចំណែកមនុស្សរាប់ពាន់នាក់ កំពុងជាប់ក្នុងពន្ធនាគារ ដោយគ្មានការជំនុំជម្រះ ដោយសារតែពួកគេធ្វើបាតុកម្ម ឬហ៊ាននិយាយរិះគន់នយោបាយរបស់រដ្ឋាភិបាលឥណ្ឌា។
នៅក្នុងរយៈពេល៥ខែដំបូងនៃ ការចូលកាន់កាប់គ្រប់គ្រងរបស់រដ្ឋាភិបាលឥណ្ឌា ពលរដ្ឋកាស្មៀរ ត្រូវរស់នៅ កាត់ផ្តាច់ពីពិភពលោកទាំងស្រុង ដោយសារតែ រដ្ឋាភិបាលឥណ្ឌា បានកាត់ផ្តាច់អ៊ីនធ័រនែត បិទខ្ទប់រាល់បណ្តាញ ទូរស័ព្ទ។ ចាប់តាំងពីចុងខែធ្នូ រដ្ឋាភិបាលឥណ្ឌាទើបបន្ធូរបន្ថយ អនុញ្ញាតឲ្យមានបណ្តាញអ៊ីនធ័រនែត និងប្រព័ន្ធទូរស័ព្ទឡើងវិញ។ ប៉ុន្តែ សម្រាប់ មន្រ្តីសភាពាណិជ្ជកម្មកាស្មៀរ ចំណាត់ការ បិទខ្ទប់អ៊ីនធ័រនែត ក្នុងរយៈពេលដ៏វែង ដែលកាស្មៀរ មិនដែលជួបប្រទះ បានធ្វើឲ្យសេដ្ឋកិច្ចរបស់កាស្មៀរខាតបង់ ជាង ២ពាន់លានដុល្លារ និងមនុស្សជាង ៥សែននាក់បានបាត់ការងារធ្វើ។
មួយឆ្នាំមកនេះ ទោះជាកាស្មៀរ ស្ថិតនៅក្រោមការគ្រប់គ្រងដោយផ្ទាល់របស់រដ្ឋាភិបាល ឥណ្ឌា និងមានវត្តមានទាហានឥណ្ឌារាប់ម៉ឺននាក់ កាស្មៀរនៅតែជួបបញ្ហាអសន្តិសុខ ជាមួយនឹងការកើនឡើងកាន់តែខ្លាំង នៃការវាយប្រហារភេរវកម្មរបស់ក្រុមអ៊ីស្លាម ទាមទារបំបែកទឹកដី ដែលរដ្ឋាភិបាលឥណ្ឌា ចោទថា គាំទ្រដោយរដ្ឋាភិបាលប៉ាគីស្ថាន។ សម្រាប់អ្នកវិភាគ មហិច្ឆតារបស់លោកនាយករដ្ឋមន្រ្តីជាតិនិយមឥណ្ឌា ណារិនដ្រា ម៉ូឌី ដែលចូលក្រសោបគ្រប់គ្រងកាស្មៀរបានជំរុញឲ្យមានគំនិត ស្អប់ឥណ្ឌាកាន់តែខ្លាំង ក្នុងចំណោមប្រជាជនកាស្មៀរ ដែលភាគច្រើន ជាអ្នកកាន់សាសនាអ៊ីស្លាម។ យុវជនកាស្មៀរជាច្រើនបានរត់ចូលក្នុងក្រុមឧទ្ទាមបំបែកទឹកដីកាស្មៀ នៅបន្ទាប់ពីឪពុក ឬបងប្រុស ត្រូវទាហានឥណ្ឌាបាញ់សម្លាប់ ឬចាប់ឃុំខ្លួន ដោយគ្មានមូលហេតុច្បាស់លាស់។
លោកណារិនដ្រា ម៉ូឌី សន្យា ប្រែក្លាយតំបន់កាស្មៀរ ឲ្យទៅជាឋានសួគ៌ លែងមានក្រុមភេរវនិយម ក្រុមបំបែកទឹកដី ដែលបង្កប់ខ្លួន នៅកាស្មៀរ
នៅថ្ងៃទី៨ខែសីហាឆ្នាំ ២០១៩ ពោលគឺនៅប៉ុន្មានថ្ងៃក្រោយ អនុវត្តក្រិត្យប្រធានាធិបតី ដើម្បីរឹបអូស ស្វ័យ័តភាពពីតំបន់កាស្មៀរ ប្រមុខរដ្ឋាភិបាលហិណ្ឌូ ជាតិនិយម លោក ណារិនដ្រា ម៉ូឌី ធ្លាប់បានប្រកាសសន្យាប្រែក្លាយតំបន់កាស្មៀរ ឲ្យទៅជាឋានសួគ៍ មានសេដ្ឋកិច្ចរីកចម្រើន និងសង្ឃឹមលុបបំបាត់ក្រុមភេរវនិយម ក្រុមទាមទារបំបែកទឹកដី ដែលបានយាយី បង្កអសន្តិសុខ នៅកាស្មៀរ អស់៣០ឆ្នាំមកហើយ។
ប៉ុន្តែ នៅក្នុងស្ថានភាពជាក់ស្តែង អសន្តិសុខ ការវាយប្រហារភេរវកម្ម របស់ក្រុមបំបែកទឹកដីកាស្មៀរ មានតែកើនឡើង ដោយសារតែ នយោបាយរឹតបន្តឹង បិទខ្ទប់សេរីភាព ការចាប់ឃុំខ្លួន និងការបាញ់សម្លាប់មនុស្សក្រៅផ្លូវច្បាប់ ពីសំណាក់ទាហានឥណ្ឌា។
ប្រជាជនកាស្មៀរ កាន់តែច្រើនមានអារម្មណ៍ថា រដ្ឋាភិបាលឥណ្ឌា អយុត្តិធម៌ មិនយកចិត្តទុកដាក់កែលម្អ ជីវភាពរស់នៅរបស់ពួកគេ នោះទេ។ ផ្ទុយទៅវិញ គឺមានបំផ្លាញប្រយោជន៍ លេបយកបុព្វសិទ្ធិរបស់ប្រជាជនកាស្មៀរ។ ជាក់ស្តែង ជាមួយ នឹងច្បាប់ចូលគ្រប់គ្រងតំបន់កាស្មៀរ រដ្ឋាភិបាលឥណ្ឌាបានអនុញ្ញាតបើកផ្លូវឲ្យមនុស្សពីខាងក្រៅ ចូលទៅទិញដី វិនិយោគ លើអាជីវកម្មរ៉ែ នៅក្នុងតំបន់កាស្មៀរដែលធ្លាប់ជាសិទ្ធិផ្តាច់មុខរបស់ប្រជាជនរស់នៅកាស្មៀរ។ ដោយលុបចោលស្វ័យ័តភាពកាស្មៀរ រដ្ឋាភិបាលរបស់ណារិនដ្រា ម៉ូឌី មានគោលដៅ បញ្ជូនប្រជាជនឥណ្ឌា ជាពិសេស ប្រជាជនកាន់សាសនាហិណ្ឌូ ឲ្យទៅរស់នៅកាន់តែច្រើន នៅតំបន់កាស្មៀរ ដែលសំបូររស់នៅដោយប្រជាជនកាន់សាសនាអ៊ីស្លាម និងដែលមានជំហរទៅខាងប្រទេសប៉ាគីស្ថានដែលជាបងប្អូនសត្រូវរបស់ឥណ្ឌា។ ប៉ុន្តែ សម្រាប់ក្រុមសង្គមស៊ីវិល រដ្ឋាភិបាលឥណ្ឌាមិនត្រឹមតែបរាជ័យ មិនអាចធ្វើឲ្យកាស្មៀរខិតចូលជិតឥណ្ឌាតែប៉ុណ្ណោះទេ ប៉ុន្តែរដ្ឋាភិបាល កំពុងតែលេងល្បែងគ្រោះថ្នាក់ នៅពេលដែលប្រជាជនកាស្មៀរកាន់តែច្រើន លែងមានជំនឿ លើអ្នកនយោបាយឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ