កាស្មៀរ៖ ប៉ាគីស្ថានចោទឥណ្ឌាថាប្រព្រឹត្តឧក្រិដ្ឋកម្មប្រឆាំងមនុស្សជាតិ
ខួបមួយឆ្នាំនៃការក្រសោបយកតំបន់កាស្មៀរពីសំណាក់ឥណ្ឌា, នាយករដ្ឋមន្ត្រីប៉ាគីស្ថានចោទឥណ្ឌាថាបានប្រព្រឹត្តឧក្រិដ្ឋកម្មប្រឆាំងមនុស្សជាតិ។ នៅឱកាសខួបនេះ ពលរដ្ឋប៉ាគីស្ថាន បានជួបប្រជុំគ្នាដើរហែក្បួន សម្តែងសាមគ្គីភាព នៅតាមបណ្តាក្រុងធំៗជាច្រើន នៅប៉ាគីស្ថាន។ នាយករដ្ឋមន្ត្រី Imran Khan បានចុះទៅដោយផ្ទាល់ នៅតំបន់កាស្មៀរ ត្រង់ផ្នែកដែលប៉ាគីស្ថានកាន់កាប់ ហើយលោកបានដឹកនាំដង្ហែក្បួននៅទីនោះនិងបានសម្តែងមតិរិះគន់ឥណ្ឌា ថាឥណ្ឌាបង្ហាញប្រាប់ពិភពលោកបន្ថែមទៀត ថាខ្លួនជាប្រទេសដែលជិះជាន់ និងឈ្លានពានប្រទេសដទៃ។ ចំណែកថ្នាក់ដឹកនាំឥណ្ឌា លោក នរិន្ទ្រា ម៉ូឌី បានសម្ពោធចាក់គ្រឹះសាងសង់វិហារមួយ ឧទ្ទិសដល់សាសនាព្រហ្មណ៍ នៅលើបរិវេណដីនៃវិហារសាសនាអ៊ីស្លាម ដែលរឹតតែធ្វើឱ្យមានការខឹងសម្បារយ៉ាងខ្លាំង។
ចុះផ្សាយនៅថ្ងៃ៖
ស្តាប់ - ០២:០៨
វិហារឧទ្ទិសដល់សាសនាព្រហ្មណ៍ ដែលឥណ្ឌាប្រុងសាងសង់នេះ គឺលើបរិវេណដី១,១ហិកតា។ តាមក្រុមហិណ្ឌូនិយម ដីនេះជាទីកំណើតរបស់អាទិទេពរាម អវតារព្រះវិស្ណុ តែត្រូវស្តេចអ៊ីស្លាម នៅសតវត្សទី១៦ សាងសង់វិហារម៉ូស្កេអ៊ីស្លាម។ កន្លែងនេះ គឺត្រូវពួកហិណ្ឌូទាមទារសាងសង់វិហារព្រហ្មញ្ញសាសនាជាយូរមកហើយ ទើបតែសម្រេចសម្ពោធឱ្យសាងសង់ផ្លូវការ។ ការដែលនាយករដ្ឋមន្ត្រី លោក នរិន្ទ្រា ម៉ូឌី ជាអ្នកហិណ្ឌូនិយមនិងជាតិនិយមជ្រុល ជ្រើសរើសថ្ងៃសម្ពោធចាក់គ្រឹះសាងសង់ ចំដើមខែតុលានេះ គឺមិនមែនជារឿងចៃសន្យសោះឡើយ ព្រោះនេះជាខួប១ឆ្នាំនៃការក្រសោបយកតំបន់កាស្មៀរពីសំណាក់កងទ័ពឥណ្ឌា។
នៅក្នុងខួប១ឆ្នាំនេះ នាយករដ្ឋមន្ត្រី Imran Khan បានអង្អុរមុខថ្កោលទោស ឥណ្ឌាជាថ្មី ថាប្រព្រឹត្តឧក្រិដ្ឋកម្មប្រឆាំងមនុស្សជាតិ។ ទន្ទឹមនឹងនេះ ពលរដ្ឋប៉ាគីស្ថានមួយចំនួន ថែមទាំងហ៊ានប្រៀបធៀប នាយករដ្ឋមន្ត្រីឥណ្ឌា ម៉ូឌី ទៅនឹងមេដឹកនាំផ្តាច់ការ អ៊ីត្លែរ។ អ៊ីត្លែរដែលប្រុងសម្លាប់ផ្តាច់ពូជជនជាតិជ្វីហ្វ។
អ្នកជំនាញមួយចំនួន យល់ថា ឥណ្ឌាបានរៀនពីគំរូរបស់អ៊ីស្រាអែលក្នុងការធ្វើអាណានិគមកិច្ចឈ្លានពានទឹកដី របស់ពលរដ្ឋប៉ាឡេស្ទីន។ ជាក់ស្តែង មួយឆ្នាំមកនេះ អាជ្ញាធរឥណ្ឌាបានបើកដៃឱ្យពលរដ្ឋឥណ្ឌាដែលគាំទ្រលោក ម៉ូឌី បានចូលទៅទិញដីឬវាតទីយកដី នៅតំបន់កាស្មៀរនោះ យ៉ាងសម្បើមអស្ចារ្យ។ បើតាមថ្នាក់ដឹកនាំប៉ាគីស្ថាន ទង្វើនេះជាការរំលោភលើកម្មសិទ្ធិឯកជន និងជាការបំពានច្បាប់អន្តរជាតិ។
គួរជ្រាបថា កាស្មៀរ ជាតំបន់ដែនដីនៅភ្នំហិមពាន្ត (ហិមាល័យ) និងជាសំណុំបញ្ហាឈ្លោះគ្នា ដណ្តើមគ្នាកាន់កាប់រវាងឥណ្ឌានិងប៉ាគីស្ថានតាំងពីឆ្នាំ១៩៤៧មក។ ការប៉ះទង្គិចដោយអាវុធ កើតមានច្រើនលើកច្រើនសា ហើយតាំងពីការឈ្មោះទាស់គ្នា ពាក់កណ្តាលទសវត្ស១៩៨០មក គឺបណ្តាលឱ្យមនុស្សយ៉ាងហោច ៥ម៉ឺននាក់ បានស្លាប់បាត់បង់ជីវិត (តួលេខផ្លូវការ)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ