ថៃ៖កម្លាំងប៉ូលិសបង្រ្កាបបាតុករអ្នកប្រជាធិបតេយ្យដោយប្រើកាណុងបាញ់ទឹក និងគ្រាប់បែកផ្សែងបង្ហូរទឹកភ្នែក
នៅថ្ងៃអង្គារ ទី១៧ វិច្ឆិកា កម្លាំងប៉ូលិសថៃបានអន្តរាគមន៍វាយបង្រ្កាបលើហ្វូងបាតុករអ្នកប្រជាធិបតេយ្យក្នុងទីក្រុងបាងកកដោយប្រើកាណុងបាញ់ទឹក និងគ្រាប់បែបផ្សែងបង្ហូរទឹកភ្នែក។ កម្លាំងប៉ូលិសបានព្យាយាមរារាំងកុំឲ្យហ្វូងបាតុករចូលក្បែរវិមានរដ្ឋសភាដែលក្រុមអ្នកតំណាងរាស្រ្ត និងក្រុមសមាជិកព្រឹទ្ធសភាកំពុងជជែកលើកំណែទម្រង់ច្បាប់រដ្ឋធម្មនុញ្ញតាមការទាមទាររបស់ចលនាអ្នកប្រជាធិបតេយ្យ។ ស្ថានការណ៍នៅតានតឹងរហូតដល់ពេលព្រលប់ ហើយមានមនុស្សដែលរងរបួសចំនួន ១៨នាក់ត្រូវការជំនួយព្យាបាល។ ទន្ទឹមនឹងបាតុកម្មរបស់ក្រុមអ្នកប្រជាធិបតេយ្យក៏មានបាតុកម្មរបស់ក្រុមអ្នកគាំទ្ររបបរាជានិយ។
ចុះផ្សាយនៅថ្ងៃ៖
ស្តាប់ - ០២:០២
គឺដើម្បីដាក់គំនាបលើក្រុមអ្នកតំណាងរាស្រ្ត និងក្រុមសមាជិកព្រឹទ្ធសភាដែលក្រុមបាតុករអ្នកប្រជាធិបតេយ្យ និងសិស្ស និស្សិតរាប់សិបពាន់នាក់បាននាំគ្នាចុះផ្លូវធ្វើបាតុកម្មនារសៀលថ្ងៃអង្គារ ទី១៧ វិច្ឆិកា។ មានបាតុករមួយចំនួនបានព្យាយាមសម្រុកចូលវិមានរដ្ឋសភាដែលការពារដោយកម្លាំងប៉ូលិសប្រឆាំងកុបកម្ម និងមានព័ទ្ធជុំវិញដោយរបងបន្លាលួស និងផ្ទាំងថ្ម។ តែការប៉ុនប៉នរបស់ក្រុមបាតុករត្រូវបានកម្លាំងប៉ូលិសបង្រ្កាបដោយប្រើកាណុងបាញ់ទឹក និងគ្រាប់បែកផ្សែងបង្ហូរទឹកភ្នែកជាលើកទី១ គិតតាំងពីថ្ងៃផ្ទុះបាតុកម្ម។ « ចូរអស់លោកឈប់ចោទពួកយើងជាអ្នករំលោភច្បាប់ទៀតទៅ។ គឺអស់លោកជាប៉ូលិសទេតើដែលជាអ្នករំលោភច្បាប់ដោយបានធ្វើឲ្យរបួសមនុស្ស។ យើងកំពុងប្រយុទ្ធដើម្បីអនាគតមួយប្រសើរសម្រាប់ប្រទេសរបស់យើង និងសម្រាប់ទាំងអស់គ្នា។ ដូច្នេះបញ្ឈប់បាញ់ទឹកលើពួកយើងទៅ » នេះជាសម្រែករបស់មេបាតុករម្នាក់ជានិស្សិត។
នៅខាងក្នុងសភា ក្រុមអ្នកតំណាងរាស្រ្ត និងក្រុមសមាជិកព្រឹទ្ធសភាបានជជែកគ្នាដើម្បីសម្រេចថា តើសេចក្តីព្រាងវិសោធនកម្មរដ្ឋធម្មនុញ្ញនៅត្រង់ចំណុចណាខ្លះដែលត្រូវពិនិត្យ ពិចារណាដើម្បីបោះឆ្នោតអនុម័តក្នុងថ្ងៃពុធ ទី ១៨ វិច្ឆិកា។ មានសំណើមួយចំនួនត្រូវបានស្នើឡើងដោយគណបក្សប្រឆាំងមួយ និងអង្គការក្រៅរដ្ឋាភិបាលមួយ។ សំណើទាំងនោះរួមមាន ការធ្វើកំណែទម្រង់ព្រឹទ្ធសភា កំណែទម្រង់គណៈកម្មការបោះឆ្នោត និងកំណែទម្រង់តុលាការធម្មនុញ្ញដែលមានទំនោរខ្លាំងរកកងទ័ព។ ក្រុមអ្នកសង្កេតការណ៍បានមើលឃើញថា សមាជិកព្រឹទ្ធសភាទាំង ២៥០រូបដែលតែងតាំងដោយរបបសឹកមិនយល់ព្រមឲ្យកាត់បន្ថយបុព្វសិទ្ធិរបស់ខ្លួនដោយងាយៗឡើយ ហើយការប្តូររដ្ឋធម្មនុញ្ញជាយថាហេតុក៏នឹងត្រូវប្រើពេលយូរដែរ។
គួររម្លឹកថា តាំងពីប៉ុន្មានខែមកហើយដែលក្រុមបាតុករអ្នកប្រជាធិបតេយ្យ រួមទាំងសិស្ស និស្សិតបានទាមទារឲ្យនាយករដ្ឋមន្រ្តីលោកចាន់អូចាចុះចេញពីតំណែង ឲ្យធ្វើកំណែទម្រង់ច្បាប់រដ្ឋធម្មនុញ្ញ និងឲ្យធ្វើកំណែទម្រង់របបរាជានិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ