ថៃបើកប្រជុំវិសាមញ្ញសភាដើម្បីពន្លត់បាតុកម្មនិស្សិត ?
ចុះផ្សាយនៅថ្ងៃ៖
ស្តាប់ - ០៥:៤៣
សភាថៃបានបើកសម័យប្រជុំវិសាមញ្ញរយៈពេល ២ថ្ងៃ ដោយចាប់ផ្តើមពីថ្ងៃចន្ទ ទី២៦ តុលា ២០២០។ កម្មវត្ថុ គឺផ្តោតលើបាតុកម្មរបស់ចលនាអ្នកទាមទារលទ្ធិប្រជាធិបតេយ្យដែលកំពុងបន្តមានកាន់តែខ្លាំង។ សម័យប្រជុំសភាពេលនេះបានធ្វើឡើង ក្រោយពីនាយករដ្ឋមន្រ្តីលោកចាន់អូចាបដិសេធមិនចុះចេញពីតំណែង។ ទន្ទឹមនឹងការប្រជុំសភា បាតុករគាំទ្រលទ្ធិប្រជាធិបតេយ្យគ្រោងនឹងប្រមូលផ្តុំគ្នានៅមុខស្ថានទូតអាល្លឺម៉ង់ ប្រទេសដែលព្រះមហាក្សត្រថៃតែងស្នាក់នៅជាញឹកញយ។ ចំណែកបាតុករគាំទ្ររាជានិយម បានមកប្រមូលផ្តុំគ្នានៅមុខសភា ដើម្បីទាមទារកុំឱ្យសមាជិកសភាប៉ះពាល់របបរាជានិយមថៃ។
បើតាមសេចក្តីថ្លែងការណ៍របស់សភា ជំនួបប្រជុំវិសាមញ្ញ ដែលរៀបចំឡើងតាមការស្នើសុំរបស់នាយករដ្ឋមន្ត្រី ផ្តោតទៅពិសេសទៅលើបាតុកម្មរបស់ចលនាអ្នកប្រជាធិបតេយ្យដែលខុសច្បាប់ និងអំពីឥរិយាបថមិនសមហេតុផលរបស់បាតុករចំពោះរាជវង្ស នៅក្នុងអំឡុងពេលប្រមូលផ្តុំធ្វើបាតុកម្ម។
ឥរិយាបថមិនល្អនោះ គឺសំដៅលើសកម្មភាពរបស់បាតុករ កាលពីថ្ងៃទី ១៤ តុលា ដែលបានលើកម្រាមដៃបី នៅចំពោះមុខរថយន្តព្រះមហាក្សត្រីយានី និងរាជបុត្រ។ ជាកាយវិការដែលពុំធ្លាប់មានរាស្ត្រថៃណាម្នាក់ហ៊ានប្រព្រឹត្តឡើយ ពីមុនមក។ សកម្មជនប្រជាធិបតេយ្យបីនាក់ ត្រូវចាប់ខ្លួនពីបទប្រើអំពើហិង្សាប្រមាថព្រះមហាក្សត្រីយានី ដោយអាចនឹងត្រូវជាប់ពន្ធនាគារអស់មួយជីវិត។
នៅចំពោះមុខសភា ក្នុងពេលបើកអង្គប្រជុំសភាវិសាមញ្ញ លោកនាយករដ្ឋមន្ត្រីថៃ ប្រាយុទ្ធចាន់អូចា ប្រកាសទទួលស្គាល់អំពីសេចក្តីទាមទាររបស់បាតុករប្រជាធិបតេយ្យ ប៉ុន្តែរាល់ការទាមទារទាំងនោះ គ្មានក្នុងរបៀបវារៈ របស់សភានៅថ្ងៃនេះឬថ្ងៃស្អែកទេ។ ការទាមទារឱ្យសើរើរដ្ឋធម្មនុញ្ញ ធ្វើកំណែទម្រង់ (ទំនើបកម្ម) របបរាជានិយមថៃ មិនត្រូវលើកមកជជែកវែកញែកសោះហើយលោកនាយករដ្ឋមន្ត្រីក៏បានបញ្ជាក់ជាថ្មីម្តងទៀត ថាលោក មិនចុះចេញពីតំណែង ដូចអ្វីដែលបាតុករចង់ទេ និងបានប្រកាស នៅចំពោះមុខសភា មិនបណ្តោយឱ្យមានបាតុកម្មខុសច្បាប់ទៀតទេ។ តើដល់វេលាដែលរដ្ឋាភិបាលត្រូវប្រើកម្លាំងឬ ?!
ខ្លាចផ្ទុះអំពើហិង្សា
គេសង្កេតឃើញថា រហូតមកទល់ពេលនេះរដ្ឋាភិបាលថៃហាក់អត់ធ្មត់ខ្លាំងបញ្ចៀសមិនបើប្រើអំពើហិង្សាបង្ក្រាបបាតុករ ប៉ុន្តែថៃមានប្រវត្តិធ្លាក់ក្នុងវិបត្តិនយោបាយច្រើនលើកណាស់មកហើយ។ ឱ្យតែរបបរាជានិយមរងការគំរាមកំហែង អាជ្ញាធរតែងតបតវិញដោយប្រើកម្លាំង។ ឧទាហរណ៍ជាក់ស្តែង នៅឆ្នាំ១៩៧៦ បាតុករនិស្សិតរាប់សិបនាក់បានស្លាប់ក្រោមដៃកងកម្លាំងរក្សាសន្តិសុខនិងក្រុមយុទ្ធជនរាជានិយមជ្រុល។
បក្សប្រឆាំងថៃនៅក្នុងសភា គ្មានសង្ឃឹមលើសម័យប្រជុំវិញសាមញ្ញនេះថាអាចដោះស្រាយវិបត្តិបានឡើយ។ លោក Prasert Jantararuangthorng អគ្គលេខាបក្សភឿថៃដែលជាបក្សប្រឆាំងចម្បងគេនៅក្នុងសភា បានប្រកាសថា បើលោកប្រាយុទ្ធចាន់អូចា ចាកចេញតំណែងនោះ អ្វីៗនឹងត្រូវដោះស្រាយចេញ ហើយក៏គ្មានការបំផ្លាញប្រទេសឱ្យអស់ច្រើនជាងនេះដែរ។
ចំណែកអ្នកវិភាគ និងអ្នកសង្កេតការណ៍នយោបាយថៃជាច្រើន យល់ថា ការជជែកដេញដោលសភា រយៈពេល២ថ្ងៃ ក្នុងក្របខ័ណ្ឌនៃជំនួបវិសាមញ្ញនេះ នឹងត្រូវបិទបញ្ចប់ដោយគ្មានលទ្ធផលអ្វីឡើយ។ អង្គប្រជុំវិសាមញ្ញ នឹងប្រព្រឹត្តទៅដោយមានការតែការជជែកដេញដោលវាយប្រហារដោយពាក្យសម្តី និងគ្មានរកឃើញដំណោះស្រាយ ឬច្រកចេញបានទេ។ ផ្ទុយទៅវិញ ការជជែកវិសាមញ្ញនេះអាចនឹងបង្កបង្កើតឱ្យមានភាពតានតឹងកាន់តែខ្លាំងទេ។ បើតាមអ្នកសង្កេតការណ៍ ការប៉ុនប៉ងគ្រប់គ្រងសា្ថនការណ៍តាមរយៈសភា គឺគ្រាន់តែជាលេសរបស់រដ្ឋាភិបាល សម្រាប់អូសបន្លាយពេលវេលា តែប៉ុណ្ណោះ។
ជំហរព្រះមហាក្សត្រ ?
សម្រាប់ពេលនេះ គេពិតជាពិបាកនិយាយខ្លាំងណាស់ ថាតើព្រះមហាក្សត្រកំពុងដើរតួនាទីយ៉ាងណាក្នុងវិបត្តិបាតុកម្មនេះ។ តើព្រះអង្គមានទំនោរបែបមិនតឹងតែង ទើបបានជាមានបាតុកម្មរិះគន់របបរាជានិយមអាចកើតឡើងក្នុងទម្រង់ដូចសព្វថ្ងៃបាន ? ឬក៏ព្រះអង្គមានសកម្មភាពការពារនិងរក្សារដ្ឋាភិបាលរបស់លោកនាយករដ្ឋមន្ត្រីប្រាយុទ្ធចាន់អូចា។
ក្រុមអ្នកគាំទ្ររាជនិយមបំផុត ក៏បានបង្ហាញភាពប្រុងប្រយ័ត្នរបស់ខ្លួនខ្លាំងដែរ នៅចំពោះមុខព្រះមហាក្សត្រថ្មី មហា វេជ្ជរ៉ាឡុនកន ដែលតែងធ្វើដំណើរ និងស្នាក់នៅញឹកញាប់ខ្លាំង នៅអឺរ៉ុប (អាល្លឺម៉ង់)។ អ្នកខ្លះមិនពេញចិត្តតែម្តងនឹងអាក្បកិរិយារបស់ព្រះអង្គ តែព្រះអង្គនៅតែជាតំណាង អ្នកការពារនិងធានាផលប្រយោជន៍របបរាជានិយមដដែល។
ព្រះមហាក្សត្រថៃ មិនដែលធ្វើអត្ថាធិប្បាយអ្វីសោះ ចំពោះហេតុការណ៍បាតុកម្ម ដែលកំពុងកើតឡើងនេះទេ។ ផ្ទុយទៅវិញ វាជាកម្របំផុតព្រះអង្គស្រាប់តែលេចព្រះភក្តិជាសាធារណៈជាច្រើនដង នារយៈពេលប៉ុន្មានថ្ងៃចុងក្រោយនេះ ដោយគ្មានគោរពតាមពិធីការរាជវាំងឡើយ។ ព្រះមហាក្សត្រ បានចេញមកសម្តែងការកោតសរសើរបាតុករអ្នកគាំទ្ររាជានិយមថៃ ដែលនាំគ្នាលើកបដានិងកាន់រូបថតព្រះមហាក្សត្រភូមិបុល នៅចំពោះមុខបាតុករអ្នកប្រជាធិបតេយ្យថា “ក្លាហានមែន ! អរគុណ” ។ នេះបើតាមសារវីដេអូដែលមានបង្ហោះក្នុងប្រព័ន្ធសង្គមហ្វេសប៊ុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ