តៃវ៉ាន់ប្រកាសសាងសង់នាវាមុជទឹកដោយខ្លួនឯង
ប្រធានាធិបតីតៃវ៉ាន់ លោកស្រី ត្សៃ អ៊ីងវេនបានប្រកាសបើកសម្ពោធការដ្ឋានសាងសង់នាវាមុជទឹក ក្នុងស្រុក នៅថ្ងៃអង្គារនេះ នៅភាគខាងត្បូងកោះតវ៉ាន់។ ក្រោមសម្ពាធ និងការគំរាមជាអចិន្ត្រៃយ៍ របស់ប្រទេសចិន ដែលបានបញ្ជាក់ហើយថា នឹងយកតៃវ៉ាន់មកគ្រប់គ្រងវិញ ទោះត្រូវប្រើកម្លាំងយោធា តៃវ៉ាន់ ក្រោមអាណត្តិដឹកនាំរបស់លោកស្រី ប្រធានាធិបតី បានវិនិយោគជំរុញ កាន់តែខ្លាំង វិស័យការពារជាតិរបស់ខ្លួន។
ចុះផ្សាយនៅថ្ងៃ៖
នៅក្នុងពិធី សម្ពោធ ការដ្ឋានសាងសង់នាវាមុជទឹក នៅ Kaohsiung ភាគខាងត្បូងកោះតៃវ៉ាន់ លោកស្រីប្រធានាធិបតី តៃវ៉ាន់ ត្សៃ អ៊ីងវេន បាននិយាយថា តៃវ៉ាន់នឹងបង្ហាញពិភពលោកឲ្យឃើញថា តៃវ៉ាន់មានការប្តេជ្ញាចិត្តខ្ពស់ក្នុងការការពារទឹកដី ដែនអធិបតេយ្យភាពរបស់ខ្លួន។
តាមអ្នកទទួលខុសត្រូវតៃវ៉ាន់ តៃវ៉ាន់គ្រោងនឹងសាងសង់នាវាមុជទឹក ក្នុងស្រុក ឲ្យបាន៨គ្រឿង ដែលនៅក្នុងនោះ មួយគ្រឿងនឹងផលិតចប់ជាស្ថាពរ និងដាក់ឲ្យប្រើប្រាស់បាន នៅឆ្នាំ ២០២៥។ តៃវ៉ាន់សង់នាវាមុជទឹកដើម្បី បំពាក់ឲ្យកងទ័ពជើងទឹករបស់ខ្លួន ដែលកំពុងមាននាវាមុជទឹកចំនួន ៤គ្រឿង ដែលក្នុងនោះ ២គ្រឿង ជានាវាមុជទឹកផលិតនៅអាមេរិក ដែលមានវ័យចំណាស់ ៨០ឆ្នាំ។
ការដ្ឋានសាងសង់នាវាមុជទឹករបស់តៃវ៉ាន់ ជាផ្នែកមួយនៃការអភិវឌ្ឍ វិស័យឧស្សាហកម្មផលិតអាវុធ ក្នុងស្រុក ដែលតៃវ៉ាន់បានចាប់ជំរុញខ្លាំង នៅប៉ុន្មានឆ្នាំចុងក្រោយនេះ ពោលគឺនៅបន្ទាប់ពីប្រទេសចិនបានដាក់សម្ពាធលើប្រទេសជាច្រើនឲ្យឈប់លក់អាវុធឲ្យតៃវ៉ាន់។ តៃវ៉ាន់បានរីកចម្រើនខ្លាំង ខាងផ្នែកបច្ចេកវិទ្យាផលិតមីស៊ីល ហើយនិងយន្តហោះចម្បាំង ប៉ុន្តែ នៅតែចាញ់ដាច់ឆ្ងាយបើប្រៀបធៀបនឹងប្រទេសចិន ដែលមានសមត្ថភាពសាងសង់ នាវាផ្ទុកយន្តហោះចម្បាំងដ៏ធំសម្បើម នាវាមុជទឹកជាច្រើនគ្រឿងដែលដើរដោយថាមពលនុយក្លេអ៊ែរ និងមីស៊ីលជំនាន់ចុងក្រោយ Hypersonic។
នៅ ប៉ុន្មានខែមុននេះ ចិនធ្លាប់បានប្រកាសពង្រាយមីស៊ីលទំនើបថ្មី ដើម្បី ដាក់ជំនួសមីស៊ីល ដែលចិន ដាក់ពង្រាយ បែរសំដៅទៅកោះតៃវ៉ាន់។
ចិន និងតៃវ៉ាន់ បានប្រឈមមុខ តានតឹងដាក់គ្នាកាន់តែខ្លាំង ចាប់តាំងពីតៃវ៉ាន់មានលោកស្រី ត្សៃ អ៊ីងវេន ឈ្នះឆ្នោតធ្វើជាប្រធានាធិបតីតៃវ៉ាន់ នៅ ឆ្នាំ ២០១៦។ ជំហររបស់លោកស្រី ត្សៃ អ៊ីងវេន ដែលបដិសេធ មិនទទួលស្គាល់ ថា តៃវ៉ាន់ជាផ្នែកមួយរបស់ចិន បានធ្វើឲ្យលោកប្រធានាធិបតីចិន ស៊ី ជីនពីង បង្កើតនយោបាយដាក់សម្ពាធ និងគំរាមកំហែងតៃវ៉ាន់ កាន់តែខ្លាំង។ នៅមួយរយៈចុងក្រោយនេះ យន្តហោះចម្បាំងរបស់ចិនបានហោះចូលទៅក្នុងដែន អាកាសរបស់តៃវ៉ាន់ ដែលធ្វើឲ្យតៃវ៉ាន់ ត្រូវបង្ខំចិត្តធ្វើទំនើបកម្ម និងអភិវឌ្ឍ សព្វាវុធ សម្រាប់ទុកការពារខ្លួន នៅចំពោះមុខការគំរាមកំហែងរបស់មហាអំណាចចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ