ចិននឹងហាមលែងឲ្យមានសំរាមរឹងនាំចូលពីបរទេស ចាប់ពីខែមករា ឆ្នាំ២០២១
លែងចង់ធ្វើជាកន្លែងចាក់សំរាមរបស់ប្រទេសលោកខាងលិច ប្រទេសចិន បានសម្រេច កាលពីថ្ងៃសុក្រម្សិលមិញ លែងឲ្យមានសំរាម រឹង គ្រប់ប្រភេទ នាំចូលពីបរទេស ចាប់តាំង ពី ខែមករាដើមឆ្នាំក្រោយ។ នេះបើតាមការចុះផ្សាយរបស់កាសែតរដ្ឋចិន ដែលបានដកស្រង់សេចក្តីប្រកាសរួម របស់ក្រសួងបរិស្ថាន ក្រសួងពាណិជ្ជកម្មនិង អគ្គនាយកដ្ឋានពន្ធដា ចិន។ នៅមុនប្រកាស ឈប់ឲ្យគេនាំចូលសំរាមរឹងពីបរទេស រដ្ឋាភិបាលចិនបានផ្តើមនយោបាយ ៣ឆ្នាំ ដើម្បីកាត់បន្ថយ បន្តិចម្តងៗ ចំនួនសំរាមរឹង ដែលនាំចូលពីបរទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៨
ដោយហាមទាំងស្រុង លែងឲ្យគេនាំចូល សំរាមរឹងគ្រប់ប្រភេទពីបរទេស ចាប់ពីដើមឆ្នាំក្រោយ ចិនបានបិទ ទំព័រ ដែលថា ចិនជាធុងដាក់សំរាមរបស់ប្រទេសអ្នកមាន។ ប្រទេសចិនបានចាប់ផ្តើមនាំចូលសំរាមរឹងពីបរទេស តាំងពីទសវត្សរ៍ ឆ្នាំ ១៩៨០ សម្រាប់ធ្វើជាប្រភពវត្ថុធាតុដើម។ បន្តិចម្តងៗ ចិន បានក្លាយជាប្រទេសធំជាងគេក្នុងពិភពលោក ខាងនាំចូលសំរាមរឹង គ្រប់ប្រភេទ ពី បរទេស។ សំរាមរបស់ក្រុមប្រទេសអ្នកមាន ភាគច្រើនត្រូវ ដឹកនាំចូលទៅបណ្តាប្រទេសអាស៊ី ជាទី ដែលក្រុមហ៊ុនក្នុងស្រុក បានទិញបន្តយកទៅ សំអាត កែច្នៃ ប្រែក្លាយជាវត្ថុធាតុសម្រាប់វិស័យឧស្សាហកម្ម។
ប៉ុន្តែ នៅ១០ឆ្នាំចុងក្រោយនេះ ប្រទេសចិនបានផ្លាស់ប្តូរ មុខមាត់ ជាមហាអំណាចសេដ្ឋកិច្ច ពិភពលោកទី២ ក្រោយអាមេរិក និងលែងចង់ធ្វើកន្លែងចាក់សំរាមរបស់ប្រទេសអ្នកមានតទៅទៀត។ នៅឆ្នាំ ២០១៧ រដ្ឋាភិបាលចិនបានប្រកាស គោលនយោបាយកាត់បន្ថយ ការនាំចូលសំរាមរឹងពីបរទេស នៅក្នុងហេតុផលការពារបរិស្ថាន និង សុខភាពរបស់ប្រជាជនចិន។ នៅ ដើមឆ្នាំ ២០១៨ ចិនសម្រេចបិទទ្វារ មិនទទួលយកសំរាមរឹងពីបរទេស ចំនួន ២៤ប្រភេទ។ នៅប៉ុន្មានខែមកនេះ ចិនបានបង្កើនមុខសំរាមបន្ថែមទៀត ដែលត្រូវហាមឃាត់មិនឲ្យនាំចូល ដែលមានដូចជាសំរាមប្លាស្ទីក ក្រដាសដែក និងសំរាមឈើជាដើម។
តាមការចុះផ្សាយរបស់ទីភ្នាក់ងារព័ត៌មានស៊ីនហួរ សំរាមរឹង នាំចូល ពីបរទេស បានថយចុះ ពាក់កណ្តាល ពីជាង ២២លានតោន មកនៅត្រឹម ១៣លានតោននៅឆ្នាំ ២០១៨។ នៅក្នុងរយៈពេល ១០ខែ ឆ្នាំនេះ ការនាំចូលសំរាមពីបរទេសបានធ្លាក់ចុះ អស់ ៤២%។
គ្មានប្រទេសណាមួយ ដែលចង់ក្លាយជាធុងសំរាម សម្រាប់ ដាក់សំណល់សំរាមរបស់អ្នកដទៃនោះទេ។ ចិនបានបិទទ្វារ លែងទទួលយកសំរាមរឹងចូលទឹកដីរបស់ខ្លួន បានធ្វើឲ្យក្រុមប្រទេសអ្នកមាន ជាពិសេស អាមេរិក និងបណ្តាប្រទេសនៅអឺរ៉ុប ភ័យស្លន់ស្លោរ ជួបវិបត្តិគ្មានកន្លែងស្តុកទុកដាក់។ សំរាមប្លាស្ទិក ក្រដាសត្រូវកកផ្តុំជាច្រើនកន្លែង នៅប្រទេសដើម ចំណែកក្រុមហ៊ុនក្នុងស្រុកចិន ដែលធ្វើជំនួញ លើការកែច្នៃសំរាមនាំចូលពីបរទេស ក៏ត្រូវខាតបង់ ដួលរលំ ដោយសារតែវិធានការហាមប្រាមរបស់រដ្ឋាភិបាល។
នៅក្រោយ ចិនប្រកាសបិទទ្វារ គេសង្កេតឃើញ ឥរិយាបទពីរកើតឡើង។ ទី១ អាមេរិក និងបណ្តាប្រទេសអ្នកមាន ជាច្រើនបានបែរទិស ទៅរកកន្លែងចាក់សំរាមផ្សេង នៅប្រទេសអាស៊ីផ្សេងទៀត ដូចជា ម៉ាឡេស៊ី ថៃ និងកម្ពុជាជាដើម ដែលបានក្លាយ គោលដៅបណ្តោះអាសន្ន និងមានកំណត់ បើប្រៀបធៀបនឹងប្រទេសចិន។ ឥណ្ឌាក៏កំពុងក្លាយជាគោលដៅថ្មីរបស់សំរាមរឹងបរទេស។ ទី២ រដ្ឋាភិបាលរបស់ប្រទេសអឺរ៉ុបមួយចំនួន បានចាប់ផ្តើមវិនិយោគលើរោងចក្រកែច្នៃសំរាមក្នុងស្រុក។ ប៉ុន្តែ បញ្ហាចោទនៅត្រង់ថា ផលិតផលដែលកើតចេញពីសំរាមកែច្នៃ ដែលត្រូវការបច្ចេកវិទ្យាខ្ពស់ លក់ក្នុងតម្លៃថ្លៃ ដែលពិបាកប្រកួតប្រជែងនឹងផលិតផលដែលកើតចេញពីវត្ថុធាតុដើម ពីធម្មជាតិ ដូចជាប្រេងជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ