ចិនប្រកាសឈប់នាំចូលសំរាម ប្រភេទមួយចំនួន ដើម្បីការពារបរិស្ថានខ្លួន
រដ្ឋាភិបាលចិន ទើបបានប្រកាសថា គេនឹងកាត់បន្ថយ ឬបញ្ឈប់ការនាំចូលសំរាម ប្រភេទមួយចំនួន ដែលត្រូវគេបញ្ជូនយកមក កែច្នៃធ្វើជាវត្ថុធាតុដើម ឡើងវិញ នៅក្នុងប្រទេសចិន។ ការប្រកាសនេះ គឺដើម្បីឆ្លើយតបទៅនឹងគោលនយោបាយថ្មី របស់រដ្ឋាភិបាលចិន ដែលចង់កាត់បន្ថយបន្តិចម្តងៗ នូវឧស្សាហកម្មកែច្នៃសំរាម នាំចូលពីបរទេស ដែលជាទូទៅ សុទ្ធតែលាយឡំ ជាមួយនឹងកាកសំណល់ មានជាតិពុល ហើយដែល សំរាមទាំងនោះ បានបំពុលបរិស្ថាន យ៉ាងធ្ងន់ធ្ងរក្នុងប្រទេសចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ចិនមិនចង់ធ្វើជាទីចាក់សំរាម របស់ពិភពលោកទៀតឡើយ។ នេះជាការប្រកាសរបស់រដ្ឋមន្ត្រីក្រសួងបរិស្ថានចិន។ ក្រសួងបរិស្ថានចិន បានផ្ញើរលិខិតមួយទៅកាន់ អង្គការពាណិជ្ជកម្មអន្តរជាតិ ដើម្បីជូនដំណឹង ថា ចាប់ពីខែ កញ្ញា ខាងមុខនេះ ចិននឹងបិទមិនឲ្យនាំចូលទៅក្នុងប្រទេសខ្លួន នូវសំរាម ឬកាកសំណល់រឹង ចំនួន២៤ប្រភេទ។ ក្នុងនោះ មានជាអាទិ៍ សំរាមប្លាស្ទិកមួយចំនួន ក្រដាស និងក្រណាត់ជាដើម។
យោងតាមការផ្សាយរបស់ទីភ្នាក់ងារ ព័ត៌មានស៊ីនហ័រ បានឲ្យដឹងថា ក្រសួងបរិស្ថានចិន បានលើកឡើងថា សំរាម ឬកាកសំណល់ ដែលត្រូវបាននាំចូលមកចិន ភាគច្រើនមានគុណភាពអន់ ពោលគឺពុំបានសំអាត និងបែងចែកឲ្យបានត្រឹមត្រូវទេ ដែលជាទូទៅសំរាមទាំងនោះ មានភ្ជាប់មកជាមួយ នូវកាកសំណល់ ឬសារធាតុពុល ដ៏គ្រោះថ្នាក់។ សារធាតុពុល ទាំងនោះ បានបង្កមហន្តរាយយ៉ាងធ្ងន់ធ្ងរ ដល់បរិស្ថានរបស់ចិន។ ក្នុងន័យនេះ ចិនចង់ឲ្យសំរាមដែលត្រូវគេនាំចូលក្នុងប្រទេសខ្លួន មានគុណភាពល្អប្រសើរជាងមុន ហើយផ្តល់អាទិភាពដល់ការធ្វើទំនើបកម្មនៃវិស័យកែច្នៃសំរាម ឲ្យបានស្អាតស្អំ។
សូមរំលឹកថា ចិនគឺជាប្រទេសធំជាងគេបង្អស់ ដែលនាំចូលសំរាម ដើម្បីកែច្នៃផលិតជាវត្ថុធាតុដើមឡើងវិញ។ ឆ្នាំ២០១៥ ចិនបាននាំចូលសំរាមរឹង សរុប ប្រមាណជិត៥០លានតោន។ ឧស្សាហកម្មនេះ បានជួយទ្រទ្រង់សេដ្ឋកិច្ចចិន តែទន្ទឹមនឹងនេះ វាបានបំពុលបរិស្ថានយ៉ាងខ្លាំង តាមរយៈការបញ្ចេញចោល នូវសារធាតុគីមី ជាតិពុលទៅក្នុងដី ទៅក្នុងទឹក និងក្នុងបរិយាកាស។
ការសម្រេចរបស់ចិននេះ បានធ្វើឲ្យរញ្ជួយ ទីផ្សារឧស្សាហកម្មកែច្នៃសំរាមទូទាំងពិភពលោក។ សហរដ្ឋអាមេរិក គឺជាអ្នកនាំចេញសំរាមច្រើនជាងគេបង្អស់ ដែលមានប្រមាណ ៤២,៨លានតោន ក្នុងឆ្នាំ២០១៥ គិតជាទឹកប្រាក់ស្មើនឹង ២៣,៧ពាន់លានដុល្លារ។ ចំណែក៥០% នៃសំរាមនៅសហភាពអឺរ៉ុប គឺនាំចេញទៅចិនទាំងអស់ គិតជាទឹកប្រាក់ប្រមាណ៥,៦ពាន់លានដុល្លារ។ ការបិទខ្ទប់ទីផ្សារចិននេះ អាចនឹងធ្វើឲ្យចាល់ ដល់បរិមាណស្តុកសំរាម នៅតាមប្រទេសដើម ព្រោះប្រទេសដើម នៅមិនទាន់មានលទ្ធភាព អាចកែច្នៃសំរាម ក្នុងបរិមាណដ៏ច្រើនលើសលប់បែបនេះបាននៅឡើយទេ។ មួយវិញទៀត វាអាចនឹងធ្វើឲ្យតម្លៃវត្ថុធាតុដើម ដែលបានមកពីសម្រាមកែច្នៃ ធ្លាក់ចុះជាក់ជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ