របាយការណ៍ថ្មីមួយថាការប្រែប្រួលអាកាសធាតុជំរុញឲ្យមានគ្រោះមហន្តរាយធម្មជាតិកាន់តែច្រើន
គ្រោះមហន្តរាយធម្មជាតិដែលបង្កឡើងដោយការប្រែប្រួលអាកាសធាតុក្នុងឆ្នាំ ២០២០នេះ បានបង្កឲ្យខាតបង់ផ្នែកសេដ្ឋកិច្ចក្នុងតម្លៃរហូតដល់ ១៥០ ពាន់លានដុល្លារ។ យោងតាមរបាយការណ៍ថ្មីមួយដែលចេញផ្សាយនៅថ្ងៃចន្ទនេះ ទឹកប្រាក់តម្លៃ ១៥០ ពាន់លានដុល្លារ ជាតួលេខដែលកើនលើសពីឆ្នាំ ២០១៩ និងឆ្លុះបញ្ចាំងពីផលប៉ះពាល់រយៈពេលវែងពីការកើនឡើងកម្តៅនៃភពផែនដី។
ចុះផ្សាយនៅថ្ងៃ៖
ស្តាប់ - ០២:១៩
មនុស្សយ៉ាងតិច ៣ ៥០០ នាក់បានស្លាប់ និងមនុស្សជាង ១៣ លាន ៥ សែននាក់ផ្សេងទៀតត្រូវគេជម្លៀសចេញពីផ្ទះសម្បែងដោយសារតែគ្រោះមហន្តរាយធម្មជាតិដ៏កាចសាហាវនៅក្នុងឆ្នាំ ២០២០នេះ។
គ្រោះមហន្តរាយធម្មជាតិធ្ងន់ធ្ងរមានតាំងពីភ្លើងឆេះព្រៃដែលមិនអាចគ្រប់គ្រងបាននៅក្នុង ប្រទេសអូស្រ្តាលីកាលពីចុងឆ្នាំ ២០១៩ ដល់ដើមឆ្នាំ ២០២០ ខ្យល់ព្យុះសង្ឃរាកើតឡើងជាច្រើនលើកច្រើនសារហូតដល់ខែវិច្ឆិកា។
ការខាតបង់ភាគច្រើនគ្មានការធានារ៉ាប់រងឡើយ ដូច្នេះថ្លៃចំណាយពិតប្រាកដទៅលើគ្រោះមហន្តរាយដែលបង្កឡើងដោយការប្រែប្រួលអាកាសធាតុនៅឆ្នាំនេះ ពិតជាខ្ពស់ខ្លាំងណាស់ ត្រូវខាតបង់ប្រាក់កាក់ច្រើនមែនទែន។
វាគ្មានអ្វីគួរឲ្យភ្ញាក់ផ្អើលទេដែលបន្ទុកធានារ៉ាប់រងត្រូវបានកាត់បន្ថយយ៉ាងច្រើនសម្រាប់បណ្តាប្រទេសក្រីក្រ។ នេះបើតាមរបាយការណ៍ប្រចាំឆ្នាំមួយរបស់អង្គការជំនួយពិភពលោក Christian Aid ដែលមានចំណងជើងថា “ថ្លៃចំណាយលើការខាតបង់ក្នុងឆ្នាំ ២០២០ ដែលជាឆ្នាំដួលរលំនៃអាកាសធាតុ”។
នៅក្នុងការស្ទង់មតិមួយរបស់កាសែត Lancet កាលពីខែវិច្ឆិកា របាយការណ៍មួយបានលើកឡើងថានៅក្នុងប្រទេសដែលមានប្រាក់ចំណូលខ្ពស់ ការខាតបង់ផ្នែកសេដ្ឋកិច្ចបង្កឡើងដោយអាកាសធាតុមានត្រឹមតែ ៤% ប៉ុណ្ណោះ។ ចំណែកនៅក្នុងក្រុមប្រទេសដែលមានប្រាក់ចំណូលទាបវិញ ការធានារ៉ាប់រងគឺគ្មានហើយការខាតបង់ផ្នែកសេដ្ឋកិច្ចមានទំហំធំរហូតដល់ទៅ ៦០% ឯណោះ។
“បញ្ហាប្រែប្រួលអាកាសធាតុចេះតែបន្តកើនឡើងនៅឆ្នាំ ២០២០នេះ ដោយមានទឹកជំនន់កាន់តែច្រើននៅអាស៊ី វត្តមានសត្វកណ្តូបដ៏ច្រើននៅទ្វីបអាហ្វ្រិក និងព្យុះសង្ឃរានៅអឺរ៉ុប ព្រមទាំងអាមេរិក”។ នេះ គឺជាប្រសាសន៍របស់លោកខេធ គ្រេមឺរ (Cat Kramer) ប្រធានផ្នែកគោលនយោបាយអាកាសធាតុរបស់អង្គការ Christian Aid។
តាមពិតទៅ គ្រោះមហន្តរាយធម្មជាតិធ្ងន់ធ្ងរ បានតាមញាំញីជីវិតរស់នៅរបស់មនុស្សជាតិតាំងពីយូរយារមកហើយ មុនពេលដែលកំដៅផែនដីចាប់ផ្តើមរំខានដល់បរិស្ថានធម្មជាតិទៅទៀត។
ក៏ប៉ុន្តែ ទិន្នន័យស្តីពីសីតុណ្ហភាព ជំនន់ទឹកភ្លៀង ខ្យល់ព្យុះ និងការកើនឡើងនៃកម្ពស់ទឹក សមុទ្រ ជាងមួយសតវត្សរ៍កន្លងមកនេះ បង្ហាញយ៉ាងច្បាស់ថាបញ្ហាប្រែប្រួលអាកាសធាតុកំពុងតែពង្រីកឥទ្ធិពលរបស់ខ្លួនគួរឲ្យព្រួយបារម្ភជាទីបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ