អង្គការសហប្រជាជាតិ៖ គ្រោះមហន្តរាយធម្មជាតិកើនឡើងខ្លាំង ក្នុងរយៈពេល២០ឆ្នាំមកនេះ
ទឹកជំនន់ទឹកភ្លៀង ខ្យល់ព្យុះសង្ឃរា គ្រោះរញ្ជួយដី ភ្លើងឆេះព្រៃ ដោយសារអាកាសធាតុក្តៅខ្លាំង។ គ្រោះមហន្តរជាតិទាំងអស់នេះ បានកើនក្នុងចំនួនដ៏ច្រើន និងគួរឲ្យព្រួយបារម្ភ ក្នុងរយៈពេល ២០ឆ្នាំចុងក្រោយនេះ។ របាយការណ៍របស់អង្គការសហប្រជាជាតិ ចេញផ្សាយ កាលពីថ្ងៃចន្ទ ម្សិលមិញ បានបង្ហាញថា គ្រោះមហន្តរាយធម្មជាតិ បានសម្លាប់ជីវិតមនុស្ស ច្រើនជាង ១លាននាក់ និងធ្វើឲ្យគេខាតបង់ថវិកាជិត ៣០០ម៉ឺនលានដុល្លារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
របាយការណ៍របស់អង្គការសហប្រជាជាតិបង្ហាញ ពី ការខាតបង់ ទាំងជីវិតមនុស្ស និងផ្នែកសេដ្ឋកិច្ច ដោយសារតែ គ្រោះមហន្តរាយធម្មជាតិ ដែល អាចជាលទ្ធផលនៃការប្រែប្រួលអាកាសធាតុ។ អង្គការសហប្រជាជាតិចេញផ្សាយរបាយការណ៍បូកសរុបគ្រោះមហន្តរាយធម្មជាតិ នៅតែមួយថ្ងៃមុនទិវាអន្តរជាតិ នៃការកាត់បន្ថយការប្រឈមនឹងគ្រោះធម្មជាតិ។
ជារួម ក្នុង រយៈពេល ២០ឆ្នាំ ចុងក្រោយនេះ (២០០០ ដល់២០១៩) អង្គការសហប្រជាជាតិកត់ត្រា ឃើញមានគ្រោះមហន្តរាយធំៗ ប្រមាណ ៧៣៤៨ នៅក្នុងពិភពលោក ដែលសម្លាប់មនុស្សជាង ១លាន ២សែននាក់ ប៉ះពាល់ ដល់មនុស្ស ជាង ៤ពាន់លាននាក់ និងបង្កការខូចខាតផ្នែកសេដ្ឋកិច្ច ក្នុងរង្វង់ប្រាក់ ២៩៧ម៉ឺន លានដុល្លារ។
អាស៊ី ជាតំបន់រងគ្រោះខ្លាំងជាង គេដោយសារគ្រោះមហន្តរាយធម្មជាតិ ដោយនាំមុខ ទ្វីបអាមេរិក និងអាហ្វ្រិក។ នៅក្នុងចំណោមប្រទេស១០ដែលរងគ្រោះធ្ងន់ធ្ងរ ដោយសារគ្រោះធម្មជាតិ មាន ៨ហើយជាប្រទេសអាស៊ី។ នៅក្នុងរយៈពេល ២០ឆ្នាំមកនេះ ចិននាំមុខ ខាងជួបគ្រោះមហន្តរាយធម្មជាតិ ប្រមាណ៥៧៧ ចំណែកអាមេរិកមាន ៤៦៧ ដង។ នៅក្រោយអាមេរិក គឺឥណ្ឌា ហ្វីលីពីន និងបន្ទាប់មកឥណ្ឌូណេស៊ី ដែលឧស្សាហ៍រងគ្រោះដោយសារការផ្ទុះភ្នំភ្លើង និងគ្រោះរញ្ជួយដី។
តាមរបាយការណ៍របស់អង្គការសហប្រជាជាតិ គ្រោះទឹកជំនន់ទឹកភ្លៀង បានកើនឡើងគួរឲ្យកត់សំគាល់ គឺកើនឡើង ទ្វេដង រហូតដល់ចំនួន ៣២៥៤ ទឹកជំនន់។ ក្រៅតែពីទឹកជំនន់ អាកាសធាតុត្រជាក់ ឬក្តៅ ខ្លាំង ហើយនិងអគ្គិភ័យ ដូចជាភ្លើងឆេះព្រៃ ក៏បង្កការខូចខាតច្រើនណាស់ដែរ។ ប៉ុន្តែ នៅពេលទឹកជំនន់កើនឡើង ទ្វេដង ក្នុងរយៈពេល២០ឆ្នាំនេះ គឺ បាតុភូតធម្មជាតិ ដូចជា គ្រោះរញ្ជួយដី រលកយក្សស៊ូណាមី និងផ្ទុះភ្នំភ្លើង ដែលសម្លាប់មនុស្សច្រើនជាង គេ។ រលកយក្សស៊ូណាមី នៅមហាសមុទ្រឥណ្ឌា កាលពីឆ្នាំ ២០០៤ បានសម្លាប់មនុស្សច្រើនជាងគេ ដល់ទៅ ជាង ២សែន ៥ម៉ឺននាក់។
“មនុស្សកាន់តែច្រើន ជាពិសេសនៅក្នុងបណ្តាប្រទេសក្រីក្រ រងគ្រោះដោយសារ គ្រោះមហន្តរាយធម្មជាតិ ដែលអាចបង្កឡើងដោយការប្រែប្រួលអាកាសធាតុ។ ប់សិន បាតុភូតធម្មជាតិ នៅតែបន្ត យ៉ាងដូច្នេះ ក្នុងរយៈពេល ២០ឆ្នាំទៅមុខ នោះ អនាគតមនុស្សជាតិ នឹងអាចធ្លាក់ក្នុងភាពអន្ធការ” នេះជាការព្រមានរបស់អ្នកជំនាញរបស់អង្គការសហប្រជាជាតិ លោក Debarati Guha_Sapir ដែលធ្វើការនៅ មជ្ឈមណ្ឌល ស្រាវជ្រាវការរាតត្បាតនៃគ្រោះមហន្តរាយធម្មជាតិ របស់សកលវិទ្យាល័យLouvain ក្នុងប្រទេសបែលហ្ស៊ិក។
សម្រាប់អ្នកតំណាងពិសេសរបស់អគ្គលេខាធិការអង្គការប្រជាជាតិ ដោយសារតែ រលកកំដៅ នឹងក្លាយជាបាតុភូតធម្មជាតិ ដែលនឹងកើតឡើង ញឹកញយ នៅក្នុងរយៈពេល ១០ឆ្នាំទៅមុខ រដ្ឋាភិបាល គួរតែវិនិយោគ ឲ្យបានច្រើនលើប្រព័ន្ធ ទាញសញ្ញា ប្រកាសអាសន្ន ហើយនិងអនុវត្តយុទ្ធសាស្រ្តកាត់បន្ថយការប្រឈម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ