ពិភពលោកខាតបង់ ១៨៧ពាន់លានដុល្លា ដោយសាររគ្រោះមហន្តរាយធម្មជាតិ
ការខាតបង់ផ្នែកសេដ្ឋកិច្ច ដោយសារគ្រោះមហន្តរាយធម្មជាតិ និងគ្រោះមហន្តរាយបង្កឡើងដោយមនុស្ស មានតម្លៃប្រាក់ ១៨៧ ពាន់លានដុល្លារ គឺកើនឡើង ២៥% ចាប់ពីឆ្នាំ ២០១៩ ដល់ឆ្នាំ២០២០។ នេះបើតាមការវាយតម្លៃបឋមរបស់ក្រុមហ៊ុនធានារ៉ាប់រងបន្ត ស្វ៊ីស ឈ្មោះ Swiss Re កាលពីថ្ងៃអង្គារ ទី ១៥ធ្នូ។ ក្រុមហ៊ុនធានារ៉ាប់រងបន្ត បានព្រមានពីផលវិបាក និងការខាតបង់សេដ្ឋកិច្ចកាន់តែច្រើន ទៅថ្ងៃអនាគត ព្រោះថា គ្រោះមហន្តរាយធម្មជាតិ នឹងមានកាន់តែច្រើន ដោយសារតែការប្រែប្រួលអាកាសធាតុលើផែនដី។
ចុះផ្សាយនៅថ្ងៃ៖
ស្តាប់ - ០២:៥៥
១៧៥ពាន់លានដុល្លារ ជាទំហំសេដ្ឋកិច្ចខាតបង់ នៅក្នុងពិភពលោក ដោយសារគ្រោះមហន្តរាយធម្មជាតិ នៅក្នុងឆ្នាំ ២០២០។ ចំណែក ការខាតបង់ ដោយសារគ្រោះមហន្តរាយ ដែលជាស្នាដៃរបស់មនុស្ស មានប្រមាណតែ ១២ពាន់ដុល្លារតែប៉ុណ្ណោះ។ ការនេះធ្វើឲ្យតម្លៃខាតបង់សេដ្ឋកិច្ចដោយសារគ្រោះមហន្តរាយធម្មជាតិ បានកើនឡើង ប្រមាណ ២៥% បើប្រៀបធៀបនឹងឆ្នាំ ២០១៩ ដែលមានត្រឹម ១៣៩ពាន់លានដុល្លារ។
ជាលទ្ធផល ក្រុមហ៊ុនធានារ៉ាប់រង ដែលត្រូវទទួលបន្ទុក ចេញសងលើថ្លៃខូចខាត តិចជាង ៥០%នៃការខាតបង់សរុប បានបញ្ចេញប្រាក់ប្រមាណ ៨៣ពាន់លានដុល្លារ សម្រាប់បង់សងការខូចខាត ដោយសារគ្រោះមហន្តរាយធម្មជាតិនៅ ឆ្នាំ ២០២០នេះ។ បើតាមរបាយការណ៍វាយតម្លៃរបស់ក្រុមហ៊ុនធានារ៉ាប់រងបន្តSwiss Re ២០២០ ជាឆ្នាំទី៥ហើយ ដែលក្រុមហ៊ុនធានារ៉ាប់រង ត្រូវបង់សង ការខូចខាត ក្នុងទំហំទឹកប្រាក់ដ៏ច្រើន ដោយសារគ្រោះមហន្តរាយធម្មជាតិ។
នៅអាមេរិក ការខាតបង់ ដោយសារ ខ្យល់ព្យុះ ភ្លើងឆេះព្រៃ និងគ្រោះទឹកជំនន់ មានតម្លៃស្មើនឹង៧០ភាគរយនៃការខាតបង់សរុប ដោយសារ គ្រោះធម្មជាតិ ដែលមានតម្លៃ ប្រមាណ៧៦ពាន់លានដុល្លារ។
សម្រាប់លោក Jean Hagegeli ដែលជាប្រធានក្រុមសេដ្ឋកិច្ចវិទូ ប្រចាំក្រុមហ៊ុនធានារ៉ាប់រងបន្ត Swiss Re ជំងឺកូវីដ ហើយនិងគ្រោះមហន្តរាយធម្មជាតិ ជាវិញ្ញាសារសម្រាប់តេស្តសាកល្បង ភាពរឹងមាំ របស់ពិភពលោកសព្វថ្ងៃ។ ប៉ុន្តែ នៅពេលជំងឺកូវីដ អាចសាបរលាប បាត់មុខ ទៅវិញ នៅថ្ងៃណាមួយ គ្រោះមហន្តរាយធម្មជាតិ ដែលជាលទ្ធផលនៃការប្រែប្រួលអាកាសធាតុ នៅតែបន្តមាន និងអាចកើនកម្លាំងច្រើនជាងនេះ។ អ្នកជំនាញរបស់ក្រុមហ៊ុនធានារ៉ាប់រងព្រមានដែរថា បរាជ័យរបស់ពិភពលោកក្នុងការបង្កើតសេដ្ឋកិច្ចបៃតង ដើម្បីទប់ស្កាត់ការបញ្ចេញឧស្ម័នផ្ទះកញ្ចក់ នឹងធ្វើសង្គមសេដ្ឋកិច្ច ពិភពលោក កាន់តែខាតបង់ខ្លាំង នៅថ្ងៃអនាគត។
ជាក់ស្តែង នៅឆ្នាំនេះ អាមេរិកបានរងគ្រោះដោយសារខ្យល់ព្យុះធំៗ ដល់ទៅ ៣០ដង ក្នុងរយៈពេល១ឆ្នាំ ដែលនៅក្នុងនោះ ខ្យល់ព្យុះ ទឹកជំនន់បានបង្កឲ្យមានគ្រោះរលំបាក់ដី៥ដង។ ប៉ុន្តែ ដោយសារតែគ្រោះរលំបាក់ដី កើតមាននៅតាមទីជនបទ មិនមែនទីក្រុងប្រជុំជន ការខាតបង់ សេដ្ឋកិច្ច ក៏មិនសូវមានច្រើនដែរ។ ឆ្នាំនេះ ក្រុមហ៊ុនធានារ៉ាប់រងខាតបង់ប្រមាណ ២០ពាន់លានដុល្លារ សម្រាប់សងថ្លៃខាតបង់ដោយសារខ្យល់ព្យុះ នៅអាមេរិក។
ប៉ុន្តែ នៅ ឆ្នាំ ២០២១ លក្ខខណ្ឌអាកាសធាតុ នៅអាមេរិកបានធ្វើឲ្យគេវាយតម្លៃថា ខ្យល់ព្យុះសង្ឃរា នឹងអាចកំណាច មានច្រើន ជាងឆ្នាំនេះ ដែលនឹងធ្វើឲ្យលទ្ធភាពមានគ្រោះមហន្តរាយ រលំបាក់ដី បំផ្លាញផ្ទះ ទ្រព្យសម្បត្តិរបស់មនុស្សមានច្រើន។ បូករួមជាផលវិបាកសេដ្ឋកិច្ច ដែលបង្កដោយ វិបត្តិកូវីដ គ្រោះមហន្តរាយធម្មជាតិ ដែលមានកាន់តែច្រើន ដោយសារការប្រែប្រួលអាកាសធាតុ នឹងធ្វើឲ្យក្រុមហ៊ុនធានារ៉ាប់រង កាន់តែខាត ងាយនឹងរលាយឡុងចុង នៅថ្ងៃអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ