លោកគីម ជុងអ៊ុននៅតែចាត់ទុកអាមេរិក ជាសត្រូវធំបំផុតរបស់កូរ៉េខាងជើង
មេដឹកនាំកូរ៉េខាងជើង លោកគីម ជុងអ៊ុន បាន និយាយថា អាមេរិកគឺជាសត្រូវធំបំផុតរបស់កូរ៉េខាងជើង។ សម្រាប់មេដឹកនាំកូរ៉េខាងជើង ទោះជាមានការផ្លាស់ប្តូរថ្នាក់ដឹកនាំ នៅអាមេរិក ប៉ុន្តែ ធម្មជាតិនយោបាយប្រឆាំងកូរ៉េខាងជើងរបស់អាមេរិក មិនផ្លាស់ប្តូរនោះទេ។ ថ្លែងនៅក្នុងមហាសន្និបាតគណបក្សពលករ កូរ៉េខាងជើង ដែលបានបិទបញ្ចប់ កាលពីថ្ងៃសុក្រម្សិលមិញ លោកគីម ជុងអ៊ុនបានថ្លែងផងដែរថា ប្រទេសរបស់លោកបានចាប់ផ្តើមផែនការ ផលិតនាវាមុជទឹក នុយក្លេអ៊ែរ ហើយនិងបច្ចេកវិទ្យាយោធាផ្សេងទៀត។
ចុះផ្សាយនៅថ្ងៃ៖
ស្តាប់ - ០២:៤៧
នៅ២សប្តាហ៍ ទៀត លោក ចូ បៃដិន នឹងស្បថចូលកាន់តំណែងជាប្រធានាធិបតី ទី៤៦របស់សហរដ្ឋអាមេរិក។ ប៉ុន្តែ មេដឹកនាំកូរ៉េខាងជើង បានថ្លែងសារ អរិភាពរួចទៅហើយ សម្រាប់អនាគត រដ្ឋបាលអាមេរិកថ្មី ដោយបញ្ជាក់ថា អាមេរិកជាសត្រូវធំបំផុតរបស់កូរ៉េខាងជើង។
សម្រាប់លោកគីម ជុងអ៊ុន មិនថា អ្នកណាជាកាន់អំណាចនៅអាមេរិក ធម្មជាតិនយោបាយប្រឆាំងនឹងកូរ៉េខាងជើង នឹងមិនផ្លាស់ប្តូរ។ ដូច្នេះ កូរ៉េខាងជើងគួរតែផ្តោត និងអភិវឌ្ឍខ្លួន ដើម្បីធ្វើវិទ្ធង្សាប្រឆាំងអាមេរិក ដែលជាឧបសគ្គធំ សម្រាប់ បដិវត្តន៍កូរ៉េខាងជើង។ នេះជាប្រសាសន៍របស់មេដឹកនាំកូរ៉េខាងជើង លោកគីមជុងអ៊ុន ដែលទីភ្នាក់ងារ ព័ត៌មានរដ្ឋ KCNA បានដកស្រង់ យកមកចុះផ្សាយ នៅថ្ងៃនេះ។
ជាការពិត អាមេរិក និងកូរ៉េខាងជើង មិនដែលមានទំនាក់ទំនងល្អនឹងគ្នានោះទេ។ នៅក្រោមរដ្ឋបាលលោកដូណាល់ ត្រាំ ប្រទេសសត្រូវទាំងពីរ បានបង្កើតជំនួបកំពូល ជាប្រវត្តិសាស្រ្ត ដល់ទៅ២លើក នៅ សិង្ហបុរី និងនៅវៀតណាម ដើម្បី ទាមទារឲ្យកូរ៉េខាងជើង លះបង់ចោល កម្មវិធីផលិតអាវុធនុយក្លេអ៊ែរ ជាថ្នូរនឹងការលុបចោល ទណ្ឌកម្មសេដ្ឋកិច្ច។ ប៉ុន្តែ ការចរចារវាងភាគីទាំងពីរ នៅតែជាប់គាំង រហូតមក។ សម្រាប់អ្នកជំនាញ នៃវិទ្យាស្ថានសម្រាប់ប្រយោជន៍ជាតិ ជាមួយនឹងការចូលកាន់អំណាចរបស់លោកចូ បៃដិន នៅ អាមេរិក មេដឹកនាំកូរ៉េខាងជើង គីម ជុងអ៊ុនមើលមិនឃើញ ការចម្រើនទៅមុខ នៅក្នុងការចរចាអាមេរិក និងកូរ៉េខាងជើងនោះទេ។
ម្យ៉ាង លោកគីម ជុងអ៊ុន ធ្លាប់បានហៅ លោកចូ បៃដិន ថា ជាឆ្កែឆ្កួត ដែលគេត្រូវវាយសម្លាប់ ចំណែកលោកចូ បៃដិន ធ្លាប់បាននិយាយនៅក្នុងយុទ្ធនាការឃោសនាបោះឆ្នោតកន្លងមក ដោយចាត់ទុក មេដឹកនាំកូរ៉េខាងជើង ថា ជាមនុស្សពាល។ ម្យ៉ាងទៀត លោកចូ បៃដិន ប្រាកដជានឹងត្រលប់ទៅ ប្រើនយោបាយចាស់ ដូចលោកធ្លាប់អនុវត្ត កាលនៅធ្វើជាអនុប្រធានាធិបតី កាលពី ៨ឆ្នាំមុន ពោលគឺជំរុញ ព្យាយាម ការចរចា នៅថ្នាក់ជំនាញ ឲ្យបានចេញជាលទ្ធផល ទើបបង្កើតឲ្យមានការចរចា នៅក្នុងជំនួបកំពូលរបស់មេដឹកនាំប្រទេសទាំងពីរ។
បើតាមអ្នកជំនាញ លោកគីម ជុងអ៊ុន បានមើលឃើញ រួចទៅហើយ ចំណុចគាំងស្ទះ ដែលនឹងធ្វើឲ្យប្រទេសទាំងពីរ មិនអាចចរចា ចុះសម្រុងនឹងគ្នា។ នៅក្នុងមហាសន្និបាត លើកទី៨នៃបក្សកុម្មុយនិស្តពលករ កូរ៉េខាងជើង កាលពីថ្ងៃសុក្រម្សិលមិញ លោក គីម ជុងអ៊ុនបាននិយាយផងដែរថា កូរ៉េខាងជើង កំពុងរចនាប្លង់ សម្រាប់សាងសង់នាវាមុជទឹកដើរដោយថាមពលនុយក្លេអ៊ែរ។ លើសពីនោះ កូរ៉េខាងជើងកំពុងស្រាវជ្រាវលើបច្ចេកវិទ្យាដទៃទៀត ដើម្បីអាចផលិតផ្កាយរណបយោធា មីស៊ីលដែលហោះលឿនជាងសំឡេង ហើយនិងក្បាលគ្រាប់ផ្សេងទៀត។ គេជឿថា បើសិនកូរ៉េខាងជើង អាចសម្រេចផលិតនាវាមុជទឹក និងសព្វាវុធដែលរៀបរាប់ខាងលើបានមែន នោះ ក្រុងព្យុងយ៉ាងនឹងអាចនាំមីស៊ីលរបស់ខ្លួន ចូលកាន់តែ ជិត ទៅគំរាមទឹកដី អាមេរិក ដោយគ្មានទុកពេលច្រើនឲ្យអាមេរិកអាចត្រៀមខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ