ក្រុមអ្នកឃ្លាំមើលសិទ្ធិមនុស្ស ថាចិនបង្កើនការគាបសង្កត់លើជនជាតិអ៊ុយហ្គួរ
ប្រទេសចិនបានបង្កើនគំនាបសង្កត់ លើជនជាតិភាគតិចអ៊ុយហ្គួរ តាមរយៈប្រព័ន្ធតុលាការ។ នេះ គឺជាការលើកឡើងរបស់ក្រុមសកម្មជនសិទ្ធិមនុស្ស នៅថ្ងៃពុធ ២៤ កុម្ភៈ ដោយបានបន្ថែមទៀតថា តុលាការចិន បានផ្តន្ទាទោសឲ្យជនជាតិអ៊ុយហ្គួរជាប់ពន្ធនាគាររយៈពេលយូរ ពាក់ព័ន្ធបទចោទប្រកាន់គួរឲ្យសង្ស័យដូចជា បង្កជម្លោះ និងផ្តល់អំណោយដល់សាច់ញាតិនៅឯបរទេសជាដើម។
ចុះផ្សាយនៅថ្ងៃ៖
ស្តាប់ - ០២:០៧
ការគូសសបញ្ជាក់របស់ក្រុមអ្នកការពារសិទ្ធិមនុស្ស ពីការបង្កើនការធ្វើទុក្ខបុកម្នេញទៅលើ ជនជាតិអ៊ុយហ្គួរពីសំណាក់ក្រុងប៉េកាំងនេះ ធ្លាក់មកនៅពីរថ្ងៃក្រោយរដ្ឋមន្ត្រីការបរទេសចិនលោក វ៉ាង យី បានសរសើរអំពីបញ្ហាសិទ្ធិមនុស្សនៅក្នុងប្រទេសរបស់ខ្លួន។
កាលពីថ្ងៃចន្ទដើមសប្តាហ៍នេះ លោក វ៉ាង យី បានអះអាងថាការអភិវឌ្ឍន៍សេដ្ឋកិច្ចនៅតំបន់ស៊ីនជាំង និងនៅតំបន់ទីបេ សបញ្ជាក់ឲ្យឃើញពីស្ថានភាពសិទ្ធិមនុស្សរបស់ចិនដែលកាន់តែមានភាពល្អប្រសើរឡើង។
ផ្ទុយពីការលើកឡើងខាងលើ ក្រុមអ្នកជំនាញ ថាចិននៅតែបន្តទង្វើរំលោភបំពានសិទ្ធិមនុស្សធ្ងន់ធ្ងរទៅលើជនជាតិអ៊ុយហ្គួរ ក្នុងតំបន់ស៊ីនជាំងដោយស្របទៅតាមច្បាប់ដែលតាក់តែងដោយចិន។
រដ្ឋអំណាចចិន បានបង្កើនកម្រិតនៃការផ្តន្ទាទោសផ្នែកព្រហ្មទណ្ឌ ទៅលើជនជាតិអ៊ិយហ្គួរ និងជនជាតិភាគតិចអ្នកកាន់សាសនាអ៊ីស្លាមដទៃទៀត ប្រមាណមួយលាននាក់ ដែលកំពុងជាប់ឃុំឃាំងនៅឯជំរំអប់រំនយោបាយនៅស៊ីនជាំង។
មានមនុស្សជាង ២សែន ៥ម៉ឺននាក់នៅតំបន់ភាគខាងលិចរបស់ចិននេះ ត្រូវបានផ្តន្ទាទោសនិងដាក់ពន្ធនាគារជាផ្លូវការចាប់តាំងពីឆ្នាំ ២០១៦។ នេះបើយោងទៅតាមក្រុមអ្នកឃ្លាំមើលសិទ្ធិមនុស្ស។
ក្រសួងការបរទេសអាមេរិក បាននិយាយថាសកម្មភាពរបស់ចិននៅតំបន់ស៊ីនជាំង មិនខុសអីពីអំពើប្រល័យពូជសាសន៍ឡើយ ហើយសមាជិកសភាកាណាដាកាលពីថ្ងៃអង្គារ ក៏បានចេញសេចក្តីប្រកាសស្រដៀងគ្នានេះដែរ។
ចំណែកបារាំង តាមរយៈរដ្ឋមន្ត្រីការបរទេសវិញ ក៏បានរិះគន់កាន់តែខ្លាំងឡើងដែរ អំពីទង្វើរំលោភសិទ្ធិមនុស្សនៅស៊ីនជាំង។ លោក Jean-Yves Le Drian បាននិយាយថា ការឃុំឃាំងជនជាតិអ៊ុយហ្គួរ និងជនជាតិភាគតិចផ្សេងទៀតនៅស៊ីនជាំងតំបន់ភាគខាងលិចប្រទេសចិន គឺជារឿងមិនអាចទទួលយកបានឡើយ។ ទន្ទឹមនេះ លោក ក៏បានទាមទារផងដែរឲ្យទីក្រុងប៉េកាំងអនុញ្ញាតឲ្យក្រុមអ្នកសង្កេតការណ៍សិទ្ធិមនុស្សឯករាជ្យចូលទៅស៊ើបអង្កេតនៅតំបន់ស៊ីនជាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ