កិច្ចសន្ទនាដំបូងរបស់ប្រមុខការបរទេសអាមេរិកជាមួយចិន ផ្តោតលើសំណុំរឿងអ៊ុយហ្គួរ ទីបេ និងហុងកុង
ក្រោមអាណត្តិដឹកនាំរបស់រដ្ឋបាលអាមេរិកថ្មី តើទំនាក់ទំនងចិន និងអាមេរិក នឹងអាចធូរស្រាល ប្រសើរឡើងដែរឬទេ? អនាគតយ៉ាងណា គេនៅមិនទាន់ដឹងទេ ប៉ុន្តែ នៅពេលនេះ គឺមិនទាន់អាចនៅឡើយទេ។ ជាក់ស្តែង នៅក្នុងកិច្ចសន្ទនាតាមទូរស័ព្ទ ជាមួយប្រមុខការបរទេសចិន កាលពីថ្ងៃសុក្រ រដ្ឋមន្រ្តីការបរទេសអាមេរិក បានលើកយកសំណុំរឿងដែលសុទ្ធតែក្តៅក្រហាយសម្រាប់ទីក្រុងប៉េកាំង ដែលមានដូចជា ការរំលោភសិទ្ធិប្រជាជនអ៊ុយហ្គួរ ប្រជាជនទីបេ និងការបង្រ្កាបចាប់ខ្លួននៅទីក្រុងហុងកុង។ បកមកវិញ ទីក្រុងប៉េកាំងប្រាប់វ៉ាស៊ីនតោន កុំឲ្យលូកចូលដៃចូលក្នុងកិច្ចការផ្ទៃក្នុងរបស់ចិន។
ចុះផ្សាយនៅថ្ងៃ៖
ស្តាប់ - ០២:០៨
នៅក្នុងទំនាក់ទំនងលើកដំបូងរវាងរដ្ឋបាលអាមេរិកថ្មី ជាមួយប្រទេសចិន រដ្ឋមន្រ្តីការបរទេសអាមេរិក លោកអង់តូនី ប្លីងកិន បាននិយាយតាមទូរស័ព្ទ ប្រាប់ លោកយ៉ាង ជាឈី អ្នកទទួលខុសត្រូវជាន់ខ្ពស់ផ្នែកកិច្ចការបរទេស របស់បក្សកុម្មុយនិស្តចិន ថា អាមេរិក នឹងការពារផលប្រយោជន៍ជាតិខ្លួន ប្រយុទ្ធប្រឆាំងដើម្បីការពារតម្លៃប្រជាធិបតេយ្យ និងចាប់ប៉េកាំងឲ្យទទួលខុសត្រូវ ក្នុងករណីមានការរំលោភប្រឆាំង ប្រព័ន្ធអន្តរជាតិ។
ជារួម ប្រមុខការទូតអាមេរិកបានទាមទារឲ្យប្រទេសចិន គោរពសិទ្ធិរបស់ប្រជាជនអ៊ុយហ្គួរ ប្រជាជនទីបេ និងហុងកុង នៅក្នុងកិច្ចសន្ទនា តាមទូរស័ព្ទ កាលពីល្ងាចថ្ងៃសុក្រម្សិលមិញ។ តាមសេចក្តីប្រកាសរបស់ក្រសួងការបរទេសអាមេរិក លោកអង់តូនី ប្លីងកិនបញ្ជាក់ទៅសមភាគីចិនដែរថា អាមេរិកនឹងចាប់ចិនឲ្យទទួលខុសត្រូវសម្រាប់ការប៉ុនប៉ង បង្កអស្ថិរភាព នៅក្នុងតំបន់ឥណ្ឌូប៉ាស៊ីហ្វិក ដែលនៅក្នុងនោះមានផងដែរកោះតៃវ៉ាន់។
នៅមុនចូលកាន់តំណែងជាប្រមុខការបរទេស អាមេរិក លោកអង់តូនី ប្លីងកិន ធ្លាប់បានបង្ហាញជំហរតឹងរ៉ឹងជាមួយចិន នៅក្នុង សវនាការរបស់ព្រឹទ្ធសភា អាមេរិក ដែលនៅទីនោះ លោកបាននិយាយគាំទ្រ ជំហរដាច់ណាត់របស់រដ្ឋបាលលោកដូណាល់ ត្រាំ នៅចំពោះមុខប្រទេសចិន លោកប្លីងកិនធ្លាប់យល់ស្របផងដែរជាមួយរដ្ឋបាលមុនដែលថា ប៉េកាំងបានប្រព្រឹត្តអំពើប្រល័យពូជសាសន៍ទៅលើជនជាតិអ៊ុយហ្គួរនៅ ស៊ីនជាំង។
នៅក្នុងកិច្ចសន្ទនាតាមទូរស័ព្ទ ជាមួយ ប្រមុខការបរទេសអាមេរិក លោកយ៉ាង ជាឈី អ្នកទទួលខុសត្រូវជាន់ខ្ពស់ផ្នែកកិច្ចការបរទេសរបស់បក្សកុម្មុយនិស្តចិន បាននិយាយប្រាប់អាមេរិកឲ្យកែកំហុស ដែលធ្លាប់បានអនុវត្ត នៅប៉ុន្មានឆ្នាំមកនេះ។
តាមសេចក្តីប្រកាសរបស់ស្ថានទូតចិននៅទីក្រុងវ៉ាស៊ីនតោន លោកយ៉ាង ជាឈី បានប្រាប់សមភាគីអាមេរិកថា “ចិន និងអាមេរិក គួរគិតតែពីកិច្ចការរបស់ខ្លួន រៀងៗខ្លួន” និងថា ហុងកុង ទីបេ ខេត្តស៊ីនជាំង ជាកិច្ចការផ្ទៃក្នុងរបស់ចិន ដែលកម្លាំងបរទេសពីខាងក្រៅ មិនអាចលូកដៃ ចូលបានទេ។
មន្រ្តីជាន់ខ្ពស់របស់បក្សកុម្មុយនិស្តចិនបានរំលឹកប្រាប់ប្រមុខការបរទេសអាមេរិកដែរថា អាមេរិក ត្រូវគោរព ឲ្យបានម៉ត់ចត់បំផុត គោលការណ៍ចិនតែមួយ ដែលអាមេរិកបានទទួលស្គាល់ដែលក្នុងនោះ តៃវ៉ាន់គឺជាខេត្តមួយរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ