លោកចូ បៃដិន ទូរស័ព្ទទៅ លោកស៊ី ជីនពីង ថ្លែងការបារម្ភពីបញ្ហាហុងកុង អ៊ុយហ្គួរ និងតៃវ៉ាន់
កាលពីថ្ងៃពុធទី១០កុម្ភៈ លោកប្រធានាធិបតីថ្មីរបស់សហរដ្ឋអាេមរិក ចូ បៃដិន បានទូរស័ព្ទ ទៅនិយាយជាមួយលោកប្រធានាធិបតីចិន ស៊ី ជីនពីង។ យោងតាមលិខិតសង្ខេបរបស់សេតវិមាន នៅក្នុងកិច្ចសន្ទនាតាមទូរស័ព្ទជាលើកទៅមួយនេះ លោកចូ បៃដិន បានថ្លែងការព្រួយបារម្ភអំពីបញ្ហាសិទ្ធិសេរីភាពនៅហុងកុង និងបញ្ហារំលោភសិទ្ធិមនុស្សធ្ងន់ធ្ងរ នៅខេត្តស៊ីនជាំងផងដែរ។
ចុះផ្សាយនៅថ្ងៃ៖
ស្តាប់ - ០២:១៨
ទាក់ទិននឹងបញ្ហាសិទ្ធិមនុស្សនៅចិន លោកប្រធានាធិបតីថ្មី ចូ បៃដិន ហាក់បានបង្ហាញជំហររឹងមាំ និងជាក់ច្បាស់ ជាងលោកអតីត ប្រធានាធិបតី ដូណាល់ ត្រាំ។ នៅក្នុងកិច្ចសន្ទនាតាមទូរស័ព្ទ ជាលើកដំបូង ជាមួយលោក ស៊ី ជីនពីង លោក ចូ បៃដិន បាននិយាយលើកឡើងដោយចំៗ ថា សហរដ្ឋអាមេរិក មានការបារម្ភណាស់ ទាក់ទិននឹងការបំបិទសិទ្ធិសេរីភាពនៅហុងកុង។
ក្រៅពីនេះ លោកចូ បៃដិន ក៏បានលើកឡើងផងដែរ អំពីការរំលោភសិទ្ធិមនុស្សធ្ងន់ធ្ងរ ដែលអាជ្ញាធរចិន បាននឹងកំពុងធ្វើទៅលើជនជាតិអ៊ុយហ្គួ នៅខេត្តស៊ីនជាំង។ ចំពោះសំណុំរឿងកោះតៃវ៉ាន់ និងតំបន់សមុទ្រចិនខាងត្បួងវិញ លោកចូ បៃដិន ក៏បានលើកឡើងថា ការពង្រឹងអំណាចវាទទីកាន់តែខ្លាំងរបស់ចិន ធ្វើឲ្យសហរដ្ឋអាេមរិក មានការកង្វល់។
គួរកត់សំគាល់ថា ថ្វីបើរដ្ឋាភិបាលថ្មីរបស់លោកចូ បៃដិន បានអះអាងថានឹងមានគោលនយោបាយអន្តរជាតិ ខុសគ្នាពីរដ្ឋាភិបាល របស់លោកដូណាល់ ត្រាំ តែជារួម ទាក់ទិននឹងសំណុំរឿងចិន គឺ រដ្ឋបាលរបស់លោកចូ បៃដិន និងរដ្ឋបាលរបស់លោកដូណាល់ ត្រាំ ពុំសូវជាខុសគ្នាប៉ុន្មានទេ ជាពិសេស ក្នុងសំណុំរឿងសេដ្ឋកិច្ច។
មន្ត្រីម្នាក់ក្នុងរដ្ឋបាលលោកចូ បៃដិន បាននិយាយដោយសុំមិនបញ្ចេញឈ្មោះថា សមាជិកភាគច្រើននៃរដ្ឋាភិបាលថ្មី គឺមានការយល់ឃើញ មិនខុសពីរដ្ឋាភិបាលមុនទេ ទាក់ទិននឹងគោលជំហរអាមេរិក ដែលត្រូវប្រកាន់ជាមួយនឹងចិន។ ពោលគឺអាមេរិក ត្រូវតែមានយុទ្ធសាស្ត្រប្រជែងជាមួយចិន ឲ្យបានខ្លាំងក្លាបំផុត ជាពិសេសក្នុងសំណុំរឿងសេដ្ឋកិច្ច ពាណិជ្ជកម្ម។ យ៉ាងណាមិញ យោងតាមប្រភពខាងលើ គឺរដ្ឋាភិបាលលោកចូ បៃដិន គ្មានគំរោង ថានឹងលប់ចោលនូវការដំឡើងពន្ធ លើទំនិញចិន ដែលលោកដូណាល់ ត្រាំ បានសម្រេចនោះទេ។ តែយ៉ាងណា មន្ត្រីរូបនេះអះអាងថា រដ្ឋាភិបាលលោកចូ បៃដិន ចង់ពិនិត្យសើរើបញ្ហានេះ ដោយរួមគ្នាគិត ជាមួយប្រទេសដៃគូផ្សេងទៀតនៅអឺរ៉ុប ដើម្បីធ្វើយ៉ាងណា ទប់ជញ្ជីងពាណិជ្ជកម្មកុំឲ្យផ្អៀងទៅតែខាងចិន។
ដោយឡែក នៅក្នុងបទសម្ភាសន៍តាមទូរទស្សន៍ CBS ផ្សាយកាលពីថ្ងៃអាទិត្យកន្លងទៅ លោក ចូ បៃដិន បាននិយាយថា « លោក ស៊ី ជីនពីង គឺជាមនុស្សរឹងរូស និងកាចណាស់ »។ លោក ចូ បៃដិនបន្ថែមថា « មិនមែនលោកនិយាយក្នុងន័យរិះគន់ទេ តែលោកសង្កេតឃើញថាលោក ស៊ី ជីនពីង គ្មានសញ្ញាណប្រជាធិបតេយ្យ នៅក្នុងមនសិកាបន្តិចណាសោះឡើយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ