Amnesty៖កូនៗរបស់គ្រួសារអ៊ុយហ្គួរ ត្រូវអាជ្ញាធរចិនចាប់បញ្ជូនទៅដាក់មណ្ឌលកុមារកំព្រា
បន្ទាប់ពីរងការចោទប្រកាន់ពីអង្គការការពារសិទ្ធិមនុស្សថា បានចាប់ឃុំខ្លួនជនជាតិអ៊ុយហ្គួរជាង១លាននាក់ ក្នុងមណ្ឌលលត់ដំ នៅ ខេត្តស៊ីនជាំង អាជ្ញាធរចិន បានរងការរិះគន់សាជាថ្មី ដោយលើកនេះ នៅក្នុងរឿងរំលោភសិទ្ធិកុមារ។ តាមរបាយការណ៍ ថ្មីរបស់អង្គការការពារសិទ្ធិមនុស្សAmnesty International អាជ្ញាធរចិន នៅខេត្តស៊ីនជាំងបានចាប់បង្ខាំង កុមារ អ៊ុយហ្គួរ ដែលមានឪពុកម្តាយរត់ភៀសខ្លួន ទៅ បរទេស នៅក្នុងមណ្ឌលកុមារកំព្រារបស់រដ្ឋ។
ចុះផ្សាយនៅថ្ងៃ៖
ស្តាប់ - ០២:៤៥
អស់ពីជំរំលត់ដំមនុស្សចាស់ ដល់ជំរំដាក់ក្មេងកំព្រាអ៊ុយហ្គួរ? នៅក្នុងរបាយការណ៍ចុងក្រោយរបស់ខ្លួន ដែលចេញផ្សាយ នៅថ្ងៃទី ព្រហស្បតិ៍ ទី ១៨មីនា អង្គការការពារសិទ្ធិមនុស្សAmnesty International បានរិះគន់អាជ្ញាធរចិនថា បានចាប់ បំបែក ដោយបង្ខំ កូនៗពីឪពុកម្តាយជាតិអ៊ុយហ្គួរ នៅ ខេត្តស៊ីនជាំង។
តាមរយៈ ការស្រាវជ្រាវ និងជួបសម្ភាសន៍ជាមួយ ជនជាតិអ៊ុយហ្គួរ ចំនួន ៦គ្រួសារ ដែលកំពុងរស់នៅនិរទេសខ្លួន នៅ ប្រទេសអ៊ីតាលី អូស្ត្រាលី ហូឡង់ កាណាដា និងតួកគី អង្គការAmnesty ដែលបានរកឃើញថា កុមារជាច្រើននាក់ (មានក្មេងអាយុ៥ឆ្នាំ) ដែលបានបែកពីឪពុកម្តាយ (ដែលបានរត់គេចខ្លួនចេញពីខេត្តស៊ីនជាំង) ត្រូវបានអាជ្ញាធរចិន ចាប់បញ្ជូនទៅដាក់មណ្ឌលកុមារកំព្រា របស់រដ្ឋក្នុងខេត្តស៊ីនជាំង។
ប្តីប្រពន្ធអ៊ុយហ្គួរពីរនាក់ គឺ Mihiban Kader និងAblikim Memtinin ដែលកំពុងនិរទេសខ្លួន នៅប្រទេសអ៊ីតាលីបាននិយាយប្រាប់ អង្គការសិទ្ធិមនុស្សថា នៅពេល ពួកគេបង្ខំចិត្ត រត់ចាកផ្ទះសម្បែង ដើម្បីគេចខ្លួនចេញពីការធ្វើបាបរបស់ប៉ូលិស នៅក្នុងអំឡុងបង្រ្កាបខ្លាំងនៅខេត្តស៊ីនជាំង នៅឆ្នាំ ២០១៧ កូនៗរបស់ពួក ចំនួន ៤នាក់ ត្រូវបានផ្ទុកផ្តាក់ឲ្យរស់នៅជាមួយជីដូនជីតា។ នៅពេលពួកគេបានទទួលសិទ្ធិរស់នៅអ៊ីតាលី ពួកគេបានដាក់ពាក្យធានាយកកូនៗ ទាំង ៤មករស់នៅជាមួយ នៅអ៊ីតាលី ប៉ុន្តែ ប៉ូលិសចិនចាប់ស្ទាក់ មិនឲ្យកូនៗរបស់ពួកគេចាកចេញពីខេត្តស៊ីនជាំង។ ចុងក្រោយ មកនេះ គេបានទទួលដំណឹងទៀតថា ជីដូន ត្រូវគេចាប់បញ្ជូនទៅ មណ្ឌលអប់រំលត់ដំ ចំណែកជីតា ត្រូវប៉ូលិសចិនចាប់ឃុំ សួរចម្លើយ។ ដោយសារគ្មានសាច់ញាតិណាម្នាក់ ហ៊ានចេញមុខយកកូនៗរបស់ពួកគេទៅចិញ្ចឹម ដោយសារខ្លាចប៉ូលិសចាប់បញ្ជូនទៅជំរំលត់ដំ កូនៗទាំង៤របស់ពួកគេ ត្រូវបានអាជ្ញាធរខេត្តស៊ីនជាំង ចាប់បញ្ជូនទៅដាក់មណ្ឌលកុមារកំព្រារបស់រដ្ឋ។ អ្វីដែលពួកគេបារម្ភខ្លាចខ្លាំង គឺកូនៗរបស់ពួកគេនឹងអាចត្រូវគេលាងខួរក្បាល ទៅតាមយុទ្ធសាស្រ្តរបស់រដ្ឋាភិបាលចិន ដែលចង់បំបាត់វប្បធម៌ សាសនា អត្តសញ្ញាណរបស់ជនជាតិភាគតិចនៅប្រទេសចិន។
សម្រាប់លោកស្រី Cécile Coudriou ប្រធានអង្គការAmnesty International នៅប្រទេសបារាំង ជនជាតិអ៊ុយហ្គួរកំពុងស្ថិតក្នុងគ្រោះទុក្ខពីរ គឺ រងការធ្វើទុក្ខបុកម្នេញ ដោយសារតែពួកគេជនជាតិអ៊ុយហ្គួរ ។ និងមួយទៀត គឺត្រូវបែកព្រាត់ រស់នៅឆ្ងាយ ពីកូន ដែលត្រូវគេចាប់បង្ខំឲ្យទៅរស់នៅមណ្ឌលក្មេងកំព្រា។
សម្រាប់អង្គការការពារសិទ្ធិមនុស្ស Amnesty International ដោយមានចេតនា បំបែកបំបាក់មិនឲ្យកូនរស់នៅជួបជុំជាមួយឪពុកម្តាយ អាជ្ញាធរចិនបានរំលោភសិទ្ធិជាមូលដ្ឋានរបស់កុមារ ដែលមានចែងនៅក្នុងសន្ធិសញ្ញាអន្តរជាតិស្តីពីសិទ្ធិកុមារ។ Amnesty International បានអំពាវនាវឲ្យសហគមន៍អន្តរជាតិ ដាក់សម្ពាធ ទៅលើអាជ្ញាធរចិនឲ្យដោះលែង និងបញ្ជូន កូនក្មេងឲ្យរស់នៅជួបជុំជាមួយឪពុកម្តាយ។
នៅមុនរបាយការណ៍របស់អង្គការAmnesty ទីក្រុងប៉េកាំងបានរងរិះគន់រួចហើយថា បានធ្វើទុក្ខបុកម្នេញ រំលោភសិទ្ធិជនជាតិអ៊ុយហ្គួរ និងជនជាតិដទៃទៀតនៅខេត្តស៊ីនជាំង ដែលនៅក្នុងនោះមានតាំងពីការចាប់ឲ្យធ្វើការដោយបង្ខំ ចាប់គ្រៀវ និងរំលោភផ្លូវភេទលើស្រ្តីអ៊ុយហ្គួរ នៅមណ្ឌលឃុំឃាំង។ រដ្ឋាភិបាលចិនធ្លាប់បានបដិសេធការចោទប្រកាន់ ប៉ុន្តែ ក្រោយមក បានទទួលស្គាល់ថា ពិតជាមានមណ្ឌល ដាក់ជនជាតិអ៊ុយហ្គួរ ដែលមានគោលដៅ អប់រំ លត់ដំ ដើម្បីកុំឲ្យពួកគេ ធ្លាក់ខ្លួន ទៅក្នុងចលនាភេរវនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ