ចិន៖មានស្លាប់ ៤នាក់ និងរបួស ៥នាក់នៅក្នុងអំពើភេរវកម្មប្រឆាំងនឹងអាគាររដ្ឋបាល
នៅក្នុងប្រទេសចិន មានមនុស្សស្លាប់ ៤នាក់ និងរបួស ៥នាក់នៅក្នុងអំពើភេរវកម្មបំផ្ទុះគ្រាប់បែកច្នៃនៅក្នុងអាគាររដ្ឋបាលមួយនៃក្នុងស្រុកម៉ីងជីងស្ថិតប៉ែកខាងត្បូងប្រទេស។ ប៉ូលិសស្រុកម៉ីងជីងបានបញ្ជាក់នៅក្នុងបណ្តាញសង្គមថា ជនដែលបានបង្កអំពើភេរវកម្មបំផ្ទុះដាក់គ្រាប់បែកច្នៃនៅក្នុងអាគារនោះជាបុរសម្នាក់អាយុ ៥៩ឆ្នាំ ហើយរូបគេក៏បានបាត់បង់ជីវិតនៅក្នុងហេតុការណ៍នោះដែរ។ បើតាមព័ត៌មានចុះផ្សាយដោយកាសែតក្នុងស្រុក អំពើភេរវកម្មនេះមានជាប់ពាក់ព័ន្ធនឹងរឿងដីធ្លីដែលរដ្ឋបានរឹបអូសពីប្រជាជនដើម្បីផ្តល់ឲ្យក្រុមហ៊ុនធ្វើការអភិវឌ្ឍន៍។
ចុះផ្សាយនៅថ្ងៃ៖
ស្តាប់ - ០២:០០
ស្រុកម៉ីងជីងជាស្រុកមួយស្ថិតក្បែរខេត្តកង់តុង និងមានប្រជាជនរស់នៅប្រមាណតែ ៣ ០០០នាក់ប៉ុណ្ណោះ។ តែស្រុកមួយនេះកំពុងស្ថិតក្នុងគម្រោងនៃការធ្វើកំណែទម្រង់ដីធ្លី និងការធ្វើនគរោបនីយកម្ម។ គេហទំព័រព័ត៌មានមួយបានផ្សព្វផ្សាយនូវវីដេអូដែលបង្ហាញពីភាពខ្ទេចខ្ទីររបស់ការិយាល័យមួយជាមួយនឹងឈាមជាប់នឹងជញ្ជាំង រួមទាំងមនុស្សដេកស្លាប់ចំនួន ២នាក់។ ចំណែកបណ្តាញសារព័ត៌មានក្នុងស្រុកបានបញ្ជាក់ថា ការិយាល័យដែលបានរងការវាយប្រហារជាការិយាល័យរបស់គណៈកម្មាធិការស្រុកទទួលបន្ទុកចាត់ចែង និងសម្រេចក្នុងរឿងកម្មសិទ្ធិដីធ្លី។
កាលពីឆ្នាំ ២០២០ កន្លងទៅ រដ្ឋអំណាចស្រុកបានប្រគល់ដីចំនួន ១១០ហិចតាទៅឲ្យក្រុមហ៊ុនអភិវឌ្ឍអចលនទ្រព្យដើម្បីបង្កើតស្រុកចំណាស់មួយសម្រាប់ទាក់ទាញអ្នកទេសចរណ៍ នេះបើតាមព័ត៌មានចុះផ្សាយដោយកាសែតប្រចាំថ្ងៃក្នុងខេត្តកង់តុង។ តែបញ្ហានៅត្រង់ថា គម្រោងបង្កើតស្រុកចំណាស់មួយដែលមានទឹកប្រាក់ប្រមាណជា ១លានអឺរ៉ូមួយនេះត្រូវការដីដែលប្រជាជនកំពុងរស់នៅ និងត្រូវរកទីតាំងថ្មីឲ្យពួកគេរស់នៅដោយមានការបង់លុយបន្ថែមជាសំណង។ ប្រជាជនដែលរស់នៅក្នុងតំបន់ពាក់ព័ន្ធបានបញ្ជាក់នៅលើបណ្តាញសង្គមថា អំពើភេរវកម្មពេលនេះមានជាប់ពាក់ព័ន្ធនឹងសំណងផ្សេងៗដែលកើតចេញពីការដោះដូរដីរវាងរដ្ឋអំណាចស្រុក និងប្រជាជន។
តែ AFP មិនអាចផ្ទៀងផ្ទាត់លើព័ត៌មាននេះបានទេ។ អ្វីដែលគេអាចនិយាយបាន រឿងរដ្ឋយកដីប្រជាជនដោយបង្ខំជាថ្នូរនឹងការឲ្យលុយតិចតួច ឬមិនឲ្យសោះតែងជាប្រភពនៃភាពតានតឹងរវាងរដ្ឋអំណាច និងប្រជាពលរដ្ឋ។ ការសិក្សាមួយធ្វើដោយសកលវិទ្យាល័យហុងកុងឲ្យដឹងថាក្នុងចន្លោះឆ្នាំ ២០០៥ និង ២០១៥ មានប្រជាកសិករពី ១លានទៅ ៥លាននាក់ត្រូវបានរដ្ឋយកដីស្រែរបស់ពួកគេជារៀងរាល់ឆ្នាំដែលពេលខ្លះមិនបានឲ្យប្រាក់សំណងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ