Global Times៖ចិនបានបញ្ជៀសមហាសោកនាដកម្មនៅក្នុងតំបន់ស៊ីនជាំង
នៅក្នុងប្រទេសចិន កាសែតផ្លូវការឈ្មោះ Global Times ចេញផ្សាយនាថ្ងៃចន្ទ ទី១៣ សីហាបានបញ្ជាក់ថា នយោបាយសន្តិសុខរបស់រដ្ឋាភិបាលចិននៅក្នុងតំបន់ស៊ីនជាំងបានចូលរួមបញ្ជៀសមហាសោកនាដកម្មនៅក្នុងតំបន់ស្ថិតប៉ែកខាងលិចបង្អស់នៃប្រទេស។ អត្ថបទរបស់ Global Times ជាចម្លើយសាធារណៈលើកទី១ របស់ទីក្រុងប៉េកាំងចំពោះពាក្យរិះគន់ ទិតៀនរបស់ក្រុមអ្នកស៊ើបអង្កេតអង្គការសហប្រជាជាតិទទួលបន្ទុកសិទ្ធិមនុស្ស។
ចុះផ្សាយនៅថ្ងៃ៖
ស្តាប់ - ០២:៣០
គឺនៅក្នុងកិច្ចប្រជុំវិសាមញ្ញស្តីពីស្ថានភាពសិទ្ធិមនុស្សក្នុងប្រទេសចិនដែលគណៈកម្មាធិការជំនាញរបស់អង្គការសហប្រជាជាតិបានលើកឡើងពីព័ត៌មានគួរឲ្យជឿទុកចិត្តជាច្រើនដែលបញ្ជាក់ពីការរំលោភសិទ្ធិមនុស្សនៅក្នុងតំបន់ស៊ីនជាំងពីសំណាក់រដ្ឋអំណាចចិន។ តាមគណៈកម្មាធិការជំនាញរបស់អង្គការសហប្រជាជាតិ មានជនជាតិភាគតិចអ៊ុយហ្គួរអ្នកកាន់សាសនាអ៊ីស្លាមចំនួន ១លាននាក់ត្រូវបានរដ្ឋអំណាចចិនចាប់ឃុំក្នុងជំរំមួយដ៏ធំក្រោមហេតុផលលាក់ការសម្ងាត់។ លោកស្រី Gay McDougall សមាជិកម្នាក់នៃគណៈកម្មាធិការដើម្បីបំបាត់ភាពរឹងអើងពូជសាសន៍របស់អង្គការសហប្រជាជាតិបានឲ្យដឹងថា មានជនជាតិភាគតិចចំនួន ២លាននាក់បន្ថែមទៀត ក្នុងនោះមានពួកអ៊ុយហ្គួរ និងជាតិពិន្ធុផ្សេងត្រូវបានគេបង្ខំឲ្យទៅរស់នៅក្នុងជំរំអប់រំនយោបាយ។
សូមជម្រាបជូនថា កិច្ចប្រជុំវិសាមញ្ញរបស់ស្ថាប័នសិទ្ធិមនុស្សនៃអង្គការសហប្រជាជាតិដែលបើកធ្វើក្នុងទីក្រុងហ្សឺណែវ ប្រទេសស្វ៊ីសបានបិទបញ្ចប់ក្នុងថ្ងៃចន្ទ ទី១៣ សីហានេះដោយមានប្រតិភូចិនចូលរួមប្រមាណជា ៥០នាក់។ តែគណៈប្រតិភូចិនមិនបានធ្វើអត្ថាធិប្បាយអ្វីទាំងអស់ចំពោះព័ត៌មានដែលលើកឡើងដោយគណៈកម្មាធិការជំនាញរបស់អង្គការសហប្រជាជាតិ។ ប្រតិកម្មផ្លូវការរបស់ចិនបានធ្វើឡើងដោយកាសែត Global Times ដែលអះអាងថា ការរិះគន់ ទិតៀនលើស្ថានការណ៍ក្នុងតំបន់ស៊ីនជាំងមានគោលដៅបង្កភាពបះបោរ និងចលាចល។ តាម Global Times សន្តិភាព និងស្ថិរភាពនៅក្នុងតំបន់ស៊ីនជាំងសព្វថ្ងៃជាលទ្ធផលបានមកពីការអនុវត្តន៍នយោបាយតឹងរឹងរបស់រដ្ឋាភិបាលចិន និងថា បើកុំតែមាននយោបាយមួយនេះ ម្ល៉េះស្ថានការណ៍តំបន់របស់ចិនមួយនេះនឹងក្លាយដូចនៅប្រទេសលីប៊ី ឬស៊ីរី។
កាសែតផ្លូវការចិនដដែលបានសរសេរបន្ថែមថា ការរៀបចំឲ្យមានសន្តិសុខ និងសណ្តាប់ធ្នាប់សង្គមឡើងវិញនៅតំបន់ស៊ីនជាំងពីសំណាក់រដ្ឋអំណាចចិន និងគណបក្សកុម្មុយនិស្តចិនបានចូលរួមជួយបញ្ជៀសមហាសោកនាដកម្ម និងបានជួយស្រោចស្រង់ជិវិតមនុស្សជាច្រើននាក់។ គួររម្លឹកជូនថាអស់ជាច្រើនឆ្នាំកន្លងមក រដ្ឋាភិបាលចិនបានអះអាងពីការគំរាមកំហែងរបស់ពួកអ៊ីស្លាមនិយមជ្រុលនៅក្នុងតំបន់ស៊ីនជាំង និងថា ក្រុមអ្នកទាមទារផ្តាច់ទឹកដីនិយមតែងព្យាយាមបង្កឲ្យមានភាពតានតឹងរវាងក្រុមជនជាតិភាគតិចអ្នកកាន់សាសនាអ៊ីស្លាម ពួកអ៊ុយហ្គួរ និងពួកហានដែលជាជនជាតិចិនភាគច្រើននៅចិនសព្វថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ