ហេតុអ្វីប្រទេសលោកខាងលិចចេញមុខព្រមាន នៅក្រោយកូរ៉េខាងជើងបាញ់ “អាវុធធុនទំនើបថ្មី”?
ប៉ុន្មានថ្ងៃក្រោយ បាញ់មីស៊ីលចម្ងាយជិត ដែលអាមេរិកមិនសូវផ្តោតចំណាប់អារម្មណ៍ កូរ៉េខាងជើង បានបាញ់សាកល្បងមីស៊ីល ២គ្រាប់ ម្តងទៀត នៅថ្ងៃព្រហស្បតិ៍ម្សិលមិញ។ ការបាញ់សាកល្បង “អាវុធធុនទំនើបថ្មី” របស់ក្រុងព្យុងយ៉ាង បានបង្កឲ្យមានប្រតិកម្ម ជាបន្តបន្ទាប់ពីប្រទេសលោកខាងលិច នាំមុខដោយអាមេរិក។ អាមេរិកដែលបានទាមទារឲ្យមានការកោះប្រជុំបន្ទាន់ នៅក្រុមប្រឹក្សាសន្តិសុខអង្គការសហប្រជាជាតិ នៅថ្ងៃសុក្រនេះ។
ចុះផ្សាយនៅថ្ងៃ៖
ស្តាប់ - ០២:៥៣
ផ្ទុយពីការបាញ់សាកល្បងមីស៊ីលចម្ងាយជិត កាលពីថ្ងៃអាទិត្យ ដែលអាមេរិក និងកូរ៉េខាងត្បូង ជាអ្នកជូនដំណឹង កូរ៉េខាងជើង បានចេញមុខប្រកាសដោយខ្លួនឯង នៅថ្ងៃសុក្រនេះ ពីការបាញ់សាកល្បងដោយជោគជ័យ អាវុធធុនទំនើបថ្មីរបស់ខ្លួន កាលពីថ្ងៃព្រហស្បតិ៍ម្សិលមិញ។
តាមទីភ្នាក់ងារព័ត៌មានផ្លូវរដ្ឋកូរ៉េខាងជើង KCNA ដែលទីក្រុងសេអ៊ូលបានទទួល និងផ្សព្វផ្សាយបន្តទៅអ្នកកាសែត ការបាញ់សាកល្បង អាវុធធុនទំនើបថ្មី ពីរគ្រឿង ធ្វើឡើង ក្រោមការតាមដានរបស់មន្រ្តីជាន់ខ្ពស់កូរ៉េខាងជើង លោក Ri Pyong Chol។ មន្រ្តីជាន់ខ្ពស់រូបនេះ បានប្រកាសដែរថា ការធ្វើតេស្តសាកល្បងលើកនេះ សំខាន់ណាស់សម្រាប់កែលម្អសមត្ថភាពកងទ័ពកូរ៉េខាងជើង ឲ្យកាន់ប្រសើរឡើង និងដើម្បី ទប់ស្កាត់រាល់ការគំរាមកំហែង យោធា នៅឧបទ្វីបកូរ៉េ។
ទីភ្នាក់ងារព័ត៌មានផ្លូវរដ្ឋកូរ៉េខាងជើង មិនបានប្រើពាក្យ មីស៊ីលបាលីស្ទិក សម្រាប់សំគាល់អាវុធ ដែលគេបានបាញ់ទៅក្នុងសមុទ្រជប៉ុននោះទេ។ តាមទីភ្នាក់ងារKCNA ដដែល អាវុធធុនទំនើបថ្មី បានហោះក្នុងចម្ងាយ ៦០០គីឡូម៉ែត្រ និងមានសមត្ថភាពផ្ទុកវត្ថុទម្ងន់ ២,៥តោន។
នៅថ្ងៃព្រហស្បតិ៍ នៅក្រោយទទួលបានព័ត៌មានពីទីបញ្ជាការអន្តរយោធាកូរ៉េខាងត្បូង នាយករដ្ឋមន្រ្តីជប៉ុន លោក យូស្ហ៊ីហ៊ីដេ ស៊ូហ្កា Yoshihide Sugaបានចេញមុខប្រកាសថា អាវុធធុនទំនើបថ្មីដែលព្យុងយ៉ាងបានបាញ់កាលពីម្សិលមិញ គឺជាមីស៊ីលបាលីស្ទិក និងថា សន្តិភាព សន្តិសុខ នៅជប៉ុន និងនៅក្នុងតំបន់កំពុងរងការគំរាមកំហែង នៅក្រោយ ការបាញ់មីស៊ីល ២គ្រាប់របស់កូរ៉េខាងជើង។
តាមលោក Vipin Narang អ្នកជំនាញអាមេរិកនៅវិទ្យាស្ថានបច្ចេកវិទ្យានៅMassachusetts អាវុធធុនទំនើបថ្មីដែលកូរ៉េខាងជើង បាញ់សាកល្បងកាលពីម្សិលមិញ អាចជាមីស៊ីលដែលព្យុងយ៉ាងបានបង្ហាញនៅក្នុងក្បួនព្យុហយាត្រាទ័ព កាលពីខែមករាកន្លងទៅ។ ដោយអាចផ្ទុកវត្ថុ ទម្ងន់ ២,៥តោន គេអាចសន្និដ្ឋានថា មីស៊ីលមានសមត្ថភាព ផ្ទុកក្បាលគ្រាប់បែកនុយក្លេអ៊ែរ។
អង្គការសហប្រជាជាតិធ្លាប់បានចេញសេចក្តីសម្រេច ហាមប្រាមកូរ៉េខាងជើង មិនឲ្យបន្តកម្មវិធីផលិតមីស៊ីលបាលីស្ទិក និងគ្រាប់បែកនុយក្លេអ៊ែរ។ ការបាញ់សាកល្បង មីស៊ីលបាលីស្ទិក នៅថ្ងៃ ព្រហស្បតិ៍ បានទាញចំណាប់អារម្មណ៍របស់ប្រធានាធិបតីអាមេរិក លោកចូ បៃដិនបានព្រមានកូរ៉េខាងជើង ពីផលវិបាក បើសិនជានៅតែបន្តបង្កើតភាពតានតឹង។ លោកចូ បៃដិន បាននិយាយថា លោកត្រៀមខ្លួន បង្កើតការពិភាក្សាផ្លូវទូតជាមួយកូរ៉េខាងជើង ប៉ុន្តែក្នុងលក្ខខណ្ឌដែលកូរ៉េខាងជើងយល់ព្រមលះបង់ចោលអាវុធនុយក្លេអ៊ែរ។
បារាំង អង់គ្លេស និងអាល្លឺម៉ង់ បានទាមទារឲ្យកូរ៉េខាងជើង លះបង់ចោលការបាញ់សាកល្បងអាវុធ និងត្រូវប្រញាប់ចរចាជាមួយ អាមេរិក។ អាមេរិកដែលបានសុំឲ្យគណៈកម្មការដាក់ទណ្ឌកម្មរបស់អង្គការសហប្រជាជាតិ កោះប្រជុំបន្ទាន់នៅថ្ងៃសុក្រ ដើម្បី និយាយពីការបាញ់សាកល្បងមីស៊ីលបាលីស្ទិកចុងក្រោយ របស់កូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ