ថៃ៖អាជ្ញាធរខេត្តមួយចំនួនបានចេញវិធានការរឹតបន្តឹងដើម្បីទប់ការឆ្លងកូវីដ១៩ ក្នុងពេលចូលឆ្នាំថ្មី
នៅក្នុងប្រទេសថៃ អាជ្ញាធរខេត្តចំនួន ៣៨ខេត្តក្នុងចំណោម ៧៧ខេត្តបានចេញវិធានការរៀងៗខ្លួនដើម្បីទប់ស្កាត់ការឆ្លងរាលដាលនៃជំងឺកូវីដ១៩ នៅក្នុងពិធីបុណ្យចូលឆ្នាំខាងមុខ។ នៅក្នុងវិធានការនេះ ប្រជាជនដែលធ្វើដំណើរពីទីក្រុងបាងកក និងពីខេត្តផ្សេងចូលទៅកាន់ខេត្តទាំង ៣៨ខេត្តនឹងត្រូវធ្វើចត្តាឡីស័ករយៈពេលពី ១០ថ្ងៃទៅ ១៤ថ្ងៃ។ វិធានការរបស់ខេត្តមួយចំនួននេះបានធ្លាក់មក ខណៈដែលករណីឆ្លងថ្មីនៅមានចំនួនច្រើន។ ជាក់ស្តែងក្នុងថ្ងៃអាទិត្យ ទី១១ មេសា មានករណីឆ្លងថ្មីចំនួន ៩៦៧ករណី។
ចុះផ្សាយនៅថ្ងៃ៖
ស្តាប់ - ០២:១៩
ទីក្រុងបាងកកជាប្រភពនៃរលកឆ្លងកូវីដ១៩ លើកទី៣ ដោយនៅក្នុងខែមេសានេះ មានអ្នកឆ្លងជាង ១ ០០០នាក់។ បច្ចុប្បន្នគិតត្រឹមថ្ងៃទី១២ មេសានៅទូទាំងប្រទេស មានអ្នកវិជ្ជមានកូវីដ១៩ ជាង ៤ ០០០នាក់កំពុងសម្រាកព្យាបាលនៅក្នុងមន្ទីរពេទ្យ។ អគ្គនាយកនៃនាយកដ្ឋានសេវាកម្មសុខាភិបាលបានបញ្ជាក់ពីវត្តមានចរាចរណ៍វីរុសកូវីដ១៩ បំប្លែងខ្លួនដែលមានអត្រាឆ្លងខ្លាំង។ តាមអគ្គនាយករូបនេះដដែល ក្រៅពីមន្ទីរពេទ្យ រដ្ឋាភិបាលបានបង្កើតទីតាំងមួយចំនួនដែលអាចទទួលព្យាបាលអ្នកជំងឺកូវីដ១៩ បានរហូតដល់ទៅ ៣ ០០០នាក់។ នៅក្នុងពិធីបុណ្យចូលឆ្នាំដែលចាប់ផ្តើមពីថ្ងៃអង្គារ ទី១៣ មេសា ការរៀបចំពីធីជាច្រើនត្រូវបានកាត់បន្ថយ និងលុបចោល។
ជាក់ស្តែងក្នុងទីក្រុងបាងកក អាជ្ញាធរក្រុងបានលុបចោលការរៀបចំពិធីនៅតាមដងផ្លូវដើម្បីចៀសវាងការជួបជុំ។ ចំណែកនាយករដ្ឋមន្រ្តីលោកប្រាយុទ្ធ ចាន់អូចាបានអំពាវនាវក្នុងថ្ងៃសៅរ៍ ទី១០ មេសាឲ្យប្រជាជននៅផ្ទះក្នុងពេលបុណ្យចូលឆ្នាំថ្មី និងកុំឲ្យធ្វើសកម្មភាពអ្វីដែលទាក់ទាញហ្វូងមនុស្ស ដូចជាការជះទឹកជាដើម។ ក្នុងថ្ងៃសុក្រ ទី៩ មេសា រដ្ឋាភិបាលបានសម្រេចបិទទ្វារទីកន្លែងកំសាន្តនានានៅក្នុង ៤១ខេត្តសម្រាប់រយៈពេល ២សប្តាហ៍។ តាមធម្មតានៅក្នុងឱកាសចូលឆ្នាំថ្មី មានប្រជាជនថៃជាច្រើនពាន់នាក់ធ្វើដំណើរទៅកាន់ស្រុកកំណើតដើម្បីអបអរឆ្នាំថ្មីជាមួយក្រុមគ្រួសារ។
ជាផ្លូវការ រដ្ឋាភិបាលមិនបានហាមឃាត់ការធ្វើដំណើរ និងការបម្លាស់ទីរបស់ប្រជាជនពីកន្លែងមួយទៅកន្លែងមួយទេ។ តែក្នុងថ្ងៃអាទិត្យ ទី១២ មេសា មានខេត្តចំនួន ៣៨ខេត្តក្នុងចំណោមខេត្តទាំង ៧៧ខេត្តរបស់ថៃបានចេញវិធានការដាច់ដោយឡែករបស់ខ្លួនដើម្បីទប់ស្កាត់ការឆ្លងរាលដាលកូវីដ១៩ នៅពេលបុណ្យចូលឆ្នាំថ្មី។ វិធានការបានតម្រូវឲ្យប្រជាជនដែលធ្វើដំណើរពីទីក្រុងបាងកក និងពីខេត្តផ្សេងៗទៅកាន់ខេត្តទាំង ៣៨ខេត្តត្រូវធ្វើចត្តាឡីស័ករយៈពេលពី ១០ថ្ងៃទៅ ១៤ថ្ងៃ។
គួរបញ្ជាក់ថាគិតត្រឹមថ្ងៃអាទិត្យ ទី១១ មេសា ថៃមានអ្នកឆ្លងកូវីដ១៩ សរុបចំនួន ៣២ ០០០នាក់ និងអ្នកស្លាប់ ៩៧នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ