ថៃ៖រដ្ឋាភិបាលបិទសកម្មភាពសេដ្ឋកិច្ចមិនចាំបាច់ក្នុងក្រុងបាងកកដើម្បីទប់ស្កាត់ការឆ្លងរាលដាលកូវីដ១៩
នៅក្នុងប្រទេសថៃ រដ្ឋាភិបាលបានបន្តវិធានការប្រយុទ្ធប្រឆាំងនឹងការឆ្លងរាលដាលនៃជំងឺកូវីដ១៩។ សាឡុងម៉ាស្សា ក្លឹបកំសាន្ត ហាងកាហ្វេ និងភោជនីយដ្ឋានក្នុងទីក្រុងបាងកកត្រូវបិទទ្វារមួយរយៈចាប់ពីថ្ងៃសៅរ៍ ទី២ មករា។ ចំណែកការលក់គ្រឿងស្រវឹងក្នុងទីក្រុងបាងកកក៏នឹងត្រូវហាមឃាត់មួយរយៈដែរ។ វិធានការចាស់ដៃរបស់រដ្ឋាភិបាលពេលនេះបានធ្វើឡើង បន្ទាប់ពីមានសន្ទុះនៃការឆ្លងកូវីដ១៩ នៅក្នុងសហគមន៍ដែលមានប្រភពចេញពីផ្សារលក់គ្រឿងសមុទ្រឈ្មោះម៉ាហាឆៃកាលពីខែធ្នូកន្លងទៅ។
ចុះផ្សាយនៅថ្ងៃ៖
ស្តាប់ - ០២:០៩
វិធានការនៅក្នុងជំហានដំបូងដែលចូលជាធរមានចាប់ពីថ្ងៃសៅរ៍ ទី២ មករា គឺការបិទសកម្មភាពមិនចាំបាច់មួយចំនួននៅក្នុងទីក្រុងបាងកក ដូចជាសាឡុងម៉ាស្សា ក្លឹបកំសាន្ត ហាងកាហ្វេ ភោជនីយដ្ឋាន ហាងសំអាង កន្លែងហាត់កីឡាគ្រប់ប្រភេទ។ ទន្ទឹមគ្នានេះ ការលក់គ្រឿងស្រវឹងគ្រប់ប្រភេទក៏នឹងត្រូវហាមឃាត់នៅក្នុងទីក្រុងបាងកកដែរ។ ក្រុងបាងកកដែលរដ្ឋអំណាចបានរកឃើញករណីឆ្លងថ្មីជាង ២ ៦០០ករណីនារយៈពេល ២៤ម៉ោងចុងក្រោយ ហើយបើគិតនៅទូទាំងប្រទេស គឺមានជាង ៧ ៣០០ករណី។ នៅថ្ងៃសុក្រ ទី១ មករា រដ្ឋអំណាចក្រុងបាងកកបានប្រកាសបិទសាលារៀនរដ្ឋចំនួន ២សប្តាហ៍។
អ្នកនាំពាក្យក្រុមការងារទទួលបន្ទុកជំងឺកូវីដ១៩ បានថ្លែងថា រដ្ឋាភិបាលមិនចង់ប្រើវិធានការចាស់ដៃ ដូចជាការបិទខ្ទប់ប្រទេសទាំងស្រុង ឬមួយបំរាមគោចរទេ តែបានជ្រើសយកវិធានការផ្ទាំងស៊ីបដើម្បីទប់ស្កាត់ការឆ្លងរាលដាលនៃជំងឺកូវីដ១៩។ តាមអ្នកនាំពាក្យក្រុមការងារទទួលបន្ទុកជំងឺកូវីដ១៩ រូបនេះដដែល វិធានការរឹតបន្តឹង និងការបិទខ្ទប់នៅកន្លែងផ្សេងទៀតក្រៅពីទីក្រុងបាងកកនឹងធ្វើឡើងចាប់ពីថ្ងៃទី៤ មករារហូតដល់ថ្ងៃទី១ កុម្ភៈ។ គួររម្លឹកថាគិតរហូតដល់ខែវិច្ឆិកា ថៃជាប្រទេសមួយដែលមានករណីឆ្លងតិចតួច ពោលមានជាង ៤ ០០០ករណី និងមានស្លាប់ចំនួន ៦០នាក់ប៉ុណ្ណោះ។
តែវត្តមានករណីជំងឺកូវីដ១៩ នៅក្នុងផ្សារលក់គ្រឿងសមុទ្រឈ្មោះម៉ាហាឆៃនាខែធ្នូកន្លងទៅបានធ្វើករណីឆ្លងមានសន្ទុះគួរឲ្យបារម្ភខ្លាំងនៅទូទាំងប្រទេស។ មាន ៥៣ខេត្តក្នុងចំណោម៧៧ខេត្តរបស់ថៃបានស្គាល់កំណើនករណីឆ្លងកូវីដ១៩។ ចំណាត់ការទប់ស្កាត់ការឆ្លងរាលដាលរបស់រដ្ឋាភិបាលពេលនេះនឹងធ្វើឲ្យប៉ះពាល់ខ្លាំងដល់វិស័យសេដ្ឋកិច្ច ពិសេសវិស័យទេសចរណ៍ និងវិស័យនាំចេញដែលប្រទេសនៅអាស៊ីអាគ្នេយ៍មួយនេះបានពឹងផ្អែកខ្លាំងសម្រាប់ចំណូលសេដ្ឋកិច្ចរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ