ជំងឺកូវីដរលកទី២ធ្វើឲ្យសេដ្ឋកិច្ចថៃ បន្តធ្លាក់ចុះ គួរឲ្យកត់សំគាល់
ប្រទេសថៃ ដែលកំពុងរងគ្រោះសាជាថ្មី ដោយសារជំងឺកូវីដ រលកទី ២ បានកែប្រែឡើងវិញ ការព្យាករណ៍សេដ្ឋកិច្ច សម្រាប់ឆ្នាំ ២០២១។ តាមតួលេខចុះផ្សាយដោយក្រុមប្រឹក្សាសេដ្ឋកិច្ចជាតិ និងអភិវឌ្ឍសង្គម កាលពីថ្ងៃចន្ទ សេដ្ឋកិច្ចថៃ នៅត្រីមាសទី១ ឆ្នាំនេះ បានបន្តធ្លាក់ចុះ អស់ ២,៦% បើប្រៀបធៀបនឹងត្រីមាសទី១ឆ្នាំមុន។
ចុះផ្សាយនៅថ្ងៃ៖
វិបត្តិកូវីដ ដែលបានប៉ះពាល់យ៉ាងធ្ងន់ធ្ងរដល់វិស័យទេសចរណ៍ បានធ្វើឲ្យសេដ្ឋកិច្ចថៃធ្លាក់ចុះអស់ ៦% កាលពីឆ្នាំ ២០២០។ បើតាម ក្រុមប្រឹក្សាសេដ្ឋកិច្ចជាតិ និងអភិវឌ្ឍសង្គម សេដ្ឋកិច្ចថៃ នៅត្រីមាសទី១ដើមឆ្នាំនេះ បានបន្តធ្លាក់ចុះ ប្រមាណ ២,៦% បើធៀបនឹងត្រីមាសទី១ឆ្នាំមុន។
រដ្ឋាភិបាលថៃ ត្រូវកែប្រែ ការព្យាករណ៍អត្រាកំណើនសេដ្ឋកិច្ចរបស់ខ្លួន ឡើងវិញ នៅបន្ទាប់ពីប្រទេសរងគ្រោះដោយសាររលកទី២នៃជំងឺកូវីដ ១៩ចាប់តាំងពីខែមេសាមក។
នៅថ្ងៃចន្ទ អាជ្ញាធររាប់ឃើញមានករណីឆ្លងថ្មី ចំនួន ៩៦៣៥ ក្នុងរយៈពេលតែមួយថ្ងៃ ដែលនៅក្នុងនោះ មានជិត ៧ពាន់នាក់ ជាអ្នកទោស ជាប់ ក្នុងពន្ធនាគារ។ នាយកដ្ឋានពន្ធនាគារថៃ គ្រោង នឹងធ្វើតេស្តកូវីដ ទ្រង់ទ្រាយធំ ទៅលើអ្នកទោសទាំងអស់ របស់ថៃ ដែលមាន ជាង ៣សែននាក់ ពោល គឺ នៅបន្ទាប់ពី អ្នកទោស ជាច្រើនរយនាក់ បានឆ្លងជំងឺកូវីដ នៅប៉ុន្មានថ្ងៃចុងក្រោយនេះ។ ក្នុងចំណោមអ្នកទោសដែលឆ្លងជំងឺកូវីដ ក្នុងពន្ធនាគារ មានផងដែរ សកម្មជននៃចលនាទាមទារប្រជាធិបតេយ្យថៃ ដែលធ្លាប់ចូលរួមធ្វើបាតុកម្ម ទាមទារឲ្យលោកនាយករដ្ឋមន្រ្តី ប្រាយុទ្ធ ចាន់អូចា ចុះចេញពីតំណែង និងការធ្វើកំណែទម្រង់ ស្ថាប័នរាជវាំងថៃ។
នៅប្រទេសថៃ ជំងឺកូវីដ បានសម្លាប់មនុស្ស សរុប ៦១៤ នាក់។ ករណីស្លាប់ច្រើន នៅប៉ុន្មានសប្តាហ៍ចុងក្រោយនេះ បូកផ្សំនឹងលំហូរចាល់អ្នកជំងឺនៅមន្ទីរពេទ្យ បានធ្វើឲ្យរដ្ឋាភិបាលថៃ ចាត់វិធានការបិទ ទីកន្លែងសាធារណៈ អំពាវនាវឲ្យប្រជាជនធ្វើការពីផ្ទះ និងកាត់បន្ថយ ការធ្វើដំណើរមិនចាំបាច់។ វិធានការថ្មី របស់រដ្ឋាភិបាលនឹងអាចធ្វើឲ្យសេដ្ឋកិច្ចថៃ ធ្លាក់ចុះ មួយកម្រិតទៀត។ ថៃ ដែលគម្រោងបើកទ្វារទទួលទេសចរដែល បានចាក់វ៉ាក់សាំងបង្ការកូវីដ នៅខែ កក្កដាខាងមុខ កំពុងប្រឈមនឹងស្ថានភាពមិនច្បាស់លាស់ បើសិន ជាត្រូវ បោកបក់ ម្តងទៀត ដោយសាររលកទី៣នៃជំងឺកូវីដ។
វិបត្តិកូវីដ លើកនេះ នឹងអាចទៅរង្គោះរង្គើ អំណាចរបស់លោកនាយករដ្ឋមន្រ្តី ប្រាយុទ្ធ ចាន់អូចា ដែលកំពុងរងការរិះគន់ ថា គ្រប់គ្រងមិនបានល្អ វិបត្តិកូវីដ។ នៅសប្តាហ៍ មុន សមាជិកសភាមកពីគណបក្សប្រឆាំងបានដាក់ពាក្យទៅគណៈកម្មាការជាតិប្រឆាំងអំពើពុករលួយ ដើម្បីសុំឲ្យស៊ើបអង្កេត ទៅលើការទទួលខុសត្រូវរបស់លោកនាយករដ្ឋមន្រ្តីថៃ ទាក់ទងនឹងភាពយឺតយ៉ាវក្នុងយុទ្ធនាការចាក់វ៉ាក់សាំងនៅប្រទេសថៃ។
គួរបញ្ជាក់ថា លោកប្រាយុទ្ធ ចាន់អូចា ធ្លាប់បានអះអាងថា ការចាក់វ៉ាក់សាំង ជាមធ្យោបាយតែមួយគត់ ដើម្បីងើបចេញពីវិបត្តិលើកនេះ ប៉ុន្តែ គិតរហូតមកដល់ពេលនេះ មានប្រជាជនថៃ មិនដល់១លាននាក់ផង ពោលគឺ ប្រមាណ ៨សែននាក់ ដែលបានចាក់វ៉ាក់សាំង ២ដូស ក្នុងពេលប្រទេសថៃ មានប្រជាជនសរុប ជិត ៧០លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ