អ.ស.ប.-ភូមា

Human Rights Watch ស្នើឲ្យស៊ើបអង្កេតលើការចែកចាយទិន្នន័យរបស់ពលរដ្ឋរ៉ូហ៊ីងយ៉ាដោយ អ.ស.ប.

អង្គការសិទ្ធិមនុស្ស Human Rights Watch បានចោទឧត្តមស្នងការអន្តរជាតិទទួលបន្ទុកជនភៀសខ្លួនហៅកាត់ HCR ពីបទបានចែកចាយទិន្នន័យដែលប្រមូលពីជនជាតិភាគតិចរ៉ូហ៊ីងយ៉ាជាង ៨០០ ០០០នាក់ដែលកំពុងភៀសខ្លួនរស់នៅក្នុងប្រទេសបង់ក្លាដែស។ តាម Human Rights Watch ទិន្នន័យទាំងនោះត្រូវបាន HCR បញ្ជូនទៅឲ្យប្រទេសភូមាដែលជាទីកន្លែងដែលពួករ៉ូហ៊ីងយ៉ាបានភៀសខ្លួនចេញក្រោមការធ្វើទុក្ខបុកម្នេញពីកងទ័ពភូមា។ តែ HCR បានបដិសេធលើការចោទប្រកាន់ និងអះអាងពីនីតិវិធី និងតម្លាភាពក្នុងការរក្សាទុកនូវទិន្នន័យដែលខ្លួនប្រមូលបានពីជនភៀសខ្លួនទាំងអស់នៅក្នុងលោក។

ចុះផ្សាយនៅថ្ងៃ៖ 15/06/2021 - 14:25

ជំរំជនភៀសខ្លួនរ៉ូហ៊ីងយ៉ាក្នុងប្រទេសបង់ក្លាដែស។ AP - Shafiqur Rahman

ដោយ៖ គួច គន្ធារ៉ា

ផ្សាយពាណិជ្ជកម្ម

ក្នុងរយៈពេល ៣ឆ្នាំចុងក្រោយនេះ ឧត្តមស្នងការអន្តរជាតិទទួលបន្ទុកជនភៀសខ្លួនហៅកាត់ (HCR) បានប្រមូលទិន្នន័យរបស់ជនជាតិភាគតិចរ៉ូហ៊ីងយ៉ាជាង ៨០០ ០០០នាក់ដែលកំពុងភៀសខ្លួនរស់នៅក្នុងជំរំនៃប្រទេសបង់ក្លាដែស។ គោលដៅនៃការប្រមូលទិន្នន័យពីពួករ៉ូហ៊ីយ៉ានេះ គឺដើម្បីឲ្យរដ្ឋអំណាចបង់ក្លាដែសយកទៅធ្វើប័ណ្ណសម្គាល់ខ្លួនដែលជាលិខិតស្នាមចាំបាច់ក្នុងការទទួលជំនួយមនុស្សធម៌។ តែបើតាមអង្គការសិទ្ធិមនុស្ស Human Rights Watch (HRW) រដ្ឋអំណាចបង់ក្លាដែសបានបញ្ជូនទិន្នន័យរបស់រ៉ូហ៊ីងយ៉ាទាំងនេះទៅឲ្យរដ្ឋាភិបាលភូមា។ តាម Human Rights Watch ទិន្នន័យដែលប្រមូលពីរ៉ូហ៊ីងយ៉ាមានដូចជារូបថត ស្នាមមេដៃ និងជីវប្រវត្តិរបស់រ៉ូហ៊ីងយ៉ាម្នាក់ៗ រួចចែកចាយទៅឲ្យភូមាដែលជាប្រទេសដែលពួករ៉ូហ៊ីងយ៉ាបានភៀសខ្លួនចេញដើម្បីគេចពីការធ្វើទុក្ខបុកម្នេញរបស់កងទ័ពភូមា។

HRW បានបញ្ជាក់ថា ពួករ៉ូហ៊ីងយ៉ាប្រហែលជាមិនបានដឹងពីការដែលទិន្ន័យរបស់ពួកគេអាចត្រូវបានចែកចាយទៅឲ្យរដ្ឋាភិបាលភូមាទេ។ ចំណែកលោកស្រី Lama Fakih នាយិកាទទួលបន្ទុកវិបត្តិ និងជម្លោះរបស់ HRW ដែលបានជួបសម្ភាសន៍ជនភៀសខ្លួនរ៉ូហ៊ីងយ៉ាចំនួន ២៤នាក់ និងបាននិយាយជាមួយអ្នកជំនាញផ្សេងទៀតបានថ្លែងថា នីតិវិធីរបស់ HCR បានបង្កហានិភ័យបន្ថែមទៀតចំពោះជនភៀសខ្លួនរ៉ូហ៊ីងយ៉ា។ តែ HCR បានច្រានចោលលើការចោទប្រកាន់របស់ HRW។ អ្នកនាំពាក្យ HCR លោកស្រី Andrej Mahecic បានបញ្ជាក់ប្រាប់ AFP ថា HCR មាននីតិវិធីត្រឹមត្រូវ និងច្បាស់លាស់ដើម្បីធានាពីសុវត្ថិភាពលើទិន្នន័យដែល HCR ប្រមូលបានពីការចុះឈ្មោះជនភៀសខ្លួននៅទូទាំងពិភពលោក។

HCR ក៏បានបញ្ជាក់ផងដែរថា ការប្រមូល និងការចែកចាយទិន្នន័យរបស់ពួករ៉ូហ៊ីងយ៉ាត្រូវបានសុំការអនុញ្ញាតជាមុន។ តែតាម HRW ក្នុងចំណោមពួករ៉ូហ៊ីងយ៉ា ២៤នាក់ដែលបានសួរនាំ មាន ២៣នាក់បានឆ្លើយថា ពួកគេមិនត្រូវបានជូនព័ត៌មានច្បាស់លាស់ពីរឿងនេះទេ។ រដ្ឋាភិបាលភូមាបានប្រើទិន្នន័យផ្តល់ដោយបង់ក្លាដែសដើម្បីបញ្ជាក់ពីចំនួនរ៉ូហ៊ីងយ៉ា ៤២០០០នាក់ដែលត្រូវត្រឡប់ចូលភូមាវិញ។ តែ HCR បានគូសបញ្ជាក់ថា ការវិលត្រឡប់របស់ពួករ៉ូហ៊ីងយ៉ាធ្វើឡើងតាមការស្ម័គ្រចិត្ត និងថា រដ្ឋាភិបាលបង់ក្លាដែសមិនបានបង្ខំឲ្យជនភៀសខ្លួនរ៉ូហ៊ីងយ៉ាណាម្នាក់ត្រឡប់ទៅភូមាវិញទេ។ ទោះជាយ៉ាងនេះក្តី HRW យល់ឃើញថា ហានិភ័យកំពុងមានចំពោះជនភៀសខ្លួនរ៉ូហ៊ីងយ៉ា ព្រោះរដ្ឋអំណាចភូមាដឹង និងមានក្នុងដៃនូវបញ្ជីឈ្មោះជនភៀសខ្លួនរ៉ូហ៊ីងយ៉ាងនៅបង់ក្លាដែស៕