លោកគីម ជុងអ៊ុនថា កូរ៉េខាងជើងត្រូវត្រៀមទាំងការចរចានិងការប្រឈមមុខជាមួយអាមេរិក
មេដឹកនាំកូរ៉េខាងជើង លោកគីម ជុងអ៊ុនបានប្រកាសថា កូរ៉េខាងជើង ត្រូវត្រៀមខ្លួន ទាំងព្រម ទាំងការចរចា ហើយនិងការប្រឈមមុខតទល់ជាមួយ អាមេរិក។ នៅក្នុងមហាសន្និបាតគណៈកម្មាធិការមជ្ឈិមបក្ស ពលករកូរ៉េខាងជើង កាលពីថ្ងៃព្រហស្បតិ៍ទី ១៧មិថុនា ប្រមុខដឹកនាំកូរ៉េខាងជើងបានសង្កត់ធ្ងន់ថា ប្រទេសរបស់លោកត្រូវតែត្រៀមខ្លួន ឲ្យបានពេញលេញ សម្រាប់ប្រឈមមុខ។ នេះបើតាមការចុះផ្សព្វផ្សាយរបស់ទីភ្នាក់ងារព័ត៌មានផ្លូវរដ្ឋកូរ៉េខាងជើង KCNA នៅថ្ងៃសុក្រទី ១៨មិថុនា។
ចុះផ្សាយនៅថ្ងៃ៖
ស្តាប់ - ០២:៤៧
ថ្លែងទៅកាន់មហាសន្និបាតគណៈកម្មាធិការមជ្ឈិមបក្សពលករកូរ៉េខាងជើង លោកគីម ជុងអ៊ុន បានលើកឡើងពីសារៈសំខាន់ ដែលកូរ៉េខាងជើងត្រូវត្រៀមខ្លួន សម្រាប់ការចរចា និង សម្រាប់ការប្រឈមមុខ ជាមួយអាមេរិក ជាពិសេស គឺការត្រៀមខ្លួនឲ្យបានគ្រប់លក្ខណៈ សម្រាប់ ការប្រឈមមុខ ដើម្បីការពារ កិត្តិយស ភាពថ្លៃថ្នូររបស់កូរ៉េខាងជើង។ តាមការចុះផ្សាយរបស់ទីភ្នាក់ងារ ព័ត៌មាន កូរ៉េខាងជើង KCNA លោក គីម ជុងអ៊ុនបានប្រកាសយ៉ាងដូច្នេះ នៅបន្ទាប់ពីលោកបានវិភាគលម្អិត នយោបាយរបស់រដ្ឋបាលអាមេរិកថ្មី។
របបព្យុងយ៉ាងធ្លាប់បានចោទប្រកាន់រដ្ឋបាលអាមេរិកថ្មី ក្រោមអាណត្តិដឹកនាំរបស់លោកចូ បៃដិនថា មាននយោបាយ អរិភាព ចំពោះ កូរ៉េខាងជើង។ ដោយអះអាងថា នឹងប្រើនយោបាយការទូតដើម្បីជំរុញ ឲ្យកូរ៉េខាងជើង លះបង់ចោលអាវុធនុយក្លេអ៊ែរ លោកចូ បៃដិនធ្លាប់បាននិយាយថា លោកមិនទាត់ចោល គំនិត រៀបចំជំនួបកំពូលជាមួយមេដឹកនាំកូរ៉េខាងជើង។ ប៉ុន្តែ ផ្ទុយពីប្រធានាធិបតីលោកដូណាល់ ត្រាំ ដែលបើកជំនួបកំពូលជាមួយ លោក គីម ជុងអ៊ុន ដល់ទៅ ២ដង ដោយ គ្មានចេញលទ្ធផលអ្វីនោះ លោកចូ បៃដិនធ្លាប់និយាយ ថា បើគ្មានផែនការច្បាស់លាស់សម្រាប់ការចរចាស្តីពីអាវុធនុយក្លេអ៊ែរ កូរ៉េខាងជើង លោកនឹងមិនជួបមេដឹកនាំកូរ៉េខាងជើង។
ប្រធានាធិបតីអាមេរិក ទទួលស្គាល់ថា ពិតជាមានការលំបាក ដើម្បីបញ្ចុះបញ្ចូលឲ្យកូរ៉េខាងជើង លះបង់ចោល អាវុធនុយក្លេអ៊េរ។ រដ្ឋបាលអាមេរិកទាំង៤កន្លងមក បរាជ័យ មិនបានសម្រេចតាមគោលដៅនោះទេ។
ចាប់តាំងពីឆ្នាំ ២០០៦ កូរ៉េខាងជើង បានបាញ់សាកល្បងគ្រាប់នុយក្លេអ៊ែរ ចំនួន ៦ដង និងកំពុងជាប់ក្នុងទណ្ឌកម្មសេដ្ឋកិច្ច របស់អង្គការសហប្រជាជាតិសម្រាប់កម្មវិធីអាវុធនុយក្លេអ៊ែរ។ តាម ប្រធានក្រុមសិក្សាកូរ៉េខាងជើង នៃវិទ្យាស្ថានសេអ៊ូល កូរ៉េខាងជើង អាច យល់ព្រម កាត់បន្ថយ អាវុធនុយក្លេអ៊ែរនិងផ្អាកកម្មវិធី នុយក្លេអ៊ែរយោធា ដើម្បីជាថ្នូរនឹងការដកចោលទណ្ឌកម្មសេដ្ឋកិច្ច។ ទណ្ឌកម្មរបស់សហគមន៍អន្តរជាតិដែលបានរុញច្រានសេដ្ឋកិច្ចកូរ៉េខាងជើង ធ្លាក់ចុះដុនដាបរហូតមក។
នៅថ្ងៃពុធ ទី ១៦ មិថុនា ប្រមុខដឹកនាំកូរ៉េខាងជើង លោកគីម ជុងអ៊ុន បាននិយាយទទួលស្គាល់ថា វិបត្តិជំងឺកូវីដដែលតម្រូវឲ្យកូរ៉េខាងជើងបិទព្រំដែនជាមួយចិន ហើយនិង មហន្តរាយធម្មជាតិបានធ្វើឲ្យ កូរ៉េខាងជើង កំពុងជួបវិបត្តិខ្វះស្បៀង។
ប៉ុន្តែ របាយការណ៍របស់អ្នកជំនាញនៃក្រុមភ្នាក់ងារសម្ងាត់អាមេរិកធ្លាប់បានបង្ហាញកាលពីខែមេសាកន្លងមកថា កូរ៉េខាងជើងអាចសាកល្បងអាវុធនុយក្លេអ៊ែរម្តងទៀត នៅឆ្នាំនេះ ដើម្បី ដាក់សម្ពាធឲ្យរដ្ឋបាលលោកចូ បៃដិន ត្រលប់ចូលតុចរចា។ ដើម្បី បង្កើតបរិយាកាស អស្ថិរភាព នៅក្នុងតំបន់ កូរ៉េខាងជើង អាចសាកល្បងកម្មវិធីអាវុនុយក្លេអ៊ែរ និងមីស៊ីលបាលីស្ទិក ដែលជាការផ្គើនទៅនឹងបម្រាមរបស់អង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ