បារម្ភខ្លាចមេរោគកូវីដដែលតា ថៃចាត់វិធានការរឹតបន្តឹងនៅបាងកក និងខេត្តជុំវិញ
ប្រឈមនឹងការផ្ទុះករណីឆ្លងថ្មីនៃជំងឺកូវីដ ១៩ រដ្ឋាភិបាលថៃ បានសម្រេចកាលពីថ្ងៃសៅរ៍ ទី ២៦ មិថុនា បិទទីក្រុងបាងកក និងខេត្តជុំវិញ ក្នុងរយៈពេល ១ខែ គិតចាប់តាំង ពីថ្ងៃចន្ទទី ២៨ មិថុនា។ នៅថ្ងៃអាទិត្យ ក្រសួងសុខាភិបាលថៃបានប្រកាសតួលេខឆ្លងថ្មី ដែលមានចំនួន ៣៩៩៥នាក់ និងមានមនុស្សស្លាប់ ៤២នាក់ នៅក្នុងរយៈពេល ១ថ្ងៃសៅរ៍ម្សិលមិញ។
ចុះផ្សាយនៅថ្ងៃ៖
ស្តាប់ - ០២:៤៨
នៅប្រទេសថៃ ការកើនឡើងនៃករណីឆ្លងថ្មីនៅទីក្រុងបាងកកបានជំរុញឲ្យរដ្ឋាភិបាលចាត់វិធានការរឹតបន្តឹង ថ្មី ដែលត្រូវចូលជាធរមាន នៅថ្ងៃចន្ទស្អែក។ ទៅតាមវិធានការថ្មី របស់រដ្ឋាភិបាលថៃ នៅទីក្រុងបាងកក និងនៅខេត្ត៥ ជុំវិញបាងកក ភោជនីយដ្ឋានត្រូវបិទទ្វារ ចំណែក ផ្សារទំនើបត្រូវបិទទ្វារ នៅម៉ោង៩យប់។ សកម្មភាពជួបជុំដែលមានមនុស្សចាប់ពី ២០នាក់ឡើងទៅ ត្រូវហាមឃាត់។
ការដ្ឋានក្នុងទីក្រុងបាងកក និងនៅតំបន់ចំនួន៥ខាងលើ ត្រូវផ្អាក និងត្រូវបិទខ្ទប់ មិនឲ្យមានសកម្មភាពចេញចូល តទៅទៀត។ អាជ្ញាធរថៃ សម្រេចបិទការដ្ឋានសំណង់ បន្ទាប់ពីមានករណីឆ្លងខ្លាំង នៅតាមការដ្ឋានសំណង់ក្នុងក្រុងបាងកក។ តាំងពីខែ ឧសភា គេរកឃើញ មានសំបុកឆ្លងកូវីដ ចំនួន ៣៧ នៅការដ្ឋានសំណង់ នៅបាងកក។ បាងកកដែលមានការដ្ឋានសំណង់សរុប ប្រមាណ ៥៧៥កន្លែង និងមានកម្មករធ្វើការជាង៨ម៉ឺននាក់។
តាមអាជ្ញាធរថៃ គេនឹងរឹតបន្តឹងផងដែរ ការត្រួតពិនិត្យ នៅតាមច្រកចេញចូល រវាងបាងកក និងខេត្តជុំវិញ ទាំង ៥ ដើម្បីកាត់បន្ថយដំណើរចរ របស់កម្មករសំណង់។
ចាប់តាំងពីខែមេសា ករណីឆ្លងកូវីដ កើនឡើងសឹងជារៀងរាល់ថ្ងៃ នៅប្រទេសថៃ។ នៅថ្ងៃអាទិត្យ អាជ្ញាធរសុខភាពថៃបានប្រកាសរកឃើញមានករណីឆ្លងថ្មី ចំនួន ៣៩៩៥ និងមនុស្សស្លាប់ ៤២នាក់ ក្នុងរយៈពេល មួយថ្ងៃសៅរ៍ម្សិលមិញ ដែលជាហេតុធ្វើឲ្យថៃ មានករណីអ្នកឆ្លងកូវីដ កើនឡើងសរុបដល់ជាង ២៤៤០០០នាក់ និងមនុស្សស្លាប់ជាង ១៩០០នាក់ គិតចាប់តាំងកើតមានជំងឺកូវីដនៅប្រទេសថៃ នៅដើមឆ្នាំ ២០២០។
វិធានការរឹតបន្តឹង ដើម្បីទប់ស្កាត់ករណីឆ្លងកូវីដ នៅទីក្រុងបាងកក ធ្វើឡើង នៅតែប៉ុន្មានថ្ងៃមុនដែល រដ្ឋាភិបាលថៃ គ្រោងបើកជាផ្លូវការ ចាប់ពីថ្ងៃទី ១កក្កដា ទទួលអ្នកទេសចរ ដែលចាក់វ៉ាក់សាំងរួចហើយ នៅកោះភូកេត ដោយមិនចាំបាច់ ត្រូវធ្វើចត្តាឡីស័ក។
ដើម្បីសង្រ្គោះវិស័យទេសចរណ៍ដែលរងគ្រោះខ្លាំងដោយសារវិបត្តិកូវីដ លោកនាយករដ្ឋមន្រ្តីប្រាយុទ្ធ ចាន់អូចា គ្រោងនឹងបើកប្រទេសឡើងវិញ ទាំងស្រុង នៅខែតុលាខាងមុខ។ ដើម្បីធ្វើដូច្នេះបាន រដ្ឋាភិបាលរបស់លោកត្រូវសម្រេចគោលដៅ ចាក់វ៉ាក់សាំង ដល់ប្រជាជន ឲ្យបាន៥០លាននាក់ ក្នុងរយៈពេល៤ខែខាងមុខ។
ប៉ុន្តែ នៅក្នុងស្ថានភាពជាក់ស្តែង លោកនាយករដ្ឋមន្រ្តី ប្រាយុទ្ធ ចាន់អូចា កំពុងរងការរិះគន់ ព្រោះថា គិតរហូតមកដល់ពេលនេះ មានរយៈពេល ៥ខែមកហើយ រដ្ឋាភិបាលថៃបើកយុទ្ធនាការចាក់វ៉ាក់សាំង ដ៏យឺតយ៉ាវ ដោយចាក់បានប្រជាជនតែ ១០ភាគរយប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ