កូវីដ១៩៖ អូស្ត្រាលី រឹតបន្តឹងវិធានការបន្ថែម ក្រោយបិទខ្ទប់ក្រុងហើយ ចំនួនឆ្លងថ្មីនៅតែកើន
យុទ្ធសាស្ត្រ “ហ្សេរ៉ូកូវីដ” របស់អូស្ត្រាលី កំពុងរងការគំរាមកំហែងពីមេរោគកូវីដបំប្លែងដែលតា។ លើកការបិទខ្ទប់ចេញវិញ នៅថ្ងៃទី ២៨សីហា ទំនងជាមិនអាចធ្វើទៅបានតាមគម្រោងទេ។ ស៊ីដនីក្រុងដ៏ធំជាងគេបំផុតរបស់អូស្ត្រាលី ដែលមានប្រជាជនរស់នៅសរុបប្រមាណជាង១០លាននាក់ បានប្រកាសរឹតបន្តឹងវិធានការបន្ថែមទៀត ព្រោះករណីឆ្លងថ្មីបានឡើងខ្ពស់ បំបែកកំណត់ត្រាចាស់ជារៀងរាល់ថ្ងៃ។ ៤៦៦នាក់ក្នុងមួយថ្ងៃសៅរ៍ទី ១៤សីហា។ អាជ្ញាធរបានចាត់ទុកថ្ងៃនេះ ជាថ្ងៃដ៏គួរឱ្យព្រួយបារម្ភខ្លាំងបំផុត គិតចាប់តាំងពីផ្ទុះជំងឺរាតត្បាតកូវីដ១៩មក។
ចុះផ្សាយនៅថ្ងៃ៖
ស្តាប់ - ០១:៥៣
ធ្លាប់គិតថាអូស្ត្រាលីដូចមិនដូចប្រទេសក្នុងតំបន់ផ្សេង ប៉ុន្តែខុសស្រលះ។ ពេលនេះអូស្ត្រាលីកំពុងប្រឈមនឹងការគំរាមកំហែងកូវីដយ៉ាងខ្លាំង និងជាវេលាដ៏គួរឱ្យព្រួយបារម្ភបំផុត។ អូស្ត្រាលីកំពុងមានសង្គ្រាមប្រឆាំងនឹងកូវីដ ភាពលំបាកខ្លាំងនឹងកើតឡើង នៅរវាងខែកញ្ញា និងតុលាខាងមុខ។ នេះបើតាមប្រសាសន៍របស់លោកស្រីនាយករដ្ឋមន្ត្រីរដ្ឋ Nouvelle-Galles du Sud។
ប្រឈមនឹងស្ថានភាពនេះ និងបន្ថែមពីលើការបិទខ្ទប់ដែលចូលជាធរមានសម្រាប់៨សប្តាហ៍ ហើយនៅតាមទីក្រុងធំៗ ដូចជា ស៊ីដនី មែលប៊ន និងរដ្ឋធានីកង់បេរ៉ា អូស្ត្រាលីនឹងបិទខ្ទប់រដ្ឋNouvellle Galles du Sud ទាំងមូលតែម្តងជាលើកទីមួយ គិតចាប់តាំងពីផ្ទុះកូវីដមក ចាប់ពីរសៀលថ្ងៃសៅរ៍ទី ១៤សីហា នេះតែម្តង និង បន្តឹងវិធានការបន្ថែមទៀត ព្រោះវិធានការចាស់ពុំអាចទប់ស្កាត់ការចម្លងរាតត្បាតកូវីដដែលតាបាន។
ចាប់ពីថ្ងៃចន្ទទី ១៦សីហាទៅ ការល្មើសបម្រាមបិទខ្ទប់ នឹងត្រូវរងការផាកពិន័យ ដល់ទៅ ៥ពាន់ដុល្លារ ទល់នឹង១ពាន់ដុល្លារកាលពីមុន។ នគរបាល នឹងដើរត្បាតកាន់តែខ្លាំង និងយាមនៅគ្រប់ច្រកចាំផាក និងបានបញ្ចេញទាហានជាងមួយរយនាក់ទៀតមកបន្ថែម សម្រាប់ត្រួតពិនិត្យប្រជាពលរដ្ឋឱ្យគោរពវិធានការបិទខ្ទប់។ ការអនុញ្ញាតឱ្យចេញពីក្រុង ក៏នឹងត្រូវរឹតបន្តឹងដែរ ដើម្បីកុំឱ្យមានករណីនាំមេរោគទៅចម្លងទៅតំបន់ផ្សេង។
ពលរដ្ឋមានសិទ្ធិចេញក្រៅផ្ទះ ដើម្បីហាត់ប្រាណ ទៅធ្វើការណាដែលចាំបាច់-មិនអាចធ្វើការនៅផ្ទះបាន និងដើម្បីទៅទិញម្ហូបតែប៉ុណ្ណោះ។
អាជ្ញាធរអូស្ត្រាលីថែមទាំងបានដាក់លក្ខខណ្ឌទៀតថា វិធានការអាចបន្ធូរបន្ថយបាន ដរាបណាតែមានការចាក់ថ្នាំបង្ការប្រឆាំងកូវីដបានគ្រប់គ្រាន់។ ប៉ុន្តែការចាក់ថ្នាំបង្ការនៅអូស្រ្តាលីមានការយឺតយ៉ាងខ្លាំងណាស់។ សំឡេងរិះគន់មានមកពីគ្រប់ទិសទី។ គិតមកទល់ពេលនេះមានពលរដ្ឋមិនដល់មួយភាគបួនទេ បានចាក់វ៉ាក់សាំងរួចពេញលេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ