ប្រធានCIAអាមេរិកជួបប្រជុំជាសម្ងាត់ជាមួយមេដឹកនាំតាលីបង់នៅទីក្រុងកាប៊ុល
ប្រធានទីភ្នាក់ងារស៊ើបការណ៍សម្ងាត់អាមេរិក CIA លោក វីល្លៀម បឺន (William Burns) បានជួបជាសម្ងាត់ជាមួយមេដឹកនាំកំពូលតាលីបង់លោក ម៉ុលឡា បារ៉ាដា កាលពីថ្ងៃចន្ទ ទី២៣ សីហា។ កិច្ចប្រជុំនេះត្រូវបានរៀបចំឡើង ខណៈដែលសហរដ្ឋអាមេរិក កំពុងមមាញឹកដឹកជម្លៀសពលរដ្ឋ និងសម្ព័ន្ធមិត្តចេញពីអាហ្វហ្កានីស្ថានតាមកាលកំណត់នាថ្ងៃទី ៣១ ខែសីហាខាងមុខ។
ចុះផ្សាយនៅថ្ងៃ៖
ស្តាប់ - ០២:២០
មន្ត្រីក្រោមរដ្ឋបាលរបស់លោកចូ បៃដិន មានទំនាក់ទំនងជាប្រចាំជាមួយមន្រ្តីតាលីបង់ទាំងនៅក្នុងទឹកដីអាហ្វហ្កានីស្ថាន និងនៅទីក្រុងដូហាប្រទេសកាតាក្នុងអំឡុងពេលបំពេញប្រតិបត្តិការជម្លៀសមនុស្សចេញពីទីក្រុងកាប៊ុល ។
ក៏ប៉ុន្តែ កិច្ចប្រជុំសម្ងាត់រវាងប្រធាន CIA អាមេរិក ជាមួយសហស្ថាបនិកតាលីបង់គឺជាកិច្ចពិភាក្សាដ៏ធំបំផុតរាប់ចាប់តាំងពីរដ្ឋធានីកាប៊ុលធ្លាក់ក្នុងដៃរបស់ពួកតាលីបង់នៅថ្ងៃទី ១៥ សីហាមក។ កាសែត The Washington Post បានរាយការណ៍ជាលើកដំបូងបង្អស់ពីជំនួបសម្ងាត់នេះកាលថ្ងៃអង្គារ ទី២៤ សីហាម្សិលមិញ។
ប្រធានទីភ្នាក់ងារស៊ើបការណ៍សម្ងាត់អាមេរិកលោក វីល្លៀម បឺន គឺជាអ្នកការទូតដែលមានបទពិសោធន៍ខ្លាំងបំផុតម្នាក់របស់ប្រធានាធិបតីអាមេរិកលោក ចូ បៃដិន។ ចំណែកលោកម៉ុលឡា អាប់ឌុល ហ្កានី បារ៉ាដា វិញ គឺជាមេដឹកនាំកំពូលម្នាក់របស់របបតាលីបង់ និងជាអ្នកដែលបានដឹកនាំការិយាល័យនយោបាយរបស់ចលនាតាលីបង់នៅប្រទេសកាតា។
អ្នកនាំពាក្យ CIA មិនបានបញ្ជាក់ប្រាប់អ្វីសោះពីកិច្ចប្រជុំនេះដល់ទីភ្នាក់ងារព័ត៌មានបារាំង AFP និងបានប្រាប់ថា CIA មិនដែលនិយាយឬក៏ពិភាក្សាអ្វីអំពីការធ្វើដំណើររបស់ប្រធានខ្លួនឡើយ។
ចំណែកកាសែត The Washington Post ដែលបានដកស្រង់ប្រភពអនាមិកអាមេរិកអំពីកិច្ចប្រជុំខាងលើ ក៏មិនទទួលបានខ្លឹមសារនៃកិច្ចពិភាក្សារវាងមេដឹកនាំ តាលីបង់ និងមេ CIA អាមេរិកដែរ។ ប៉ុន្តែមានការលើកឡើងថា អ្នកទាំងពីរបានពិភាក្សាគ្នាជុំវិញការពន្យារពេលនៃបេសកកម្មរបស់អាមេរិកក្នុងការជម្លៀសមនុស្សចេញចេញពីអាហ្វហ្កានីស្ថាន។
គួរជ្រាបថា អាមេរិកបានកំណត់យកថ្ងៃទី ៣១ ខែសីហា ជាថ្ងៃបិទបញ្ចប់ប្រតិបត្តិការដឹកជម្លៀសពលរដ្ឋអាមេរិក និងសម្ព័ន្ធមិត្តអាហ្វហ្កានីស្ថានរាប់ម៉ឺននាក់ចេញពីទីក្រុងកាប៊ុល។ ប្រឈមនឹងស្ថានការណ៍ជ្រួលច្របល់ដែលកើតមានឡើងជារៀងរាល់ថ្ងៃនៅព្រលានយន្តហោះក្រុងកាប៊ុល សហភាពអឺរ៉ុប បានអំពាវនាវឲ្យអាមេរិក ពន្យារពេលបិទបញ្ចប់បេសកកម្ម។ ប៉ុន្តែ អ្នកនាំពាក្យរបបតាលីបង់ បានព្រមានកាលថ្ងៃចន្ទដើមសប្តាហ៍នេះ មិនឲ្យអាមេរិកបន្តទុកកងទ័ពនៅព្រលានយន្តហោះលើសពីថ្ងៃទី៣១ សីហាជាដាច់ខាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ