បារាំងឃុំខ្លួនជនអាហ្វហ្កានីស្ថានម្នាក់ ដែលគេសង្ស័យជាសមាជិកក្រុមតាលីបង់ បន្ទាប់ពីជម្លៀសមកដល់ទឹកដីបារាំង
សហរដ្ឋអាេមរិក កំពុងតែសំរុកជម្លៀសមនុស្ស ចេញពីទីក្រុងកាប៊ុល ខណៈដែលឱសានុវាទចុងក្រោយ ថ្ងៃទី៣១សីហា កាន់តែខិតជិតមកដល់។ គិតពីថ្ងៃទី១៤សីហាមក សហរដ្ឋអាមេរិក បានជម្លៀសមនុស្ស បានសរុប ប្រមាណ៤៨០០០នាក់ ដោយក្នុងនោះ មាន១១០០០នាក់ នៅក្នុងរវាង១២ម៉ោងចុងក្រោយ កាលពីថ្ងៃចន្ទទី២៣សីហាម្សិលមិញ។ ប្រទេសផ្សេងទៀត មានអង់គ្លេស អាល្លឺម៉ង់ និងបារាំងជាដើម ក៏កំពុងតែប្រឹងប្រែង ប្រញាប់ជម្លៀសមនុស្សចេញពីក្រុងកាប៊ុលដែរ។ តែយ៉ាងណា ការជម្លៀសមនុស្សដោយតក់ក្រហល់ ក្នុងចំនួនច្រើនបែបនេះ កំពុងតែបង្កឲ្យមានការព្រួយបារម្ភ ថាវាអាចមានក្រុមជនជីហាតអ៊ីស្លាម ឬសមាជិកក្រុមតាលីបង់ ដោយមកជាមួយ។ ជាក់ស្តែង អាជ្ញាធរបារាំង បានសម្រេចឃុំខ្លួនបណ្តោះអាសន្ន ជនជាតិអាហ្វហ្កានីស្ថានម្នាក់ បន្ទាប់ពីជននេះត្រូវបានគេជម្លៀសតាមយន្តហោះ មកដល់ទីក្រុងប៉ារីស។
ចុះផ្សាយនៅថ្ងៃ៖
ស្តាប់ - ០១:៥៩
ជនជាតិអាហ្វហ្កានីស្ថានម្នាក់ ក្នុងចំណោម៥នាក់ ដែលស្ថិតក្នុងការសង្ស័យ ត្រូវបានអាជ្ញាធរបារាំង សម្រេចឃុំខ្លួនបណ្តោះអាសន្ន បន្ទាប់ពីជននោះ ត្រូវបានទាហានបារាំង ជម្លៀសចេញពីទីក្រុងកាប៊ុល មកដល់ទឹកដីបារាំង។
យោងតាមលិខិតប្រកាសរបស់ក្រសួងមហាផ្ទៃបារាំង ជនអាហ្វហ្កានីស្ថានម្នាក់ អាយុ២៦ឆ្នាំ ដែលត្រូវគេដាក់ឃុំបណ្តោះអាសន្ននោះ បានទទួលស្គាល់ថាខ្លួន ធ្លាប់ជាសមាជិករបស់ក្រុមតាលីបង់ និងធ្លាប់បានកាន់អាវុធ យាមច្រកចេញចូលមួយកន្លែងនៅក្រុងកាប៊ុល ឲ្យក្រុមតាលីបង់ថែមទៀតផង។ ចំណែកមនុស្ស៤នាក់ផ្សេងទៀត ដែលស្ថិតនៅក្នុងការសង្ស័យ គឺមានជាប់ពាក់ព័ន្ធនឹងជនម្នាក់នេះ។
សូមបញ្ជាក់ថា ជនជាតិអាហ្វហ្កានីស្ថានទាំង៥នាក់ ពេលមកដល់ទឹកដីបារាំងភ្លាម ត្រូវបាន ការិយាល័យសន្តិសុខផ្ទៃក្នុងបារាំង ចេញលិខិតបង្គាប់ឲ្យស្ថិតនៅក្រោមវិធានការតាមដាន និងត្រួតពិនិត្យរដ្ឋបាល (Micas) ដោយយោងតាមច្បាប់ប្រឆាំងភេរវកម្មបារាំង។ ក៏ប៉ុន្តែជនម្នាក់ក្នុងចំណោម៥នាក់ បានដើរចេញក្រៅដែនបរិវេន ដែលអាជ្ញាធរបានកំណត់ អស់រយៈពេលប៉ុន្មាននាទី ទើបអាជ្ញាធរបារាំងបានសម្រេច ដាក់ជននោះក្នុងការឃុំឃាំងបណ្តោះអាសន្ន។ នេះបើផ្អែក តាមការបញ្ជាក់ របស់លោក Gérald Darmanin រដ្ឋមន្ត្រីក្រសួងមហាផ្ទៃបារាំង នៅវិទ្យុ franceinfo។
ដោយឡែក លោក Gabriel Attal អ្នកនាំពាក្យរដ្ឋាភិបាលបារាំង ដែលបានផ្តល់បទសម្ភាសន៍ ដល់ទូរទស្សន៍ BFMTV នៅព្រឹកថ្ងៃអង្គារនេះ បានឲ្យដឹងថា ជនអាហ្វហ្កានីស្ថានម្នាក់ ដែលត្រូវបានគេសម្រេចឃុំខ្លួនបណ្តោះអាសន្ននោះ គឺជាមនុស្សដែលបានចូលរួមយ៉ាងសកម្ម នៅក្នុងការជួយជម្លៀសបុគ្គលិករបស់ស្ថានទូតបារាំង នៅទីក្រុងកាប៊ុល។
យ៉ាងណាក៏ដោយ អ្នកនាំពាក្យរដ្ឋាភិបាលបារាំង បានអះអាងថា រដ្ឋាភិបាលនឹងមិនលេងសើច ជាមួយសន្តិសុខរបស់ប្រជាជនបារាំងទេ។ លោកបញ្ជាក់ថា ជនជាតិអាហ្វហ្កានីស្ថានទាំងអស់ ដែលត្រូវបានកងទ័ពបារាំង ជម្លៀសចេញពីក្រុងកាប៊ុល គឺសុទ្ធតែត្រូវបានតាមដានអង្កេតប្រវត្តិ យ៉ាងល្អិតល្អន់ នៅឯមូលដ្ឋានទ័ពបារាំង ទីក្រុងអាប៊ូដាប៊ី មុននឹងដឹកមកដល់ទឹកដីបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ