អូស្រា្តលីកំពុងស្គាល់សន្ទុះកំណើនករណីឆ្លងកូវីដ១៩ដោយមានជាង ១ ០០០ករណីក្នុងរយៈពេល ២៤ម៉ោង
នៅក្នុងប្រទេសអូស្រា្តលី ចំនួនករណីឆ្លងកូវីដ១៩ កំពុងហក់ឡើងខ្ពស់ដោយមានជាង ១០០០ករណីក្នុងរយៈពេល ២៤ម៉ោង។ នេះជាអត្រាឆ្លងមួយខ្ពស់ដែលអូស្រា្តលីមិនធ្លាប់ប្រទះ ខណៈដែលមានប្រជាជនមិនដល់ ១០០០នាក់ផងបានស្លាប់ដោយជំងឺកូវីដ១៩។ សន្ទុះកំណើនករណីឆ្លងពេលនេះបានកើតមានខ្លាំងនៅក្នុងទីក្រុងស៊ីនីដែលកំពុងស្ថិតក្នុងការបិទខ្ទប់តាំងពី ២ខែកន្លងមក។ ប្រឈមនឹងសន្ទុះកំណើនករណីឆ្លងនេះ រដ្ឋអំណាចបានបោះបង់ចោលនូវយុទ្ធសាស្រ្តហ្សេរ៉ូកូវីដ និងផ្តោតការយកចិត្តទុកដាក់លើយុទ្ធនាការចាក់វ៉ាក់សាំង។
ចុះផ្សាយនៅថ្ងៃ៖
ស្តាប់ - ០១:៥៤
ធ្លាប់ជាប្រទេសដែលទទួលបានការសាទរពីការគ្រប់គ្រងជំងឺកូវីដ១៩ បានល្អក្នុងឆ្នាំ ២០២០ អូស្រា្តលីហាក់កំពុងផុងខ្លួនកាន់តែជ្រៅទៅក្នុងកូវីដ១៩ នៅពេលនេះ។ គ្រាន់តែក្នុងរយៈពេល ២៤ម៉ោងចុងក្រោយរាប់ត្រឹមព្រឹកថ្ងៃព្រហស្បតិ៍ ទី២៦ សីហា អូស្រា្តលីមានករណីឆ្លងថ្មីចំនួន ១០២៩ករណី។ នេះជាតួលេខមួយខ្ពស់ខ្លាំងដែលអូស្រា្តលីមិនធ្លាប់ស្គាល់គិតតាំងពីថ្ងៃផ្ទុះជំងឺកូវីដ១៩ ដំបូង និងដែលជំងឺមួយនេះបានសម្លាប់ប្រជាជនអូស្រា្តលីមិនដល់ ១ ០០០នាក់ផង។ ប្រឈមនឹងសន្ទុះកំណើនករណីឆ្លងនេះ រដ្ឋអំណាចបានសម្រេចពន្យារការបិទខ្ទប់ទីក្រុងស៊ីនីរហូតដល់ដំណាច់ខែកញ្ញា។
ក្រៅពីទីក្រុងស៊ីនី ការបិទខ្ទប់ក៏មាននៅតាមតំបន់ជនបទមួយចំនួនក្នុងរដ្ឋ New South Wales ដែលមានផ្ទុះករណីឆ្លងមួយចំនួននាប៉ុន្មានថ្ងៃចុងក្រោយនេះ ពិសេសនៅក្នុងតំបន់ដែលរស់នៅច្រើនដោយសហគមន៍ជនជាតិដើម។ អ្វីជាការកត់សម្គាល់ កំណើនករណីឆ្លងថ្មីបានកើតឡើងនៅក្នុងទីក្រុងស៊ីនីដែលបានរងការបិទខ្ទប់តាំងពី ២ខែមកហើយ។ ប្រឈមនឹងស្ថានការណ៍មួយនេះ រដ្ឋអំណាចក្រុងស៊ីនីបានសម្រេចបោះបង់ចោលវិញនូវយុទ្ធសាស្រ្តហ្សេរ៉ូកូវីដដោយងាកទៅបង្កើនយុទ្ធសាស្រ្តចាក់វ៉ាក់សាំងវិញម្តង។ យុទ្ធសាស្រ្តមួយនេះហាក់កំពុងមានសន្ទុះពីមួយថ្ងៃទៅមួយថ្ងៃ និងកំពុងត្រូវបានរដ្ឋអំណាចលើកទឹកចិត្តបន្ថែម។
គ្រាន់តែនៅថ្ងៃពុធ ទី២៥ សីហា មានមនុស្សជាង ៣៣០ ០០០នាក់បានចាក់វ៉ាក់សាំង។ ទោះបីជាប្រទេសកំពុងប្រឈមនឹងកំណើនករណីឆ្លងក៏ដោយក៏រដ្ឋអំណាចបានប្រកាសដោយសន្យាថា អ្នកដែលបានចាក់វ៉ាក់សាំងរួចហើយនឹងអាចរកឃើញឡើងវិញនូវសេរីភាពមួយចំនួនពីពេលនេះទៅពាក់កណ្តាលខែកញ្ញាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ