AIEA ៖ កូរ៉េខាងជើងទំនងជាដាក់ឱ្យដំណើរការមជ្ឈមណ្ឌលនុយក្លេអ៊ែរឡើងវិញ
នៅកូរ៉េខាងជើង ម៉ាស៊ីនប្រតិករនុយក្លេអ៊ែរមួយ នៅមជ្ឈមណ្ឌលនុយក្លេអ៊ែរ Yongbyon ដែលផលិតសារធាតុភ្លុយតូនីញ៉ូម ទំនងជាកំពុងមានដំណើរការឡើងវិញ។ នេះបើតាមរបាយការណ៍ប្រចាំឆ្នាំរបស់ទីភ្នាក់ងារថាមពលបរមាណូអន្តរជាតិ ហៅកាត់ថាអាអ៊ីអឺអា AIEA។ ភ្នាក់ងារបានសម្តែងការព្រួយបារម្ភយ៉ាងខ្លាំងចំពោះសកម្មភាពរបស់កូរ៉េខាងជើង។
ចុះផ្សាយនៅថ្ងៃ៖
មជ្ឈមណ្ឌលនុយក្លេអ៊ែរYongbyon ដែលជាបានផ្អាកសកម្មភាពតាំងពីដើមខែធ្នូឆ្នាំ២០១៨មក ទំនងមានដំណើរការឡើងវិញ ចាប់ពីដើមខែកក្កដា ២០២១មក។ គេសង្កេតឃើញមានសញ្ញាជាច្រើន ដែលបញ្ជាក់អំពីដំណើរការនៃម៉ាស៊ីនប្រតិករនុយក្លេអ៊ែរ មានអាទិ៍ ការបង្ហូរទឹកសម្រាប់បញ្ចុះកម្តៅម៉ាស៊ីន។ នេះបើតាមការលម្អិតនៅក្នុងរបាយការណ៍ប្រចាំឆ្នាំរបស់ទីភ្នាក់ងារថាមពលបរមាណូ AIEA។
សម្រាប់AIEA ម៉ាស៊ីនប្រតិករនុយក្លេអ៊ែរដែលមានសមត្ថភាពដល់ទៅ៥មេហ្កាវ៉ាត់ ចាប់ដំណើរការឡើងវិញ មានន័យថាព្យុងយ៉ាងចាប់អភិវឌ្ឍកម្មវិធីនុយក្លេអ៊ែររបស់ខ្លួនឡើងវិញ ដោយរំលោភយ៉ាងងងើលសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ។ ការដាក់ឱ្យដំណើរការមជ្ឈមណ្ឌលនុយក្លេអ៊ែរឡើងវិញ បូកនឹងដំណឹងដែលគេទើបទទួលបានកាលពីថ្មីៗថាព្យុងយ៉ាងបានប្រើមន្ទីរពិសោធន៍វិទ្យុគីមី នៅក្បែរមជ្ឈមណ្ឌលនុយក្លេអ៊ែរ សម្រាប់ញែកសារធាតុភ្លុយតូនីញ៉ូមចេញពីសំណល់ចំហេះរបស់ម៉ាស៊ីនប្រតិករ ជាតំណាងនៃការព្រួយបារម្ភយ៉ាងក្រែលែង។ នេះបើតាមរបាយការណ៍ដដែល។
សូមបញ្ជាក់ថា មជ្ឈមណ្ឌលនុយក្លេអ៊ែរនេះ ជាដើមហេតុនាំឱ្យជំនួបលើកទីពីរ រវាងលោកប្រធានាធិបតីអាមេរិកដូណាល់ ត្រាំ និងលោកគីមជុងអ៊ុន នៅហាណូយឆ្នាំ២០១៩ ត្រូវបរាជ័យ។ កាលណោះ កូរ៉េខាងជើងបានស្នើសុំរំសាយមជ្ឈមណ្ឌលYongbyon តែមួយផ្នែក ដោយរក្សាទុករចនាសម្ព័ន្ធផលិតនុយក្លេអ៊ែរដដែល ជាថ្នូរនឹងការលើកទណ្ឌកម្មសេដ្ឋកិច្ចមួយភាគ។ ប៉ុន្តែសហរដ្ឋអាមេរិកមិនព្រម ទើបការចរចាត្រូវជាប់គាំងស្តូករហូតមក ហើយព្យុងយ៉ាងត្រូវរងទណ្ឌកម្មអន្តរជាតិបន្ថែមកាន់តែច្រើនពីបទអភិវឌ្ឍន៍កម្មវិធីនុយក្លេអ៊ែរយោធា ដែលបានរីកចម្រើនកាន់តែខ្លាំង ក្រោមការដឹកនាំរបស់លោកគីមជុងអ៊ុន។
ស្ថិតនៅចម្ងាយប្រមាណជាងមួយរយគីឡូម៉ែត្រពីក្រុងព្យុងយ៉ាង មជ្ឈមណ្ឌលYongbyon សាងសង់ហើយនៅឆ្នាំ១៩៨៦ មានបំពាក់ម៉ាស៊ីនប្រតិករនុយក្លេអ៊ែរដំបូងគេ និងជាប្រភពផ្តល់រ៉ែភ្លុយតូនីញ៉ូមតែមួយគត់របស់កូរ៉េខាងជើងដែលគេស្គាល់។ ប៉ុន្តែYongbyon មិនមែនជាមជ្ឈមណ្ឌលចម្រាញ់ធាតុអ៊ុយរ៉ានីញ៉ូមតែមួយរបស់ព្យុងយ៉ាងឡើយ។ ដូច្នេះការបិទមជ្ឈមណ្ឌលនេះ មិនមែនមានន័យកម្មវិធីនុយក្លេអ៊ែរកូរ៉េខាងជើងត្រូវចប់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ