ថៃ៖នាយករដ្ឋមន្រ្តីលោកប្រាយុទ្ធ ចាន់អូចា និងរដ្ឋាភិបាលរបស់លោករួចផុតពីញតិ្តចាប់ថ្នាក់របស់បក្សប្រឆាំង
នៅក្នុងប្រទេសថៃ សភាបានបោះឆ្នោតនាព្រឹកថ្ងៃសៅរ៍ ទី៤ កញ្ញានេះដោយបានទាត់ចោលលើញត្តិចាប់ថ្នាក់ដែលផ្តួចផ្តើមឡើងដោយគណបក្សប្រឆាំង។ នាយករដ្ឋមន្រ្តីលោកប្រាយុទ្ធ ចាន់អូចា និងរដ្ឋាភិបាលចម្រុះរបស់លោកបានទទួលសំឡេងគាំទ្រភាគច្រើនឲ្យបន្តការដឹកនាំប្រទេសជាបន្តទៀត។ គួររម្លឹកថា ដើមចមនៃញត្តិចាប់ថ្នាក់របស់គណបក្សប្រឆាំងបានកើតមានឡើង ក្រោយពីមានផ្ទុះរឿងអាស្រូវជាប់សង្ស័យរវាងក្រុមម៉ាហ៊្វីយ៉ា និងសមាជិករដ្ឋាភិបាលរបស់លោកចាន់អូចា។
ចុះផ្សាយនៅថ្ងៃ៖
ស្តាប់ - ០១:៥២
ទីបំផុត និងដោយមិនភ្ញាក់ផ្អើល លោកប្រាយុទ្ធ ចាន់អូចា និងរដ្ឋាភិបាលចម្រុះរបស់លោកបានរួចផុតពីញត្តិចាប់ថ្នាក់របស់គណបក្សប្រឆាំង នោះបើទោះបីជានៅលើកនេះ គណបក្សប្រឆាំងប្រមូលបានសំឡេងគាំទ្រលើញត្តិចាប់ថ្នាក់របស់ខ្លួនច្រើនជាងលើកមុនៗក៏ដោយ។ គួររម្លឹកថា វត្តមានញត្តិចាប់ថ្នាក់ដែលផ្តួចផ្តើមដោយគណបក្សប្រឆាំងបានកើតមានឡើង ក្រោយពីមានផ្ទុះរឿងអាស្រូវមួយកាលពីប៉ុន្មានថ្ងៃកន្លងទៅ។
នៅម្ខាង មានក្រុមអ្នកតំណាងរាស្រ្តបានបញ្ជាក់ថា ក្រុមភ្នាក់ងារនៃការសមគំនិតប្រឆាំងនឹងលោកប្រាយុទ្ធ ចាន់អូចាបានសន្យាផ្តល់លុយសុទ្ធចំនួន ៥លានបាត ឬស្មើប្រមាណ ១៣០ ០០០អឺរ៉ូទៅឲ្យអ្នកតំណាងរាស្រ្តណាដែលយល់ព្រមមិនគាំទ្រលោកចាន់អូចា។ ចំណែកនៅម្ខាងទៀត មានក្រុមអ្នកតំណាងរាស្រ្តបានបញ្ជាក់ផ្ទុយពីនេះដែលថា ការសន្យាដូចគ្នានេះបានធ្វើឡើងចំពោះអ្នកតំណាងរាស្រ្តណាដែលគាំទ្រលោកចាន់អូចា។
តែគេមិនត្រូវភ្លេចនិយាយទេថា ដើមចមនៃរឿងអាស្រូវនៃការព្យាយាមអូសទាញក្រុមអ្នកតំណាងរាស្រ្តឲ្យប្រឆាំង និងគាំទ្រលោកចាន់អូចាបានផ្តើមចេញពីអនុរដ្ឋមន្រ្តីក្រសួងកសិកម្មលោកថាម៉ាណាត ប៉្រុមប៉ាវ។ លោកប៉្រុមប៉ាវដែលត្រូវបានកាត់ទោសពីបទរត់ពន្ធគ្រឿងញាននៅប្រទេសអូស្រា្តលីក្នុងទសវត្ស ៩០ និងដែលលោកចាន់អូចាបានទុកឲ្យលោកប៉្រុមប៉ាវកាន់តំណែងមកដល់សព្វថ្ងៃ។
រឿងរ៉ាវមួយនេះបានបង្កឲ្យមានសំណួរចោទឡើងជុំវិញទំនាក់ទំនងរវាងពួកម៉ាហ៊្វីយ៉ាថៃ និងសមាជិកជាន់ខ្ពស់ក្នុងជួររដ្ឋាភិបាល។ យ៉ាងណាក៏ដោយ ក្រុមបាតុករថៃបានសន្យាថា ដរាបណាលោកប្រាយុទ្ធ ចាន់អូចា និងរដ្ឋាភិបាលចម្រុះរបស់លោកបន្តកាន់អំណាច ពួកគេនឹងមិនបញ្ឈប់ក្បួនបាតុកម្មទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ