កូវីដ១៩- អូស្ត្រាលីនឹងទទួលថ្នាំបង្ការPfizer ៤លានដូសពីអង់គ្លេស
នៅពីរបីថ្ងៃខាងមុខនេះ វ៉ាក់សាំងចំនួនបួនលានដូស ផលិតដោយក្រុមហ៊ុន Pfizer/BioNTech នឹងទៅដល់អូស្ត្រាលី ក្នុងក្របខ័ណ្ឌនៃកិច្ចព្រមព្រៀងចុះហត្ថលេខាជាមួយអង់គ្លេស។ អូស្ត្រាលីសង្ឃឹមថាជាមួយនឹងថ្នាំបង្ការPfizer យុទ្ធនាការចាក់ថ្នាំបង្ការនឹងមានសន្ទុះខ្លាំង ព្រោះកន្លងមក ពលរដ្ឋអូស្ត្រាលីហាក់នៅរារែកចិត្ត ដោយមិនសូវទុកចិត្តលើថ្នាំបង្ការ AstraZeneca។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
យុទ្ធនាការថ្នាំបង្ការបានចាប់ផ្តើមដំបូងយ៉ាងគើមៗបំផុត តែពេលនេះអូស្ត្រាលីចាក់វ៉ាក់សាំងជូនពលរដ្ឋបានជាង៣០ម៉ឺនដូស ក្នុងមួយថ្ងៃ ពោលគឺជាល្បឿនដែលត្រូវប្រកាន់យកដើម្បីការពារប្រទេសពីកូវីដ១៩។ ប៉ុន្តែជាមួយនឹងការមកដល់នូវវ៉ាក់សាំង Pfizer ចំនួន៤លានដូសពីអង់គ្លេស ការចាក់ថ្នាំបង្ការនៅអូស្ត្រាលីនឹងកាន់តែមានល្បឿនខ្លាំង។
កន្លងមក អូស្ត្រាលីមានថ្នាំបង្ការប្រឆាំងនឹងកូវីដតែមួយប្រភេទប៉ុណ្ណោះ សម្រាប់ចាក់ជូនពលរដ្ឋ នោះគឺវ៉ាក់សាំងរបស់ក្រុមហ៊ុន AstraZeneca ដែលល្អូមល្អាមថាអាចបង្កផលរំខាន កើតជំងឺដុំកំណាកឈាមក្នុងសរសៃវែន។ ផលរំខានក្នុងកំរិតដ៏ទាបបំផុត និងទាបខ្លាំងណាស់បើប្រៀបទៅនឹងហានិភ័យបង្កឡើងដោយជំងឺកូវីដ១៩នោះ។
ប៉ុន្តែទោះផលរំខានរបស់AstraZenecaអាចកើតមានយ៉ាងកម្របំផុតក្តី ក៏គ្រប់គ្រាន់សម្រាប់នាំក្តីព្រួយបារម្ភដល់ពលរដ្ឋអូស្ត្រាលីទូទៅមួយចំនួនដែរ។ អ្នកមានសិទ្ធិ ដល់អាយុចាក់ថ្នាំបង្ការមិនតិចទេ បានបដិសេធមិនទៅ ចាក់វ៉ាក់សាំង ដោយខ្លាចមានផលរំខាន ឯខ្លះទៀតមិនព្រមចាក់ ដោយមានអារម្មណ៍ថាហេតុអ្វីបានជាអាជ្ញាធរអូស្ត្រាលីស្នើថ្នាំធុនអន់។ ជាក់ស្តែងមានពលរដ្ឋអូស្ត្រាលីអាយុលើស៦០ឆ្នាំ ប្រមាណ២០% មិនទាន់បានទទួលវ៉ាក់សាំងដូសទីមួយផង បើទោះបីជាពួកគាត់មានសិទ្ធិតាំងពីជាច្រើនខែមកហើយក៏ដោយ។
ផ្ទុយទៅវិញ ពលរដ្ឋក្រោយអាយុ៦០ឆ្នាំ និងក្មេងល្មមៗវិញ បែរជារួសរាន់ខ្លាំងចង់ទៅចាក់ថ្នាំបង្ការ។ គិតមកទល់នឹងថ្ងៃនេះ មានពលរដ្ឋអូស្ត្រាលីអាយុលើសពី១៦ឆ្នាំ ចំនួន ៣៧%ហើយបានទទួលថ្នាំបង្ការ។ ប្រសិនបើអូស្ត្រាលីអាចបន្តយុទ្ធនាការចាក់ថ្នាំបង្ការបានក្នុងល្បឿននេះរហូត នោះអូស្ត្រាលីនឹងអាចមានសម្រេចកម្មវត្ថុមានចាក់វ៉ាក់សាំងជូនពលរដ្ឋបានដល់៨០%នៅពាក់កណ្តាលខែវិច្ឆិកា។ កំរិតចាំបាច់មុននឹងអាចបើកព្រំដែនឡើងវិញ បន្ទាប់បិទជិតឈឹងតាំងពីខែមីនា២០២០មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ