យូនីសេហ្វ៖ វិបត្តិកូវីដ ធ្វើឲ្យក្មេងអាស៊ីខាងត្បូង ជាង ៤៣៤លាននាក់ ខកខាន មិនបានទៅសាលា
ការបិទទ្វារសាលារៀន នៅក្នុងអំឡុងវិបត្តិកូវីដ ជាង ១ឆ្នាំមកនេះ បានធ្វើឲ្យសិស្សសាលា ជាង ៤៣៤លាននាក់ នៅតំបន់អាស៊ីខាងត្បូង មិនបានទទួលការសិក្សាអប់រំ។ នេះបើតាមរបាយការណ៍របស់អង្គការយូនីសេហ្វ ចេញផ្សាយ នៅថ្ងៃ ព្រហស្បតិ៍ ទី ៩ កញ្ញា។ របាយការណ៍របស់ទីភ្នាក់ងារទទួលបន្ទុកផ្នែកកុមារ របស់អង្គការសហប្រជាជាតិ បានព្រមាន ពីការកើនឡើង នៃវិសមភាព ដ៏គួរឲ្យព្រួយបារម្ភ នៅពេល អ្នកជំនាញខាងកុមារ ទាញសញ្ញាអាសន្ន ពីគ្រោះថ្នាក់ បាត់បង់គុណភាព ធនធានមនុស្ស សម្រាប់ប្រទេស ទៅថ្ងៃអនាគត។
ចុះផ្សាយនៅថ្ងៃ៖
ស្តាប់ - ០២:៣៣
របាយការណ៍ របស់អង្គការយូនីសេហ្វ បានបង្ហាញថា នៅមុន ជំងឺរាតត្បាតកូវីដ លេចមុខ នៅចុងឆ្នាំ ២០១៩ កុមារអាយុ ១០ឆ្នាំ នៅតំបន់អាស៊ីខាងត្បូង ជិត ៦០% មិនចេះអានអក្សរ ឬមើលយល់អត្ថបទ សាមញ្ញ ដែលជាមូលដ្ឋានគ្រឹះ។ អង្គការយូនីសេហ្វបារម្ភថា ការបន្ត បិទសាលារៀន ដោយសារតែជំងឺរាតត្បាតកូវីដនឹងធ្វើឲ្យស្ថានភាពអវិជ្ជារបស់កុមារ កាន់តែធ្លាក់ចុះ អាក្រក់ មួយកម្រិតបន្ថែមទៀត។
នៅតាមបណ្តាប្រទេសក្រីក្រមួយចំនួន វិធានការរឹតបន្តឹង សុខភាពបានបណ្តាលឲ្យសាលារៀន មណ្ឌលដែលទទួលបានជំនួយពីអង្គការអន្តរជាតិ ត្រូវបិទទ្វារ។ នេះហេតុផលសំខាន់មួយ ធ្វើឲ្យកុមារមកពីគ្រួសារក្រីករ ត្រូវបាត់បង់ទាំងឱកាសរៀនសូត្រ និង ជំនួយអាហារូបត្ថម្ភ។ ក្មេងស្រី កូនអ្នកក្រ និងកុមារកំព្រា ពិការ ជាអ្នករងគ្រោះខ្លាំងជាងគេ ដោយសារតែសាលារៀនត្រូវបិទទ្វារ និងត្រូវជំនួសមកវិញ ដោយការសិក្សាតាមអនឡាញ។
នៅឥណ្ឌា ៨០%នៃយុវជន អាយុ ចន្លោះ១៤ និង ១៨ឆ្នាំ បាននិយាយថា ពួកគេបានរៀនសូត្រតិចជាងមុន បើប្រៀបធៀបនឹងការរៀនផ្ទាល់នៅក្នុងថ្នាក់។ ចំណែក កុមារឥណ្ឌា អាយុ ពី ៦ ទៅ ១៣ឆ្នាំ ចំនួន ៤២%និយាយថា ពួកគេគ្មានមធ្យោបាយ ដើម្បីរៀនតាមអនឡាញ។ នៅប៉ាគីស្ថានឯណោះវិញ ក្មេងសាលាប្រមាណ ២៣%អះអាងថា ពួកគេគ្មានឧបករណ៍ អេឡិចត្រូនិក ដើម្បីអាចចូលរៀន តាមអនឡាញ។
របាយការណ៍របស់យូនីសេហ្វ បង្ហាញដែរថា ឪពុកម្តាយរបស់ក្មេង នៅស្រីលង្កាបានត្អូញត្អែរ ពីការសិក្សារៀនសូត្រ យឺតយ៉ាវ ក្នុងកាលៈទេសៈ កូវីដ។
នៅត្រង់ចំណុចនេះ អង្គការយូនីសេហ្វបានអំពាវនាវឲ្យគ្រូបង្រៀន ពិនិត្យ មើលឡើងវិញ សមត្ថភាព កម្រិតចំណេះដឹងរបស់សិស្ស មុននឹងបន្តមេរៀនទៅមុខ។ គ្រូបង្រៀនត្រូវ បង្រៀន បន្ថែម ដើម្បីបំពេញ បង្រ្គប់ចំណេះដឹង ដែលក្មេងសាលា ខកខាន មិនបានទទួល ដោយសារតែ សាលាត្រូវបិទទ្វារ។
អង្គការផ្នែកកុមាររបស់អង្គការសហប្រជាជាតិ ទាមទារផងដែរ ឲ្យរដ្ឋាភិបាលផ្តល់អាទិភាព ចាក់វ៉ាក់សាំង ដល់គ្រូបង្រៀន និងបណ្តុះបណ្តាលពួកគេ ឲ្យអាចមានសមត្ថភាព បង្រៀនសិស្ស ដែលគ្មានមធ្យោបាយ ទទួលបានបច្ចេកវិទ្យា។ នៅក្នុងរបាយការណ៍ យូនីសេហ្វ បានដកស្រង់សំដី របស់គ្រូបង្រៀនស្រីលង្កាម្នាក់ ដែលបានបង្ហាញក្តីកង្វល់ថា បើសិន វិបត្តិកូវីដ នៅតែ បន្ត នោះឆ្នាំសិក្សានៅសកលវិទ្យាល័យ នឹងត្រូវបាត់បង់អស់ជាច្រើនឆ្នាំទៀត។ ដូច្នេះ តើរដ្ឋាភិបាល នឹងអាចរំពឹងអ្វីពីអនាគតធនធានមនុស្ស នៅថ្ងៃអនាគត?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ