ចិន និងរុស្ស៊ី ចេញមុខការពារកូរ៉េខាងជើង នៅក្រុមប្រឹក្សាសន្តិសុខអង្គការសហប្រជាជាតិ
ប៉ុន្មានថ្ងៃក្រោយ កូរ៉េខាងជើង បាញ់សាកល្បងមីស៊ីល អ៊ីពែសូនិច ដែលលឿនជាងសំឡេង ក្រុមប្រឹក្សាសន្តិសុខអង្គការសហប្រជាជាតិ បរាជ័យមិនអាចចេញសេចក្តីថ្លែងការណ៍រួមស្តីពីមីស៊ីល លឿនជាងសំឡេងរបស់កូរ៉េខាងជើង។ តាមមន្រ្តីទូតនៅអង្គការសហប្រជាជាតិ នៅក្នុងកិច្ចប្រជុំបន្ទាន់ កាលពីថ្ងៃសុក្រទី ១ តុលា ចិននិងរុស្ស៊ី ជាថ្មីម្តងទៀត បានចេញមុខ ជំទាស់ មិនឲ្យអង្គការសហប្រជាជាតិចាត់វិធានការណាមួយប្រឆាំងកូរ៉េខាងជើង។
ចុះផ្សាយនៅថ្ងៃ៖
ស្តាប់ - ០២:១៦
គោលដៅនៃកិច្ចប្រជុំរបស់ក្រុមប្រឹក្សាសន្តិសុខអង្គការសហប្រជាជាតិ គឺ ពិភាក្សា វិភាគ ពីមីស៊ីលអ៊ីពែរសូនិក ដែលកូរ៉េខាងជើងបានបាញ់សាកល្បង កាលពីថ្ងៃអង្គារ ដើមសប្តាហ៍នេះ។ បារាំងដែលជាអ្នកស្នើអត្ថបទព្រាងទៅកាន់ក្រុមប្រឹក្សាសន្តិសុខចង់ឲ្យក្រុមប្រឹក្សាសន្តិសុខចេញសេចក្តីសម្រេចមួយ ដែលបញ្ជាក់ពីក្តីបារម្ភ នៅចំពោះមុខសកម្មភាពបាញ់មីស៊ីលរបស់កូរ៉េខាងជើង និងការអនុវត្តឲ្យបានពេញទំហឹង ទណ្ឌកម្មសេដ្ឋកិច្ចលើកូរ៉េខាងជើង។
តាមមន្រ្តីទូត ដែលបានចូលរួមក្នុងកិច្ចប្រជុំបិទទ្វារ និងដកស្រង់សំដីដោយទីភ្នាក់ងារព័ត៌មានបារាំង AFP សមាជិកភាគច្រើន ដូចជាអាមេរិក អង់គ្លេស គាំទ្រ ការលើកឡើង របស់បារាំង ដែលចង់ឲ្យក្រុមប្រឹក្សាចេញសេចក្តីសម្រេចមួយ សម្រាប់ក្រុមអ្នកកាសែត ប៉ុន្តែ ភាគីចិន និងរុស្ស៊ី ដែលជាសមាជិកអចិន្រ្តៃយ៍ក្នុងក្រុមប្រឹក្សាសន្តិសុខ បានអះអាងថា វាមិនទាន់ដល់ពេលដែលត្រូវធ្វើ និងថា គេត្រូវការពេលវេលាបន្ថែម ដើម្បីសិក្សាសំណុំរឿងមីស៊ីលរបស់កូរ៉េខាងជើង។
នៅក្នុងកិច្ចប្រជុំ កាលពីថ្ងៃសុក្រ ចិនបានឆ្លៀតនិយាយរិះគន់ កិច្ចព្រមព្រៀង ដែលអាមេរិក អង់គ្លេស និងអូស្ត្រាលីបានធ្វើឡើងរួមគ្នា ដោយក្បត់បារាំង។ តាមភាគីចិន គឺកិច្ចព្រមព្រៀងដែលមាននិយាយពីការលក់ បំពាក់ នាវាមុជទឹក ដើរដោយថាមពលនុយក្លេអ៊ែរ អាមេរិក ឲ្យកងទ័ពអូស្ត្រាលី ដែលគំរាមកំហែង តំបន់។ តាមមន្រ្តីទូត ដែលសុំមិនបញ្ចេញឈ្មោះ អ្នកតំណាងអាមេរិក និងអង់គ្លេសបានឆ្លើយបកទៅវិញថា រឿងលក់នាវាមុជទឹកទៅឲ្យអូស្ត្រាលី គ្មានទាក់ទងនឹងសំណុំរឿងកូរ៉េខាងជើងនោះទេ។
ចាប់តាំងពីឆ្នាំ ២០១៧ ឆ្នាំដែលក្រុមប្រឹក្សាសន្តិសុខប្រកាសដាក់ទណ្ឌកម្មសេដ្ឋកិច្ចលើកូរ៉េខាងជើង ដោយសារការបាញ់សាកល្បងគ្រាប់បែកនុយក្លេអ៊ែរ សមាជិកក្រុមប្រឹក្សាសន្តិសុខអង្គការសហប្រជាជាតិដែលបែកបាក់ ខ្វែងគំនិតគ្នា រហូតធ្វើឲ្យក្រុមប្រឹក្សាសន្តិសុខត្រូវបរាជ័យ មិនអាចចាត់វិធានការថ្មី ដើម្បី ឆ្លើយតបកូរ៉េខាងជើង។ រាល់សេចក្តីសម្រេចរបស់ក្រុមប្រឹក្សាសន្តិសុខ គ្រាន់តែទាមទារឲ្យគេពង្រឹងការដាក់ទណ្ឌកម្មកន្លងមក ពោលគឺគ្មានទណ្ឌកម្មថ្មីលើកូរ៉េខាងជើងនោះទេ។
ទោះជាប់ទណ្ឌកម្មសេដ្ឋកិច្ចរបស់អង្គការសហប្រជាជាតិ កូរ៉េខាងជើងនៅបន្តអភិវឌ្ឍកម្មវិធីយោធា និងបាញ់សាកល្បងដោយជោគជ័យ គ្រាប់មីស៊ីល ដែលកូរ៉េខាងជើងអះអាងថា ជាមីស៊ីលអ៊ីពែរសូនិក ដែលហោះលឿនជាង សំឡេងដល់ទៅ៥ដង។
កន្លងមក ចិន និងរុស្ស៊ីធ្លាប់បានទាមទារឲ្យក្រុមប្រឹក្សា សន្តិសុខលុបចោល ទណ្ឌកម្មសេដ្ឋកិច្ចមួយចំណែក ដែលគេដាក់ទៅលើកូរ៉េខាងជើង ដើម្បីសម្រាលបន្ទុកកូរ៉េខាងជើង ប៉ុន្តែ សំណើរបស់ចិន និងរុស្ស៊ី ត្រូវសមាជិកក្រុមប្រឹក្សាសន្តិសុខដទៃទៀត ដូចជាអាមេរិកជាដើម បោះឆ្នោតប្រឆាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ