កូរ៉េខាងជើងរិះគន់អ.ស.ប ជុំវិញកិច្ចប្រជុំស្តីពីការសាកល្បងមីស៊ីលរបស់ខ្លួន
កូរ៉េខាងជើងនៅថ្ងៃអាទិត្យ ទី៣ តុលានេះ ចេញមុខរិះគន់ក្រុមប្រឹក្សាសន្តិសុខអង្គការសហប្រជាជាតិដែលបានបើកកិច្ចប្រជុំបន្ទាន់មួយដើម្បីពិភាក្សានិងវិភាគអំពីមីស៊ីលដែលកូរ៉េខាងជើងបានបាញ់សាកល្បង។ សម្រាប់ក្រុងព្យុងយ៉ាង កិច្ចប្រជុំរបស់អង្គការសហប្រជាជាតិនេះមិនខុសអីពីអំពើរំលោភបំពានដោយចេតនាលើអធិបតេយ្យភាពរបស់ខ្លួនឡើយ។
ចុះផ្សាយនៅថ្ងៃ៖
ស្តាប់ - ០២:២៦
នៅមួយរយៈពេលចុងក្រោយនេះ កូរ៉េខាងជើងបានបាញ់សាកល្បងមីស៊ីលជាបន្តបន្ទាប់។ កាលពីថ្ងៃសុក្រ ក្រុងព្យុងយ៉ាងបានប្រកាសអំពីជោគជ័យរបស់ខ្លួនក្នុងការបាញ់សាកល្បងមីស៊ីលប្រឆាំងយន្តហោះ។ ចំណែកកាលពីខែកញ្ញាកន្លងទៅ កូរ៉េខាងជើងដដែលបានបាញ់សាកល្បងមីស៊ីលបណ្តែតរយៈចម្ងាយឆ្ងាយ មីស៊ីលបាលីស្ទិក ហើយនៅថ្ងៃអង្គារដើមសប្តាហ៍នេះទៀត កូរ៉េខាងជើង បានបាញ់សាកល្បងមីស៊ីលអ៊ីពែរសូនិកដែលអាចមានល្បឿនលឿនជាងសំឡេងដល់ទៅ៥ដង។
សកម្មភាពរបស់កូរ៉េខាងជើងបានជំរុញឲ្យប្រឹក្សាសន្តិសុខអង្គការសហប្រជាជាតិបើកកិច្ចប្រជុំបន្ទាន់មួយកាលពីថ្ងៃសុក្រ ទី១ តុលា។ កិច្ចប្រជុំដែលត្រូវបានស្នើឡើងដោយសហរដ្ឋអាមេរិក អង់គ្លេស និងបារាំងនេះប្រព្រឹត្តទៅរយៈពេលជាងមួយម៉ោងហើយបានបញ្ចប់ទៅដោយគ្មានសេចក្តីថ្លែងការណ៍ណាមួយឡើយដោយសារចិននិងរុស្ស៊ីចេញមុខការពារកូរ៉េខាងជើង និងជំទាស់មិនឲ្យអង្គការសហប្រជាជាតិចាត់វិធានការប្រឆាំងកូរ៉េខាងជើង។
ទោះបីជាក្រុមប្រឹក្សាសន្តិសុខបរាជ័យមិនអាចចេញសេចក្តីថ្លែងការណ៍រួមក្តី ក៏កូរ៉េខាងជើងនៅតែមានការខឹងសម្បានិងចាត់ទុកកិច្ចប្រជុំរបស់អង្គការសហប្រជាជាតិថាជាការរំលោភបំពានដោយចេតនាលើអធិបតេយ្យភាពរបស់ខ្លួន និងជាការបង្កហេតុដែលព្យុងយ៉ាងមិនអាចទទួលយកបានសោះឡើយ។ សម្រាប់រដ្ឋអំណាចក្រុងព្យុងយ៉ាង ការទាមទារឲ្យកូរ៉េខាងជើងលះបង់សិទ្ធិការពារខ្លួនមានន័យថាជាការបង្ហាញពីចេតនាមិនទទួលស្គាល់កូរ៉េខាងជើងថាជារដ្ឋអធិបតេយ្យនោះទេ។
គួរបញ្ជាក់ថា ជាយូរមកហើយដែលប្រទេសកូរ៉េខាងជើងបានធ្វើតេស្តសាកល្បងអាវុធដើម្បីសម្រេចបាននូវផែនការអាទិភាពរបស់ខ្លួន។ ចំណែករដ្ឋបាលអាមេរិករបស់លោកចូ បៃដិន បានប្រកាសម្តងហើយម្តងទៀតពីឆន្ទៈក្នុងការជួបជាមួយតំណាងកូរ៉េខាងជើងដើម្បីពិភាក្សាគ្នាឆ្ពោះទៅស្វែងរកការរំសាយអាវុធនុយក្លេអ៊ែរ។
ប៉ុន្តែ ក្រុងព្យុងយ៉ាងធ្វើព្រងើយនិងថាការបោះដៃផ្តល់កិច្ចចរចាដែលគ្មានលក្ខខណ្ឌជាមុនគឺជាល្បិចរបស់ក្រុងវ៉ាស៊ីនតោន។ មេដឹកនាំកូរ៉េខាងជើង គីម ជុងអ៊ុន ថែមទាំងបានចោទប្រកាន់រដ្ឋបាលបៃដិន ថាបានបន្តគោលនយោបាយប្រឆាំងកូរ៉េខាងជើងដូចប្រធានាធិបតីអាមេរិកមុនៗដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ