អូស្ត្រាលីប្រកាសបើកទីក្រុងស៊ីដនីក្រោយបិទខ្ទប់អស់ជាង៣ខែ
នៅក្នុងប្រទេសអូស្ត្រាលី រដ្ឋាភិបាលបានប្រកាសបើកទីក្រុងស៊ីដនីវិញ ក្រោយពីបិទខ្ទប់អស់រយៈពេល ១០៦ ថ្ងៃរួចមក។ ពលរដ្ឋអូស្ត្រាលីដែលបានចាក់វ៉ាក់សាំងកូវីដពេញលេញហើយ នឹងទទួលបានសិទ្ធិដើរហើរច្រើនជាងអ្នកដែលនៅមិនទាន់បានចាក់វ៉ាក់សាំង។
ចុះផ្សាយនៅថ្ងៃ៖
ស្តាប់ - ០២:១០
ស៊ីដនីដែលជាទីក្រុងធំបំផុតរបស់អូស្ត្រាលីស្ថិតក្នុងរដ្ឋ New South Wales នឹងចាប់បើកជាដំណាក់កាលដោយផ្តើមពីថ្ងៃចន្ទ ទី១១ តុលាតទៅ ដោយសារតែអត្រានៃការចាក់វ៉ាក់សាំងមានចំនួនកើនឡើង ហើយអត្រាឆ្លងកូវីដធ្លាក់ចុះ។
ទីតាំងមួយចំនួនមានដូចជា បារ និងហាងហ្គេមអាចចាប់បើកនៅយប់អធ្រាតថ្ងៃអាទិត្យវេលាម៉ោង ១២ ឈានចូលព្រឹកថ្ងៃចន្ទ។ ហាងកាត់សក់ក៏ស្ថិតនៅក្នុងចំណោមអាជីវកម្មដែលរដ្ឋអំណាចអូស្ត្រាលីអនុញ្ញាតឲ្យបើកទ្វារក្នុងដំណាក់កាលនេះដែរ។
ចំណែកពលរដ្ឋអូស្ត្រាលីដែលរស់នៅជាប់ក្នុងផ្ទះក្រោមវិធានការបិទខ្ទប់ក្រុងរយៈពេលជិត ៤ ខែមកហើយនោះកំពុងត្រេកត្រអរជាខ្លាំងនិងបានត្រៀមចេញក្រៅជួបជុំមិត្តភ័ក្តិបងប្អូន ទៅកាត់សក់ ក៏ដូចជាដើរហើរស្រូបយកខ្យល់អាកាសខាងក្រៅ។
យ៉ាងណាក៏ដោយ រដ្ឋាភិបាលអូស្ត្រាលីនៅតែទាន់អនុញ្ញាតឲ្យមានការប្រមូលផ្តុំមនុស្សច្រើនគ្នានៅឡើយនោះទេ ហើយព្រំដែនអន្តរជាតិនិងសាលារៀនក៏នៅមិនទាន់បើកទ្វារឡើងវិញទាំងស្រុងបានដែរ។
ចំណែកក្រុមមនុស្សដែលនៅមិនទាន់បានចាក់វ៉ាក់សាំងពេញលេញ នឹងមិនទទួលបានការអនុញ្ញាតឲ្យចូលកន្លែងផ្សេងៗដូចជា ក្លឹបកីឡា ភោគជនីយដ្ឋាន ផ្សារលក់ទំនិញនោះទេនៅពេលនេះ។
គួររំឭកថា អាជ្ញាធរអូស្ត្រាលី បានសម្រេចបិទខ្ទប់ទីក្រុងស៊ីដនីចាប់តាំងពីខែមិថុនាមកដើម្បីទប់ស្កាត់ការឆ្លងរាលដាលមេរោគដែលតា។ ជាង៣ខែមកនេះ ហាងទំនិញ សាលារៀន ហាងថែសម្ផស្ស ហាងកាត់សក់ និងការិយាល័យធ្វើការត្រូវបានតម្រូវឲ្យបិទទ្វារទាំងអស់ លើកលែងតែទីតាំងលក់ទំនិញចាំបាច់តែប៉ុណ្ណោះ។
ចំណែកសិទ្ធិសេរីភាពផ្ទាល់ខ្លួនរបស់ប្រជាពលរដ្ឋវិញក៏ត្រូវបានរឹតត្បិតមិនធ្លាប់មានពីមុនមកដែរ។ មានការហាមឃាត់រាប់តាំពីការធ្វើដំណើរឆ្ងាយជាង ៥ គីឡូម៉ែត្រពីផ្ទះ ការទៅលេងគ្រួសារ ការដើរតាមផ្សារទំនើបរហូតដល់សកម្មភាពចូលរួមបុណ្យសព។
គួររំឭកដែរថា រដ្ឋ New South Wales បានកត់ត្រាករណីឆ្លងកូវីដធ្លាក់ចុះក្នុងចំនួន ៤៧៧ ករណី កាលថ្ងៃអាទិត្យ ទី១០ តុលា ហើយមានមនុស្សអាយុលើស ១៦ ឆ្នាំចំនួន ៧០% បានចាក់វ៉ាក់សាំងកូវីដពីរដូសហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ