អូស្ត្រាលីចាត់វិធានការរឹតត្បិតទប់ស្កាត់ការឆ្លងរាលដាលកូវីដបង្កដោយមេរោគបំប្លែងខ្លួនដែលតា
ចុះផ្សាយនៅថ្ងៃ៖
ស្តាប់ - ០៨:២៦
ការផ្ទុះករណីឆ្លងកូវីដដែលបណ្តាលមកពីមេរោគបំប្លែងខ្លួន“ដែលតា” បានឈានដល់ដំណាក់កាលថ្មីនៅអូស្ត្រាលី។ ករណីវិជ្ជមានកូវីដបានផ្ទុះឡើងក្នុងទីក្រុងជាច្រើននៅពាសពេញប្រទេសអូស្រ្តាលីនាថ្ងៃចន្ទ ២៨ មិថុនានេះ។ ដើម្បីទប់ស្កាត់ការឆ្លងរាលដាលដ៏គ្រោះថ្នាក់នេះ អាជ្ញាធរមូលដ្ឋានអូស្ត្រាលីបានដាក់ចេញនូវវិធានការថ្មីយ៉ាងតឹងរ៉ឹង។ តើទីក្រុងរបស់អូស្ត្រាលីណាខ្លះដែលរងគ្រោះខ្លាំងពីមេរោគបំប្លែងខ្លួនដែលតា? ហើយថាតើវិធានការគ្រប់គ្រងកូវីដនេះនឹងជះឥទ្ធិពលអ្វីខ្លះចំពោះអូស្ត្រាលី?
តើទីក្រុងរបស់អូស្ត្រាលីណាខ្លះដែលរងគ្រោះខ្លាំងពីមេរោគបំប្លែងខ្លួនដែលតា?
អូស្រ្តាលីគឺជាប្រទេសមួយដែលបានទទួលជោគជ័យក្នុងការគ្រប់គ្រងការឆ្លងរីករាលដាលនៃជំងឺកូវីដ។ ប៉ុន្តែនាខណៈពេលនេះ អូស្ត្រាលីកំពុងប្រឈមទៅនឹងការផ្ទុះករណីឆ្លងកូវីដខ្លាំងជាថ្មីដែលជាករណីឆ្លងបណ្តាលមកពីមេរោគបំប្លែងខ្លួនដែលតា។
អាជ្ញាសុខាភិបាលអូស្ត្រាលី កំពុងខំខ្នះខ្នែងប្រយុទ្ធប្រឆាំងទល់នឹងការផ្ទុះករណីឆ្លងកូវីដខ្លាំងជាពិសេសនៅក្នុងទីក្រុងចំនួន ៤ រួមមាន៖ Brisbane, Darwin, Perth និង ស៊ីដនី។ នៅក្នុងទីក្រុងទាំងបួននេះរបស់អូស្ត្រាលី អាជ្ញាធរសុទ្ធតែបានរាយការណ៍អំពីករណីឆ្លងមេរោគបំប្លែងខ្លួនដែលតា ដែលបានលេចមុខដំបូងនៅក្នុងប្រទេសឥណ្ឌា ហើយបានចាប់រីករាលដាលនៅអូស្រ្តាលីដោយផ្ទុះចេញដំបូងឡើយចេញពីសណ្ឋាគារនានាដែលគេប្រើសម្រាប់ធ្វើចត្តាឡីស័កអ្នកធ្វើដំណើរចូលប្រទេសអូស្ត្រាលី។
ការផ្ទុះករណីឆ្លងឡើងធំជាងគេគឺនៅឯទីក្រុងស៊ីដនីដែលមានប្រជាជនរស់នៅប្រមាណ ៥ លាននាក់។ នៅស៊ីដនីមានមនុស្សចំនួន ១៣០ នាក់ បានធ្វើតេស្តវិជ្ជមានកូវីដដែលបណ្តាលមកពីមេរោគបំប្លែងខ្លួនដែលតា។
ករណីឆ្លងកូវីដនៅស៊ីដនី បានផ្ទុះឡើងខ្លាំងតាំងពីរកឃើញករណីវិជ្ជមានកូវីដកាលពីពាក់កណ្តាលខែមិថុនា លើអ្នកបើកបរម្នាក់ដែលដឹកជញ្ជូនបុគ្គលិកក្រុមហ៊ុនអាកាសចរណ៍ពីព្រលានយន្តហោះទៅសណ្ឋាគារក្នុងក្រុងស៊ីដនីដើម្បីធ្វើចត្តាឡីស័ក។ ប្រឈមនឹងការឆ្លងរាលដាលកូវីដខ្លាំងបែបនេះ អាជ្ញាធរអូស្ត្រាលីបានសម្រេចបិទខ្ទប់ទីក្រុងស៊ីដនីទាំងស្រុង រយៈពេល២សប្តាហ៍ចាប់ពីយប់ថ្ងៃសុក្រ ទី២៥ មិថុនា នៅម៉ោង១២ រំលងអធ្រាត្រ។
ចំណែកឯវិធានការបិទខ្ទប់នៅទីក្រុងDarwin និងតំបន់ជុំវិញដែលនឹងត្រូវបិទបញ្ចប់នៅថ្ងៃអង្គារស្អែក ក៏ត្រូវបានអាជ្ញាធរអូស្ត្រាលីបន្តពន្យារពេលរហូតដល់ថ្ងៃសុក្រដែរ បន្ទាប់ពីផ្ទុះមានករណីឆ្លងកូវីដថ្មីកើនឡើងដល់ ៧ ករណី។ នៅក្នុងទីក្រុង Perth និង Brisbane វិញ អាជ្ញាធរបានដាក់ចេញការរឹតបន្តឹងជាថ្មីនៅថ្ងៃចន្ទនេះដោយតម្រូវឲ្យប្រជាជនអនុវត្តកាតាព្វកិច្ចពាក់ម៉ាស់ និងរឹតត្បិតលើការជួបជុំប្រមូលម្តុំផ្សេងៗ។
ជារួម នេះជាលើកទីមួយក្នុងរយៈពេលប៉ុន្មានខែមកនេះដែលករណីឆ្លងកូវីដបានលេចចេញ នៅតាមទីក្រុងជាច្រើននៃប្រទេសអូស្ត្រាលីក្នុងពេលតែមួយ។ ក្រុមមន្រ្តីអូស្ត្រាលីបាននិយាយថា នេះគឺជាពេលវេលាដ៏សំខាន់សម្រាប់ប្រទេសខ្លួនដែលត្រូវខំប្រឹងរក្សាតួលេខករណីឆ្លងកូវីដកុំឲ្យហក់ឡើងខ្ពស់បន្តទៅទៀត។
ប្រទេសនូវែលសេឡង់ប្រកាសផ្អាកការធ្វើដំណើរដោយសេរីពីអូស្ត្រាលី
ដោយបារម្ភពីការផ្ទុះករណីឆ្លងកូវីដបណ្តាលមកពីមេរោគបំប្លែងដែលតា ដែលមានសមត្ថភាពចម្លងលឿនរហ័ស កាលពីយប់ថ្ងៃសៅរ៍នាចុងសប្តាហ៍កន្លងទៅនេះ រដ្ឋាភិបាលនូវែលសេឡង់ បានសម្រេចផ្អាកការធ្វើដំណើរដោយសេរី (ដោយមិនបាច់ធ្វើចត្តាឡីស័ក) ជាមួយនឹងប្រទេសអូស្រ្តាលីយ៉ាងហោចណាស់រហូតដល់ថ្ងៃអង្គារស្អែក។
ច្រករបៀងធ្វើដំណើររវាងប្រទេសជិតខាងទាំងពីរ ត្រូវបានបើកនឹងគ្នាឡើងវិញនៅក្នុងខែមេសា។ តាមពិតទៅការធ្វើដំណើរចេញចូលរវាងប្រទេសនូវែលសេឡង់ ជាមួយតំបន់ខ្លះរបស់អូស្រ្តាលីត្រូវបានបិទក្នុងរយៈពេលខ្លីមួយរយៈមកហើយ ក្រោយករណីឆ្លងកូវីដបានផ្ទុះឡើងមកវិញ។ ក៏ប៉ុន្តែ នេះជាលើកដំបូងហើយ ដែលអាជ្ញាធរនូវែលហ្សេឡង់សម្រេចបិទការធ្វើដំណើរចូលទាំងស្រុងជាមួយអូស្ត្រាលីតែម្តង។
រដ្ឋាភិបាលនូវែលសេឡង់បានពន្យល់ថា ការផ្អាករយៈពេលខ្លីនេះនឹងផ្តល់ឲ្យខ្លួននូវពេលវេលាដើម្បីយល់ដឹងឲ្យបានកាន់តែច្បាស់អំពីស្ថានភាពឆ្លងរាលដាលកូវីដ។ បន្ទាប់មកទៀត អាជ្ញាធរជំនាញនូវែលសេឡង់ នឹងអាចពិចារណាបានលើការអនុវត្តវិធានការសក្កានុពលមួយចំនួនដើម្បីធ្វើឲ្យការធ្វើដំណើររវាងប្រទេសទាំងពីរមានសុវត្ថិភាពដូចជា ណែនាំឲ្យអ្នកដំណើរធ្វើតេស្តរកកូវីដមុនពេលឡើងហោះហើរចេញពីប្រទេសអូស្រ្តាលីទៅកាន់នូវែលសេឡង់។
តើវិធានការគ្រប់គ្រងកូវីដនឹងជះឥទ្ធិពលអ្វីខ្លះដល់អូស្ត្រាលី?
បើនិយាយពីឥទ្ធិពលរយៈពេលខ្លី វិធានការគ្រប់គ្រងកូវីដរបស់អាជ្ញាធរអូស្ត្រាលី ធ្វើឲ្យប៉ះពាល់ដល់ការដើរហើរ សេរីភាពក្នុងការជួបជុំ ឬក៏ការរកស៊ីជួយដូររបស់ប្រជាជនជាដើម។
ដោយឡែកសម្រាប់ឥទ្ធិពលរយៈពេលវែង ក្រុមអ្នកជំនាញបានព្រមានថាប្រទេសអូស្រ្តាលី អាចប្រឈមនឹងកំណើនចំនួនប្រជាជនទាប និងឱនភាពថវិកាយ៉ាងហោចណាស់រហូតដល់ឆ្នាំ ២០៦០ ដោយសារវិធានការសង្គ្រោះប្រទេសពីវិបត្តិកូវីដ។
បើយោងតាមការព្យាករណ៍ជាផ្លូវការចេញផ្សាយនៅថ្ងៃចន្ទនេះ ការសម្រេចចិត្តបិទព្រំដែន នៅពេលផ្ទុះមានជំងឺរាតត្បាតកូវីដ ធ្វើឲ្យអត្រាកំណើតរបស់អូស្ត្រាលីធ្លាក់ទាប ហើយកំណើនប្រជាជនយឺត នឹងដាក់បន្ទុកដល់សេដ្ឋកិច្ចអូស្ត្រាលី។ វិបត្តិសេដ្ឋកិច្ចដែលបណ្តាលមកពីជំងឺរាតត្បាតរ៉ាំរ៉ៃកូវីដ១៩ បានធ្វើឲ្យមិនថា ប្រទេសអូស្ត្រាលី ឬរដ្ឋាភិបាលប្រទេសជាច្រើនផ្សេងទៀតនោះទេត្រូវចំណាយថិវកាជាច្រើន។
ជាក់ស្តែង ផែនការចំណាយដ៏ធំមួយត្រូវបានបង្កើតឡើងកាលពីឆ្នាំ២០២០ ដោយរដ្ឋាភិបាលអូស្ត្រាលីបានចំណាយប្រាក់រាប់ពាន់លានដើម្បីជួយជំរុញសកម្មភាពសេដ្ឋកិច្ច ក៏ដូចជាជួយសង្គ្រោះប្រជាជនពីវិបត្តិ។ ការណ៍នេះ នឹងធ្វើឲ្យអូស្ត្រាលីជួបឱនភាពថវិកា មានយ៉ាងហាចដល់ឆ្នាំ ២០៦០ ខាងមុខ។
យ៉ាងណាក៏ដោយ ការងើបឡើងវិញនៃសេដ្ឋកិច្ចអូស្ត្រាលី កំពុងតែមានដំណើរការល្អមកវិញ។ ប៉ុន្តែផលប៉ះពាល់ផ្សេងទៀតពីការរាតត្បាតនឹងនៅតែបន្តកើតមាន ដូចជាអត្រាកំណើតធ្លាក់ទាប។ កំណើនប្រជាជនរបស់ប្រទេសអូស្រ្តាលី បានធ្លាក់ចុះដល់កំរិតទាបបំផុតរបស់ខ្លួនក្នុងរយៈពេលជាងមួយសតវត្សរ៍ បន្ទាប់ពីរងគ្រោះពីជំងឺកូវីដ។
កំណើនសេដ្ឋកិច្ចរបស់ប្រទេសអូស្ត្រាលី ត្រូវបានទ្រទ្រង់ដោយផ្អែកលើរ៉ែនិងវិស័យកសិកម្មនិងត្រូវបានជំរុញផងដែរដោយរលកនៃការធ្វើចំណាកស្រុកដ៏ច្រើនពីអឺរ៉ុប អាស៊ី និងពីកន្លែងផ្សេងទៀត។
ប៉ុន្តែដោយហេតុថាការធ្វើចំណាកស្រុកមកអូស្ត្រាលី ទំនងមិនអាចវិលទៅរកសភាពដូចមុនពេលមានជំងឺកូវីដរាតបាន រហូតដល់ឆ្នាំ ២០២៤-២០២៥ របាយការណ៍ឆ្នាំ ២០២១ (the 2021 Intergenerational Report) របស់រដ្ឋាភិបាលអូស្ត្រាលីបានព្យាករថា ប្រជាជនអូស្ត្រាលីដែលបច្ចប្បន្នមានចំនួន ២៥ លាន ៧សែននាក់ ទំនងជានឹងកើនឡើងដល់ ៣៨ លាន ៨ សែន ក្នុង ឆ្នាំ២០៦០ ពោលគឺ ៦ ឆ្នាំយឺតជាងការព្យាករណ៍ពីមុន។ កាលពីឆ្នាំ ២០១៥ អ្នកជំនាញបានព្យាការថា ចំនួនប្រជាជនអូស្ត្រាលីអាចកើនដល់ចំនួន ៤០ លានឯណោះនៅត្រឹមឆ្នាំ ២០៥៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ