កូវីដ១៩៖ថៃគ្រោងបើកប្រទេសចាប់ពីថ្ងៃទី១ វិច្ឆិកាដើម្បីទទួលអ្នកទេសចរបរទេសដែលចាក់វ៉ាក់សាំងរួច
នៅក្នុងប្រទេសថៃ នាយករដ្ឋមន្រ្តីលោកប្រាយុទ្ធ ចាន់អូចាបានប្រកាសក្នុងថ្ងៃចន្ទ ទី១១ តុលាពីគម្រោងបើកប្រទេសបណ្តើរៗចាប់ពីថ្ងៃទី១ វិច្ឆិកាដើម្បីទទួលអ្នកទេសចរបរទេសដែលចាក់វ៉ាក់សាំងរួច។ ការសម្រេចរបស់លោកចាន់អូចាយ៉ាងដូច្នេះបានធ្វើឡើង ខណៈដែលប្រទេសកំពុងព្យាយាមស្រោចស្រង់ឧស្សាហកម្មទេសចររបស់ខ្លួនដែលបានរងផលប៉ះពាល់យ៉ាងខ្លាំងដោយវិបត្តិកូវីដ១៩។ លោកចាន់អូចាយល់ថា វាល្មមដល់ពេលដែលថៃត្រូវរៀបចំខ្លួនដើម្បីប្រឈមទប់នឹងកូវីដ១៩ និងរស់នៅជាមួយនឹងជំងឺមួយនេះ។
ចុះផ្សាយនៅថ្ងៃ៖
ស្តាប់ - ០២:៤០
គឺនៅក្នុងបទអន្តរាគមន៍តាមកញ្ចក់ទូរទស្សន៍ដែលនាយករដ្ឋមន្រ្តីថៃលោកប្រាយុទ្ធ ចាន់អូចាបានប្រកាសពីគម្រោងបើកប្រទេសដើម្បីទទួលអ្នកទេសចរបរទេសចាប់ពីថ្ងៃទី១ វិច្ឆិកា។ តែជាគម្រោងដែលត្រូវធ្វើឡើងដោយសន្សឹមៗ និងជាដំណាក់កាល។ នៅក្នុងជំហានដំបូង គឺសម្រាប់អ្នកទេសចរដែលធ្វើដំណើរតាមយន្តហោះមកពី ១០ប្រទេសដែលមានហានិភ័យកូវីដ១៩ទាប និងបានចាក់វ៉ាក់សាំងរួច។ ១០ប្រទេសនេះមានដូចជាអាមេរិក ចិន អង់គ្លេស អាល្លឺម៉ង់ និងប្រទេសសិង្ហបុរី។ តែលោកចាន់អូចាបានសន្យាថា បញ្ជីឈ្មោះប្រទេសនេះនឹងត្រូវពង្រីកបន្ថែមទៀតនាពេលខាងមុខដោយផ្អែកលើស្ថានការណ៍កូវីដ១៩ របស់ប្រទេសនីមួយៗ។
តែលោកចាន់អូចាបានលំអិតថា អ្នកទេសចរបរទេសមកពី ១០ប្រទេសដែលបានចាក់វ៉ាក់សាំងរួចក៏ត្រូវបង្ហាញលទ្ធផលធ្វើតេស្តិ៍អវិជ្ជមានកូវីដ១៩ និងត្រូវធ្វើតេស្តិ៍ម្តងទៀតនៅពេលមកដល់ទឹកដីថៃ។ បើការធ្វើតេស្តិ៍ចុងក្រោយបង្ហាញលទ្ធផលអវិជ្ជមាន ពួកគេអាចធ្វើដំណើរដោយសេរីនៅក្នុងទឹកដីថៃដូចពលរដ្ឋថៃអ៊ីចឹងដែរ នេះជាការបន្ថែមរបស់លោកចាន់អូចា។ ចុះអ្នកទេសចរបរទេសមកពីប្រទេសផ្សេងដែលមិនស្ថិតក្នុងបញ្ជី ១០ប្រទេស តើពួកគេអាចទៅលេងថៃបាន ឬអត់?។ ពិតជាបាន តែពួកគេត្រូវធ្វើចត្តាឡីស័កនៅពេលទៅដល់ទឹកដីថៃ នេះបើតាមលោកចាន់អូចា។
ជម្រើសគម្រោងបើកប្រទេសសម្រាប់អ្នកទេសចរបរទេសរបស់លោកចាន់អូចាពេលនេះបានធ្វើឡើង ខណៈដែលថៃកំពុងព្យាយាមស្រោចស្រង់វិស័យទេសចរណ៍ដែលបានរងគ្រោះខ្លាំងដោយកូវីដ១៩។ វិធានការរឹតបន្តឹង និងការបិទខ្ទប់ប្រទេសដើម្បីប្រឆាំងកូវីដ១៩ បានធ្វើឲ្យចំនួនអ្នកទេសចរបរទេសធ្លាក់ចុះយ៉ាងគំហុក។ ជាក់ស្តែងក្នុងឆ្នាំ ២០២០ ចំនួនអ្នកទេសចរបរទេសមានតែ ៦,៧លាននាក់ប៉ុណ្ណោះ ពោលតិចជាងឆ្ងាយបើធៀបនឹងឆ្នាំ ២០១៩ ដែលមានដល់ទៅ ៣៩,៩លាននាក់។ ការធ្លាក់ចុះនេះបានធ្វើឲ្យថៃបាត់បង់ចំណូលបានពីវិស័យទេសចរណ៍ប្រមាណជា ៥០ ០០០លានដុល្លារ។
ពិតណាស់ ថៃមិនសូវមានករណីឆ្លងកូវីដ១៩ ទេនៅក្នុងឆ្នាំ ២០២០។ តែបានស្គាល់សន្ទុះឆ្លងខ្លាំងតាំងពីខែមេសា ឆ្នាំ ២០២១។ ជាសរុបគិតត្រឹមថ្ងៃទី១២ តុលា ថៃមានករណីឆ្លងជាង ១,៧លានករណី និងមានស្លាប់ជិត ១៨ ០០០នាក់។ ចំណែកអត្រាអ្នកចាក់វ៉ាក់សាំងវិញ មានពលរដ្ឋចំនួន ៤៨% បានចាក់ដូសទី១ និងជាង ៣០% បានចាក់ទាំងពីរដូស។ សម្រាប់ប្រមុខរដ្ឋាភិបាលលោកចាន់អូចា ថៃមិនអាចបន្តបិទប្រទេសបានទៀតទេ និងដល់ពេលដែលថៃត្រូវរៀបចំខ្លួនដើម្បីរៀនរស់នៅជាមួយនឹងកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ