ចិនគំរាមដាក់ពិន័យកម្រិតធ្ងន់ចំពោះអ្នកនយោបាយតៃវ៉ាន់ដែលគាំទ្រការប្រកាសឯករាជ្យ
ខណៈភាពតានតឹងរវាងទីក្រុងប៉េកាំងនិងតៃប៉ិកើនឡើងខ្លាំង រដ្ឋអំណាចចិនបានប្រកាសគំរាមថានឹងផ្តន្ទាដាក់ពិន័យធ្ងន់ធ្ងរ ទៅលើអ្នកនយោបាយតៃវ៉ាន់ទាំងឡាយណាដែលនៅតែរឹងរូសនិយមគាំទ្រការប្រកាសឯករាជ្យ។ ជាការគួរឲ្យកត់សម្គាល់ ការប្រកាសរបស់ចិននេះ ធ្លាក់មកបន្ទាប់ពីអាមេរិកអះអាងថានឹងលើកទ័ពទៅជួយតៃវ៉ាន់ក្នុងករណីមានការវាយប្រហារពីចិន។
ចុះផ្សាយនៅថ្ងៃ៖
ស្តាប់ - ០២:៣០
ចិនដែលតែងតែអះអាងថាតៃវ៉ាន់ជាដែនខេត្តមួយរបស់ខ្លួន និងត្រូវរឹបអូសយកនៅថ្ងៃណាមួយដោយកម្លាំងទ័ពប្រសិនបើចាំបាច់នោះ បានខិតខំប្រឹងប្រែងកាន់តែខ្លាំងដើម្បីកាត់ផ្តាច់កោះប្រជាធិតេយ្យមួយនេះពីឆាកអន្តរជាតិ។
កាលពីថ្ងៃសុក្រ ទី៥ វិច្ឆិកាម្សិលមិញ ការិយាល័យទទួលបន្ទុកកិច្ចការតៃវ៉ាន់ក្នុងទីក្រុងប៉េកាំងបានប្រកាសផ្តន្ទាឲ្យទទួលពិន័យព្រហ្មទណ្ឌមួយជីវិតទៅលើក្រុមអ្នកគាំទ្រឯករាជ្យភាពរបស់តៃវ៉ាន់ ដោយអនុលោមតាមច្បាប់។
ក្រោមហេតុផលថាបានព្យាបាទនិយាយបង្ខាច់បង្ខូចក្រុងប៉េកាំង មន្ត្រីរដ្ឋាភិបាលតៃវ៉ាន់មួយចំនួនត្រូវបានបញ្ចូលឈ្មោះក្នុងបញ្ចីខ្មៅរបស់ចិន។ ពួកគេទាំងនោះមានជាអាទិ៍ នាយករដ្ឋមន្ត្រីតៃវ៉ាន់ លោក ស៊ូ តេង ចាង (Su Tseng-chang) ប្រធានសភា តៃវ៉ាន់លោក យូ ស្ហីគុន (Yu Shyi-kun) និង និងលោក ចូសេហ្វ វូ (Joseph Wu) ដែលជារដ្ឋមន្ត្រីការបរទេសតៃវ៉ាន់។ អាជ្ញាធរក្រុងប៉េកាំងបានហាមឃាត់អ្នកនយោបាយតៃវ៉ាន់ទាំងអស់នេះនិងសមាជិកគ្រួសាររបស់ពួកគេមិនឲ្យធ្វើដំណើរចូលដីគោក ហុងកុង ឬម៉ាកាវបានឡើយ។
ភ្លាមៗនៅថ្ងៃសុក្រដដែលនោះ នាយករដ្ឋមន្ត្រីតៃវ៉ាន់បានចេញមុខនិយាយថាលោកមិនខ្លាចនឹងការសម្លុតគំរាមកំហែងរបស់ចិនឡើយនិងថាចិនមិនជាអ្នកគ្រប់គ្រងតៃវ៉ាន់នោះទេ តែចិនតាមចង់ក្រសោបយកកោះប្រជាធិបតេយ្យនេះរហូតមក។
គួរបញ្ជាក់ថា ចិនដីគោកនិងកោះតៃវ៉ាន់គ្រប់គ្រងដោយរដ្ឋាភិបាលដាច់ដោយឡែកពីគ្នាតាំងពីឆ្នាំ ១៩៤៩មក។ ចាប់តាំងពីពេលនោះ តៃវ៉ាន់ ដែលមានប្រជាជនចំនួនប្រមាណ ២៤ លាននាក់ បានផ្លាស់ប្តូរទៅកាន់របបប្រជាធិបតេយ្យ ខុសពីចិនដែលប្រកាន់របបកុម្មុយនិស្ត។
គួរជ្រាបដែរថានៅមួយរយៈចុងក្រោយនេះ ភាពតានតឹងរវាងក្រុងប៉េកាំង និងតៃប៉ិ កើតឡើងខ្លាំង ជាពិសេសបន្ទាប់ពីចិនបញ្ជូនយន្តហោះចម្បាំងជាច្រើនគ្រឿងចូលទៅក្នុងដែនអាកាសតៃវ៉ាន់ជាញឹកញយ។
ដោយមើលឃើញបែបនេះ អាមេរិកដែលជាសម្ព័ន្ធមិត្តរបស់តៃវ៉ាន់បានប្រកាសថានឹងលើកទ័ពចូលជួយតៃវ៉ាន់ ប្រសិនបើចិនហ៊ានបើកការវាយប្រកាសយោធាលើតៃវ៉ាន់នោះ។ មួយរយៈក្រោយមកទៀត ពោលនៅព្រហស្បតិ៍ ទី៤ វិច្ឆិកានេះ ប្រធានគណៈប្រតិភូសភាអឺរ៉ុបដែលកំពុងបំពេញទស្សនកិច្ចនៅទីក្រុងតៃប៉ិបានហៅលទ្ធិប្រជាធិបតេយ្យរបស់តៃវ៉ាន់ថាជា "កំណប់ទ្រព្យ" និងបានសន្យាថានឹងគាំទ្រកោះតៃវ៉ាន់ រហូតធ្វើឲ្យចិនទ្រាំមិនបាននិងចេញមុខគំរាមមិនលែកលែងចំពោះអ្នកនយោបាយតៃវ៉ាន់ដែលគាំទ្រការប្រកាសឯករាជ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ