មន្ត្រីមន្ទីរបញ្ចកោណថាអាមេរិកពិតជាមានសមត្ថភាពការពារតៃវ៉ាន់បាន
យោធាអាមេរិកពិតណាស់មានសមត្ថភាពការពារតៃវ៉ាន់ពីការវាយប្រហាររបស់ចិន។ នេះគឺជាការលើកឡើងរបស់មន្ត្រីជាន់ខ្ពស់នៃមន្ទីរបញ្ចកោណ លោក ម៉ាក មីលី (Mark Milley) នៅថ្ងៃពុធ ទី៣ វិច្ឆិកា ដោយបន្ថែមថា អាមេរិកនឹងចូលជួយតៃវ៉ាន់ប្រសិនបើមានការស្នើសុំឲ្យធ្វើដូច្នោះ។
ចុះផ្សាយនៅថ្ងៃ៖
ស្តាប់ - ០២:២៦
លោកអគ្គមេបញ្ជាការកងទ័ពអាមេរិក ម៉ាក មីលី គូសបញ្ជាក់ថារូបលោកមិនគិតថានោះទេថាចិននឹងបើកការវាយប្រហារយោធាប្រឆាំងនឹងកោះតៃវ៉ាន់ក្នុងរយៈពេល ២៤ ខែខាងមុខ។ ប៉ុន្តែនៅពេលសួរថាតើមន្ទីរបញ្ចកោណអាចការពារតៃវ៉ាន់បានឬអត់នោះ?
លោកបានឆ្លើយវិញភ្លាមថាគ្មានចម្ងល់ឡើយទាក់ទងរឿងនេះ។ ក្នុងករណីដែលហេតុការណ៍បែបនេះកើតឡើង នោះមន្ទីរបញ្ចកោណអាមេរិកប្រាកដណាស់នឹងការពារតៃវ៉ាន់បានព្រោះអាមេរិកមានសមត្ថភាពធ្វើអ្វីៗគ្រប់បែបយ៉ាងនៅជុំវិញពិភពលោកប្រសិនបើចាំបាច់។
នៅឯវេទិកាសន្តិសុខ Aspen មន្ត្រីជាន់ខ្ពស់នៃមន្ទីរបញ្ចកោណរូបនេះបានឲ្យដឹងដែរថាគឺប្រធានាធិបតីអាមេរិកដែលជាអ្នកមានសិទ្ធិសម្រេចថាតើត្រូវឈានជើងចូលជួយតៃវ៉ាន់ឬមិនជួយ ប្រសិនបើចិនចូលឈ្លានពានដើម្បីកាន់កាប់តៃប៉ិមែននោះ។
ដោយឡែក ទោះបីជាមិនគិតថាចិននឹងបញ្ចេញសកម្មភាពណាមួយប្រឆាំងនឹងកោះតៃវ៉ាន់នាពេលខាងមុខឆាប់ៗនេះក្តី ប៉ុន្តែ លោកអគ្គមេបញ្ជាការកងទ័ពអាមេរិកក៏បានព្រមានថាដែរថាយោធាចិនអាចអភិវឌ្ឍបច្ចេកវិទ្យាជឿនលឿនបានក្នុងរយៈពេលដ៏ខ្លីដ៏គួរឲ្យភ្ញាក់ផ្អើល។ សម្តីនេះគឺលោកម៉ាក មីលី ចង់សំដៅដល់ការសាកល្បងមីស៊ីលអ៊ីពែរសូនិកលឿងជាងសំឡេងរបស់ចិន កាលពីខែសីហាកន្លងទៅ។
គួរបញ្ជាក់ថា នៅមួយរយៈចុងក្រោយនេះ ចិនដីគោកនិងកោះតៃវ៉ាន់បានដំឡើងសំឡេងដាក់គ្នាខ្លាំងជាថ្មីទៀត។ កាលពីថ្ងៃព្រហស្បតិ៍ ទី២១ តុលា លោកចូ បៃដិន បានអះអាងថាសហរដ្ឋអាមេរិកនឹងលើកទ័ពទៅជួយតៃវ៉ាន់ក្នុងករណីមានការវាយប្រហារពីចិន។
យ៉ាងណាក្តី ទីក្រុងវ៉ាស៊ីនតោនយល់ឃើញថាជម្លោះរវាងប៉េកាំង និងតៃប៉ិ គួរតែត្រូវបានដោះស្រាយដោយសន្តិវិធី និងដោយផ្អែកលើឆន្ទៈរបស់ប្រជាជនទាំងសងខាង។
គួរជ្រាបទៀតថា ក្នុងអំឡុងពេលមានភាពតានតឹងខ្លាំងរវាងតៃវ៉ាន់និងចិននេះដែរ គណៈប្រតិភូសភាអឺរ៉ុបមួយក្រុមបានធ្វើទស្សនកិច្ចទៅកាន់តៃវ៉ាន់នៅថ្ងៃពុធនេះ។ ទស្សនកិច្ចនេះគឺជាផ្នែកមួយនៃកិច្ចខិតខំប្រឹងប្រែងរបស់អឺរ៉ុប ដើម្បីកសាងទំនាក់ទំនងកាន់តែជិតស្និទ្ធជាមួយទីក្រុងតៃប៉ិ បើទោះបីជាមានការព្រមានពីប្រទេសចិនយ៉ាងណាក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ