ចិនថាតៃវ៉ាន់គ្មានសិទ្ធិចូលជាសមាជិកស្ថាប័នអង្គការសហប្រជាជាតិទេ
នៅថ្ងៃពុធទី ២៧ តុលា ២០២១នេះ ចិនបានច្រានចោលទាំងស្រុងសំណើរបស់សហរដ្ឋអាមេរិក ដែលចង់ឱ្យតៃវ៉ាន់បាន ចេញមុខចេញមាត់ពេញលេញ ក្លាយជាសមាជិកអង្គការសហប្រជាជាតិ។ ប្រតិកម្មរបស់ចិន ធ្វើឡើងក្រោយពីប្រមុខការទូតអាមេរិក លោក អង់តូនី ប្លីងកិន Antony Blinken បានប្រកាសនៅល្ងាចមិញ (ថ្ងៃអង្គារទី ២៦តុលា) អំពាវនាវឱ្យប្រទេសនៅលើពិភពលោក គាំទ្រ ការចូលរួមយ៉ាងសកម្មរបស់តៃវ៉ាន់ នៅក្នុងក្របខ័ណ្ឌការងារអង្គការសហប្រជាជាតិនិងសហគមន៍អន្តរជាតិ។
ចុះផ្សាយនៅថ្ងៃ៖
ស្តាប់ - ០១:៥០
តៃវ៉ាន់ជាដៃគូដ៏សំខាន់របស់អាមេរិក និងជាគំរូជោគជ័យនៃលទ្ធិប្រជាធិបតេយ្យ ដូច្នេះប្រទេសលើលោក គួរតែគាំទ្រឱ្យតៃវ៉ាន់បានចូលរួមយ៉ាងសកម្ម និងខ្លាំងក្លា ក្នុងកិច្ចការងាររបស់អង្គការសហប្រជាជាតិ និងសហគមន៍អន្តរជាតិ។ នេះបើតាមសេចក្តីថ្លែងការណ៍របស់លោកប្លីងកិន ប្រមុខការទូតអាមេរិក ដោយបន្ថែមទៀតថា ការចូលរួមរបស់តៃវ៉ាន់ មានសារៈសំខាន់ណាស់ក្នុងការប្រឈមនឹងឧបសគ្គជាច្រើនដែលពិភពលោកកំពុងឆ្លងកាត់នាពេលបច្ចុប្បន្ននេះ។ តែដោយហេតុមានការជំទាស់ខ្លាំង ដោយមិននិយាយចំឈ្មោះ “ចិន” លោក ប្លីងកិន បានអះអាងថា នារយៈពេលចុងក្រោយនេះ តៃវ៉ាន់មិនអាចបញ្ចេញសកម្មភាពបានសោះក្នុងអង្គការសុខភាពពិភពលោក និង អង្គការអាកាសចរណ៍ស៊ីវិលអន្តរជាតិ។
បើតាមលោកប្រមុខការទូត ការគាំទ្រឱ្យតៃវ៉ាន់បានក្លាយជាសមាជិកក្នុងស្ថាប័នអង្គការសហប្រជាជាតិ មិនមែនជារឿងនយោបាយទេ តែដោយសំអាងលើការសិក្សាព្រឹត្តិការណ៍ពិត (ជាការណនិយម) ហើយស្របទៅនឹងទ្រឹស្តីនយោបាយរបស់កោះចំពោះចិនទៀត។ តៃវ៉ាន់បានចូលរួមក្នុងស្ថាប័នជំនាញមួយចំនួនរបស់អង្គការសហប្រជាជាតិ ដោយមានសកម្មភាពជាក់ស្តែងស្រាប់ទៅហើយក្នុងរយៈពេល៥០ឆ្នាំកន្លងមកនេះ។ ផាត់តៃវ៉ាន់ពីប្រព័ន្ធអង្គការសហប្រជាជាតិ បានធ្វើឱ្យខូចការងារសំខាន់ៗរបស់អង្គការសហប្រជាជាតិនិង ភ្នាក់ងារជាច្រើន។
គ្រាន់តែបានឃើញសេចក្តីអំពាវនាវនេះភ្លាម ដោយគ្មានបង្អង់ ចិនបានបញ្ចេញប្រតិកម្មបដិសេធយ៉ាងដាច់អហង្ការ ថា តៃវ៉ាន់គ្មានសិទ្ធិ ចេញមុខចេញមាត់ពេញលេញនៅអង្គការប្រជាជាតិទេ មានតែរដ្ឋឯករាជ្យប៉ុណ្ណោះ ដែលអាចក្លាយជាសមាជិកអង្គការសហប្រជាជាតិបាន។ សម្រាប់ប៉េកាំង តៃវ៉ាន់ ជាខេត្តមួយដែលចិនគ្រប់គ្រងមិនបាន និងដែលរង់ចាំការបង្រួបបង្រួម ហើយចិនអាចប្រើកម្លាំងវាយក្រសោបយកមកវិញ នៅថ្ងៃណាមួយផងបើចាំបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ