អាមេរិកនិងចិន ព្រមានគ្នាទៅវិញទៅមករឿងតៃវ៉ាន់ មុនជំនួបកំពូល បៃដិន-ស៊ីជីនពីង
នៅថ្ងៃចន្ទទី ១៥វិច្ឆិកា ២០២១ ប្រធានាធិបតីអាមេរិកចូបៃដិន និងសមភាគីចិន លោក ស៊ី ជីនពីង ត្រូវមានជំនួប តាមវីដេអូខុនហ្វេរិន ជាលើកទីបី។ តែមួយថ្ងៃមុនបើកជំនួបកំពូល សហរដ្ឋអាមេរិកនិងចិនបានផ្តោះប្តូរពាក្យសំដីបែបព្រមានគ្នាទៅវិញទៅមកយ៉ាងខ្លាំង ជុំវិញសំណុំរឿងតៃវ៉ាន់។
ចុះផ្សាយនៅថ្ងៃ៖
ស្តាប់ - ០១:៥៣
នៅក្នុងកិច្ចពិភាក្សាជាមួយសមភាគីចិន វ៉ាង យី រដ្ឋមន្ត្រីការបរទេសអាមេរិកលោក អង់តូនី ប្លីងកិន បានសម្តែងការព្រួយបារម្ភយ៉ាងខ្លាំងចំពោះសម្ពាធយោធា ការទូត និងសេដ្ឋកិច្ច របស់រដ្ឋាភិបាលប៉េកាំង ដែលដាក់ប្រឆាំងលើតៃវ៉ាន់។ នេះបើតាមសេចក្តីថ្លែងការណ៍របស់ក្រសួងការបរទេសអាមេរិក ដែលជំរុញបន្ថែម ឱ្យប៉េកាំងបើកកិច្ចចរចាច្បាស់លាស់មួយដើម្បីដោះស្រាយជម្លោះជាមួយតៃវ៉ាន់ ដោយសន្តិវិធី ដោយស្របតាមការចង់បាន និងដោយស្របតាមផលប្រយោជន៍របស់ប្រជាពលរដ្ឋតៃវ៉ាន់។
ប៉ុន្តែ លោក វ៉ាង យី បានព្រមានតបវិញភ្លាម ប្រឆាំងរាល់គ្រប់សកម្មភាពរបស់សហរដ្ឋអាមេរិកណាដែលមានលក្ខណៈគាំទ្រការទាមទារឯករាជ្យតៃវ៉ាន់។ សម្រាប់លោករដ្ឋមន្ត្រីក្រសួងការបរទេសចិន ការគាំទ្រឯករាជ្យតៃវ៉ាន់ ទោះក្នុងទម្រង់ណាក៏ដោយ សុទ្ធតែបំផ្លាញសន្តិភាពនៅតំបន់ច្រកសមុទ្ទតៃវ៉ាន់ទាំងអស់។
សូមរំលឹកថា ក្រៅអំពីប្រកាន់ជំហរដាច់ខាតរៀងខ្លួនៗ ក្នុងសំណុំរឿងពាណិជ្ជកម្មឬសំណុំរឿងសិទ្ធិមនុស្ស ភាពតានតឹងអាមេរិក-ចិនបានប៉ោងឡើងជារៀងរាល់ថ្ងៃ។ តាំងពីប៉ុន្មានសប្តាហ៍ចុងក្រោយមកនេះ សំណុំរឿងតៃវ៉ាន់ បានចូលមកចងរឹត បន្ថែមមួយជាន់ទៀត។ បន្ទាប់ពីបានដាក់គំនាបការទូតធ្វើឱ្យតៃវ៉ាន់កាន់តែឯកា ចិនបានបង្កើនសកម្មភាពយោធាក្បែរៗកោះតៃវ៉ាន់។ ឯសហរដ្ឋអាមេរិកក៏បានសន្យាជួយការពារនិងពង្រឹងកម្លាំងទ័ពតៃវ៉ាន់។
ការប្រទាក់សំដីគ្នាជាថ្មីនេះ ធ្វើឡើងក្នុងជំនួបរវាងប្រមុខការទូតទាំងពីរប្រទេស ដែលជាការត្រៀមលក្ខណៈបើកជំនួបកំពូលថ្នាក់ប្រមុខរដ្ឋ។ ជំនួបកំពូល ចូបៃដិន-ស៊ីជីនពីង នៅថ្ងៃចន្ទទី ១៥វិច្ឆិកាស្អែក ជាឱកាសមួយសម្រាប់ប្រមុខដឹកនាំ ទាំងពីរពិភាក្សាគ្នាប្រកបដោយទំនួលខុសត្រូវ អំពីភាពប្រកួតប្រជែងគ្នា តែត្រូវធ្វើការរួមគ្នាក្នុងវិស័យដែលផ្តល់ប្រយោជន៍រួម។
លោកប្រធានាធិបតីអាមេរិក ចង់ជួបលោកស៊ីជីនពីងដោយផ្ទាល់ដែរ ប៉ុន្តែតាំងពីជិតពីរឆ្នាំមកនេះ ដោយហេតុកូវីដ១៩ ប្រធានាធិបតីចិន មិនដែលចាកចេញក្រៅប្រទេសសោះ។ នៅទីបំផុត ជំនួបកំពូលជាលើកទីបី ប្រព្រឹត្តតាមអនឡាញទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ