អាមេរិកអំពាវនាវឲ្យចិនបញ្ឈប់ទង្វើឈ្លានពាននៅក្នុងតំបន់ឥណ្ឌូប៉ាស៊ីហ្វិក
ប្រមុខការទូតអាមេរិកលោកអង់តូនី ប៊្លីនកិនកំពុងបន្តបំពេញទស្សនកិច្ចនៅក្នុងតំបន់អាស៊ីអាគ្នេយ៍។ ថ្លែងក្នុងថ្ងៃអង្គារ ទី១៤ ធ្នូពីទីក្រុងហ្សាការតា ប្រទេសឥណ្ឌូណេស៊ី លោកប៊្លីនកិនបានអំពាវនាវឲ្យចិនបញ្ឈប់ទង្វើឈ្លានពាននៅក្នុងតំបន់ឥណ្ឌូប៉ាស៊ីហ្វិក។ គួររម្លឹកថា មានប្រទេសអាស៊ីអាគ្នេយ៍ចំនួន ៣ នៅក្នុងកម្មវិធីទស្សនកិច្ចរបស់ប្រមុខការទូតអាមេរិក គឺឥណ្ឌូណេស៊ី ម៉ាឡេស៊ី និងប្រទេសថៃ។
ចុះផ្សាយនៅថ្ងៃ៖
នៅក្នុងសុន្ទរកថាថ្លែងពីសកលវិទ្យាល័យក្នុងទីក្រុងហ្សាការតា លោកប្រមុខការទូតអាមេរិកអង់តូនី ប៊្លីនកិនបានបញ្ជាក់ថា អាមេរិកបានប្តេជ្ញាចិត្តធានាឲ្យមានការធ្វើចរាចរណ៍ដោយសេរីនៅក្នុងសមុទ្រចិនខាងត្បូងដែលទង្វើឈ្លានពានរបស់ចិនបានគំរាមកំហែងដល់ការដោះដូរពាណិជ្ជកម្មក្នុងលោកសម្រាប់ទឹកប្រាក់ជាង ៣ ០០០ ០០០លានដុល្លារក្នុងមួយឆ្នាំៗ។ ទន្ទឹមគ្នានេះ លោកប៊្លីនកិនបានអះអាងជាថ្មីពីការយកចិត្តទុកដាក់របស់អាមេរិកដើម្បីសន្តិភាព និងស្ថិរភាពនៅច្រកសមុទ្រតៃវ៉ាន់។
ប្រមុខការទូតអាមេរិកបានព្យាយាមបញ្ជាក់ពីឆន្ទៈរបស់អាមេរិកក្នុងការពង្រឹងសម្ព័ន្ធភាពជាមួយគ្រប់ប្រទេសទាំងអស់នៅក្នុងតំបន់ និងសន្យាការពារសិទ្ធិរបស់គ្រប់ប្រទេសទាំងអស់នៅក្នុងជម្រើសផ្លូវដែលពួកគេត្រូវដើរដោយមិនត្រូវទទួលរងការគាបសង្កត់ ឬការបំភិតបំភ័យពីប្រទេសណាមួយទេ។ តាមលោកប៊្លីនកិន មានក្តីបារម្ភច្រើនណាស់ទាក់ទងនឹងទង្វើឈ្លានពានរបស់ចិនតាំងពីអាស៊ីឦសានដល់អាស៊ីអាគ្នេយ៍ និងតាំងពីទន្លេមេគង្គដល់កោះប៉ាស៊ីហ្វិក។ « គ្រប់ប្រទេសក្នុងតំបន់ចង់ឲ្យចិនប្តូរឥរិយាបទនេះ ហើយយើងក៏អ៊ីចឹងដែរ » នេះជាការបន្ថែមរបស់លោកប៊្លីនកិន។
ការថ្លែងដូចនេះរបស់ប្រមុខការទូតអាមេរិកបានធ្វើឡើង ខណៈដែលតំបន់កំពុងស្គាល់កំណើនភាពតានតឹងនៅក្នុងសមុទ្រចិនខាងត្បូង។ សមុទ្រចិនខាងត្បូងដែលជាតំបន់គន្លឹះនៃការដោះដូរពាណិជ្ជកម្មកំពុងត្រូវបានចិនទាមទារជាកម្មសិទ្ធិផ្តាច់មុខ និងដែលចិនកំពុងមានជម្លោះជាមួយប្រទេសព្រុយណេ ម៉ាឡេស៊ី ហ្វីលីពីន តៃវ៉ាន់ និងប្រទេសវៀតណាម។ ក្រៅពីបានវាយប្រហារចិនចំមុខក្នុងរឿងសមុទ្រចិនខាងត្បូង លោកប៊្លីនកិនក៏បានដៀមដាមដាក់ចិនលើគម្រោងផ្លូវ និងខ្សែក្រវ៉ាត់របស់ប្រធានាធិបតីចិនលោកស៊ី ជីនពីង។
លោកប៊្លីនកិនបានសន្យាថា អាមេរិកនឹងធ្វើការជាមួយប្រទេសទាំងអស់នៅក្នុងតំបន់ដើម្បីផ្តល់ និងបំពាក់នូវហេដ្ឋារចនាសម្ព័ន្ធដែលមានគុណភាពខ្ពស់។ គួរបញ្ជាក់ថា គម្រោងផ្លូវ និងខ្សែក្រវ៉ាត់របស់ចិនត្រូវបានក្រុមប្រទេសលោកខាងលិចចាត់ទុកជាគម្រោងមិនសូវមានអំណោយផលសម្រាប់បរិស្ថាន និងសម្រាប់ការងារនៅក្នុងប្រទេសពាក់ព័ន្ធ។ តែគម្រោងរបស់ចិនមួយនេះបានធ្វើឲ្យប្រទេសជាច្រើនជាប់បំណុលចិនកាន់តែធ្ងន់ ក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ